ໃນວັນທີ 21 ພະຈິກ 2024 ນີ້, ຢູ່ທີ່ສະຖານີລົດໄຟ ເມືອງໂພນໂຮງ ແຂວງວຽງຈັນ ໄດ້ຈັດພິທີປິດການຝືກຊ້ອມຮ່ວມສອງກອງທັບ ລາວ-ຈີນ ” ຂະບວນລົດໄຟສັນຕິພາບ 2024 ” ເພື່ອຊ່ວຍເຫຼື່ອມະນຸດສະທຳດ້ານການແພດ ໂດຍການເຂົ້າຮ່ວມເປັນປະທານຂອງສະຫາຍ ພົນຕີ ຄຳເພັດ ສີຊານົນ ຫົວໜ້າກົມໃຫຍ່ພະລາທິການກອງທັບ, ຫົວໜ້າຊີ້ນໍາລວມການຝຶກຊ້ອມຝ່າຍລາວ, ມີສະຫາຍ ພັນເອກ ພິເສດ ຫຼິວ ຢາງ ຮອງຫົວໜ້າກົມເສນາຮັກພະລາທິການທະຫານສູນກາງ ກອງທັບປົດປ່ອຍປະຊາຊົນຈີນ, ມີບັນດາສະຫາຍຕາງໜ້າຄະນະນໍາກະຊວງ, ບັນດາກົມໃຫຍ່, ຫ້ອງວ່າການ, ອົງການປົກຄອງທ້ອງຖິ່ນ, ມີບັນດາສະຫາຍຄະນະຊີ້ນໍາລວມ, ບັນດາອະນຸກໍາມະການຮັບປະກັນ, ພ້ອມດ້ວຍນາຍ ແລະ ພົນທະຫານ ຈາກກອງທັບປົດປ່ອຍປະຊາຊົນຈີນ ແລະ ກອງທັບປະຊາຊົນລາວເຂົ້າຮ່ວມ .
ສະຫາຍ ພົນຈັດຕະວາ ຄໍາແພງ ພູມມາແກ້ວ ຫົວໜ້າ ກົມເສນາຮັກ ກົມໃຫຍ່ພະລາທິການກອງທັບປະຊາຊົນລາວ, ຄະນະຊີ້ນໍາລວມຝ່າຍລາວ ໄດ້ລາຍງານຜົນສໍາເລັດການຈັດຕັ້ງຫັດແອບ-ຝຶກຊ້ອມຮ່ວມສອງກອງທັບ ລາວ-ຈີນ ຄັ້ງນີ້ ໄດ້ນຳໃຊ້ກຳລັງຈາກສອງກອງທັບ ທັງໝົດ 638 ຄົນ, ພາຫະນະເຕັກນິກວິຊາສະເພາະ ຈຳນວນ 30 ຄັນ. ພ້ອມນັ້ນຍັງມີລົດໄຟການແພດ 01 ຂະບວນ ແລະ ຍົນຂຶ້ນຊື່ 01 ລຳ, ນອກຈາກນີ້, ທັງສອງພາກສ່ວນແມ່ນຮ່ວມກັນໄດ້ຊອກຄົ້ນ ແລະ ກອບກູ້ຜູ້ປະສົບໄພຢູ່ເຂດທີ່ເກີດດິນເຈື່ອນທັບຖົມ, ໄດ້ກວດກາ ແລະ ຄັດແຍກລະດັບຄວາມຮ້າຍແຮງຂອງຜູ້ທີ່ຖືກບາດເຈັບ (ຄົນເຈັບໜັກ, ຄົນເຈັບກາງ ແລະ ຄົນເຈັບເບົາ ), ໄດ້ຮ່ວມກັນກອບກູ້ ແລະ ຊ່ວຍເຫຼືອຄົນເຈັບທີ່ມີບັນຫາກ່ຽວກັບລະບົບຫາຍໃຈ, ຮ່ວມກັນຝຶກແອບວີທີແກ້ໄຂ, ປິ່ນປົວ, ການເຄື່ອນຍ້າຍ ແລະ ນຳສົ່ງຜູ້ຖືກບາດເຈັບຈາກໂຮງໝໍສະໜາມຂັ້ນ 2 ແລະ ໄປຫາໂຮງໝໍຂັ້ນ 3 ທີ່ຂະບວນລົດໄຟສັນຕິພາບ ດ້ວຍການນຳໃຊ້ລົດແພດສະໜາມນຳສົ່ງ. ຜ່ານການຝືກຊ້ອມໃນໄລຍະ7 ວັນຜ່ານມາເຫຼົ່າຮົບເສນາຮັກກອງທັບປະຂາຊົນລາວຍັງໄດ້ຮຽນຮູ້ເຕັກນິການເຊີດຊູ ແລະ ປີ່ນປົວຄົນເຈັບເວລາເຄື່ອນຍ້າຍຢູ່ເທິງລົດໄຟ, ໄດ້ຮຽນຮູ້ວິທີນຳສົ່ງຄົນເຈັບທາງອາກາດ (ນຳສົ່ງດ້ວຍຍົນ) ນໍາອີກ, ເຊິ່ງການຝືືກຊ້ອມຂະບວນລົດໄຟສັນຕິພາບ 2024 ຄັ້ງນີ້ ໄດ້ສ້າງສາຍສຳພັນສະໜິດແໜ້ນເພີ່ມຄວາມສາມັກຄີຮັກແພງລະຫວ່າງທິມແພດ-ນັກຝຶກ ຂອງລາວ ແລະ ຈີນ ໂດຍສະເພາະແມ່ນໄດ້ແລກປ່ຽນບົດຮຽນຄວາມຮູ້ ແລະ ປະສົບການໃນການກອບກູ້ ແລະ ຊ່ວຍເຫຼືອຜູ້ທີ່ໄດ້ຮັບຜົນກະທົບຈາກໄພພິບັດທຳມະຊາດ ແລະ ແລກປ່ຽນບົດຮຽນໃນການປິ່ນປົວຄົນເຈັບຢູ່ໂຮງໝໍອີກນຳ.
ຈາກນັ້ນ, ໃນພິທີກໍໄດ້ຜ່ານຂໍ້ຕົກລົງວ່າດ້ວຍການມອບຫຼຽນໄຊພິລະອາດຫານ ແລະ ຫຼຽນກາມິດຕະພາບກອງທັບປະຊາຊົນລາວ. ໃນນີ້, ກະຊວງປ້ອງກັນປະເທດຕົກລົງ: ມອບຫຼຽນໄຊພິລະອາດຫານຊັ້ນ III ໃຫ້ຝ່າຍຈີນ ຈໍານວນ 40 ສະຫາຍ; ມອບຫຼຽນກາມິດຕະພາບກອງທັບປະຊາຊົນລາວ ໃຫ້ ຈຳນວນ 110 ສະຫາຍ ແລະ ຕາງໜ້າກໍາລັງເຝິກຊ້ອມຝ່າຍລາວ 10 ສະຫາຍ.
ໂອກາດນີ້, ສະຫາຍ ພົນຕີ ຄຳເພັດ ສີຊານົນ ໄດ້ກ່າວປິດການຝືກຊ້ອມຮ່ວມສອງກອງທັບລາວ-ຈີນ ” ຂະບວນລົດໄຟສັນຕິພາບ 2024 ຄັ້ງນີ້ ຈະເກີດຂຶ້ນ ແລະ ສຳເລັດລົງໄດ້ ຍ້ອນການນຳຂັ້ນສູງເຫັນໄດ້ຄວາມໝາຍຄວາມສຳຄັນໂດຍແມ່ນລັດຖະມົນຕີກະຊວງປ້ອງກັນປະເທດ ທັງສອງຝ່າຍໄດ້ອະນຸມັດໃຫ້ຈັດຕັ້ງຂະບວນລົດໄຟສັນຕິພາບ 2024 ນີ້, ໄດ້ແຕ່ງຕັ້ງຄະນະຊີ້ນຳ ແລະ ມອບໝາຍໜ້າທີ່ໃຫ້ແຕ່ລະພາກສ່ວນຮັບຜິດຊອບຢ່າງລະອຽດໂດຍສະເພາະແມ່ນກົມເສນາຮັກກົມໃຫຍ່ພະລາທິການ ເຊິ່ງຮັບຜິດຊອບໂດຍກົງກ່ຽວກັບເນື້ອໃນການຫັດແອບ, ບັນດາສະຫາຍທີ່ໄດ້ຮັບການແຕ່ງຕັ້ງກໍ່ໄດ້ປະຕິບັດໜ້າທີ່ຂອງຕົນຢ່າງຕັ້ງໜ້າ ແລະ ມີຄວາມຮັບຜິດຊອບສູງ, ເຖິງວ່າການຝຶກຊ້ອມຄັ້ງນີ້ສະພາບອາກາດບໍ່ເອື້ອອຳນວຍ(ອາກາດຮ້ອນ), ໄລຍະເວລາໃນການກະກຽມ-ຝຶກຊ້ອມສັ້ນ, ແຕ່ຄະນະຮັບຜິດຊອບຊີ້ນຳ, ອະນຸກຳມະການ ແລະ ນັກຝຶກແອບທຸກສະຫາຍທັງລາວ ແລະ ຈີນ ກໍ່ໄດ້ເອົາໃຈໃສ່ສຸມໝົດທຸກສະຕິ ກຳລັງເຫື່ອແຮງຂອງຕົນຜ່ານຜ່າ, ໂດຍນຳໃຊ້ເຕັກນິກການຫັດແອບໄດ້ຖືກຕ້ອງຕາມຫຼັກການສາກົນ ພ້ອມທັງມີຄວາມປອດໄພ 100% ແລະ ການຝືກຊ້ອມຮ່ວກັນລະຫວ່າງສອງກອງທັບ ສອງກົມເສນາຮັກ ລາວ-ຈີນ ໃນການຝຶກຊ້ອມຄັ້ງນີ້ນອກຈາກເປັນການສ້າງຄວາມເຂັ້ມແຂງໃຫ້ແກ່ນັກວິຊາການ-ແພດໝໍ ແລະ ການແລກປ່ຽນບົດຮຽນ-ປະສົບການໃນການປິ່ນປົວແລ້ວ ຍັງເປັນຂີດໝາຍທີ່ສຳຄັນເຖິງການຮັດແໜ້ນຄວາມສາມັກຄີ ມິດຕະພາບ, ສອງພັກ, ສອງລັດ ກໍຄືືປາຊາສອງຊາດລາວ-ຈີນ ໃນການກະຄວາມພ້ອມໃຫ້ການຊ່ວຍເຫຼືອເຊິ່ງກັນ ແລະ ກັນໃນທຸກສະພາບການ.
ໂດຍ: ບິກໄຊ
