ພິທີສະເຫຼີມສະຫຼອງວັນເດັກໂລກ ແລະ ວັນຄົບຮອບສົນທິສັນຍາ ວ່າດ້ວຍ ສິດທິເດັກ ຄົບຮອບ 35 ປີ (20 ພະຈິກ 1989 – 20 ພະຈິກ 2024) ໄດ້ຈັດຂຶ້ນໃນວັນທີ 20 ພະຈິກທນີ້, ໃນພິທີແມ່ນໄດ້ເປີດໄຟສີຟ້າໃສ່ປະຕູໄຊເຮັດໃຫ້ປະຕູໄຊກາຍເປັນສີຟ້າ ແລະ ພິທີດັ່ງກ່າວແມ່ນໄດ້ຈັດຂຶ້ນພ້ອມກັນໃນທົ່ວໂລກ ໂດຍການເຂົ້າຮ່ວມຂອງ ທ່ານ ໄພວັນ ແກ້ວປະເສີດ ຮອງລັດຖະມົນຕີ ກະຊວງສາທາລະນະສຸກ ຮອງປະທານຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ); ທ່ານ ອາຕູໂຣ ໂຮມໂບລີ ຮອງຜູ້ຕາງໜ້າອົງການອຸຍນີເຊັບ ປະຈຳ ສປປ ລາວ ມີບັນດາຄູ່ຮ່ວມພັດທະນາ, ບັນດາອົງການທີ່ບໍ່ສັງກັດລັດຖະບານ, ອົງການຈັດຕັ້ງທາງສັງຄົມ, ສະມາຄົມ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ໄພວັນ ແກ້ວປະເສີດ ໄດ້ກ່າວວ່າ: ການສະເຫຼີມສະຫຼອງວັນດັ່ງກ່າວ ສະແດງໃຫ້ເຫັນເຖິງນິມິດໝາຍຂອງຊາດທີ່ຄໍານຶງເຖິງຄວາມສໍາຄັນດ້ານສິດທິເດັກ ແລະ ຮັບຮູ້ເຖິງຄວາມຈໍາເປັນຮີບດ່ວນຂອງໄວໜຸ່ມ ໃນການມີສ່ວນຮ່ວມຕໍ່ກັບການຈັດຕັ້ງແຜນງານການປ່ຽນແປງດິນຟ້າອາກາດ. ການສະຫຼອງໃນປີນີ້ ຄຊກມດ ໄດ້ເນັ້ນໜັກໃສ່ການປົກປ້ອງສິດທິເດັກ ໄປຄວບຄູ່ກັບການແກ້ໄຂບັນຫາຄວາມທ້າທາຍດ້ານສິ່ງແວດລ້ອມ. ທຸກໆປີການສະຫຼອງວັນສໍາຄັນດັ່ງກ່າວ, ຄຊກມດ ມີຄວາມພາກພູມໃຈທີ່ອົງການອຸຍນີເຊັບ, ບັນດາຄູ່ຮ່ວມພັດທະນາ, ບັນດາອົງການທີ່ບໍ່ສັງກັດລັດຖະບານ, ອົງການຈັດຕັ້ງທາງສັງຄົມ, ສະມາຄົມ ແລະ ບັນດາພາກສ່ວນເອກະຊົນ ພາກທຸລະກິດຕ່າງໆໄດ້ຢືນຄຽງຂ້າງ ແລະ ເປັນຄູ່ຮ່ວມງານຂອງພວກເຮົາໃນການສະໜັບສະໜູນ ແລະ ປົກປ້ອງສິດທິຂອງເດັກທຸກຄົນ. ພ້ອມດຽວກັນນັ້ນ ລັດຖະບານ ສປປ ລາວ ໄດ້ໃຫ້ຄຳໝັ້ນສັນຍາໃນການຊ່ວຍເຫຼືອເດັກນ້ອຍ ແລະ ໄວໜຸ່ມ ໂດຍການໂຄສະນາປຸກລະດົມສັງຄົມ ແລະ ມວນຊົນ ພ້ອມກັນລົງທຶນໃສ່ການຈັດຕັ້ງສິດທິເດັກ ແລະ ສ້າງຄວາມເຂັ້ມແຂງໃຫ້ແກ່ເດັກໃນທຸກດ້ານ ພ້ອມທັງຮັບຟັງສຽງ ຄວາມຕ້ອງການຂອງເດັກ ເພື່ອພັດທະນາ ແລະ ປົກປ້ອງພວກເຂົາ ໂດຍສະເພາະ ເພື່ອຄົ້ນຫາຄໍາຕອບໃນວິທີການແກ້ໄຂຄວາມທ້າທາຍຂອງບັນຫາສິ່ງແວດລ້ອມ, ທັງໝົດນີ້ ກໍເພື່ອພ້ອມກັນສ້າງອະນາຄົດທີ່ສົດໃສ ແລະ ຍືນຍົງໃຫ້ກັບເຂົາເຈົ້າ.
ທ່ານ ອາຕູໂຣ ໂຮມໂບລີ ໄດ້ກ່າວວ່າ: ການສະເຫຼີມສະຫຼອງຄັ້ງນີ້ ເປັນການລະນຶກເຖິງຄວາມຮັບຜິດຊອບຮ່ວມກັນຂອງພວກເຮົາໃນການປົກປ້ອງ ແລະ ລ້ຽງດູເດັກທຸກໆຄົນ, ໂດຍການຮ່ວມມືກັນ, ພວກເຮົາສາມາດຮັບປະກັນໃຫ້ເດັກບໍ່ພຽງແຕ່ຢູ່ລອດເທົ່ານັ້ນ ແຕ່ຍັງໃຫ້ມີການເຕີບໃຫຍ່ຢ່າງປອດໄພໃນໂລກທີ່ປະເຊີນໜ້າກັບການປ່ຽນແປງດ້ານສະພາບດິນຟ້າອາກາດ. ການສະເຫຼີມສະຫຼອງຂອງ ສປປ ລາວ ຖືເປັນສ່ວນໜຶ່ງຂອງການລິເລີ່ມຂອງ ອົງການອຸຍນີເຊັບ ໃນການຮຽກຮ້ອງໃຫ້ປະເທດຕ່າງໆ ກ້າວໄປສູ່ການກໍານົດນະໂຍບາຍດ້ານສະພາບອາກາດທີ່ຄໍານຶງເຖິງເດັກ. “ສົນທິສັນຍາເພື່ອອະນາຄົດ” (Pact for the Future) ຂອງອົງການສະຫະປະຊາຊາດ ທີ່ຈະປຶກສາຫາລື ໃນກອງປະຊຸມສະພາບອາກາດ COP29 ໃນປີນີ້ ທີ່ເມືອງບາກູ ປະເທດອາແຊກໄບຊານ ຊຶ່ງເປົ້າໝາຍສະເພາະແນໃສ່ເພື່ອຮັບປະກັນວ່າ ການສະໜັບສະໜອງທຶນດ້ານສະພາບດິນຟ້າອາກາດ ຈະໄປເຖິງຕາມຄວາມຕ້ອງການຂອງເດັກ ແລະ ການສະໜັບສະໜູນທີ່ກຳນົດໃນລະດັບຊາດ ໂດຍໃຫ້ບຸລິມະສິດການມີສ່ວນຮ່ວມຂອງໄວໜຸ່ມ ແລະ ຂໍ້ລິເລີ່ມທີ່ເປັນມິດກັບເດັກເປັນອັນດັບທໍາອິດ.ສົນທິສັນຍາວ່າດ້ວຍ ສິດທິເດັກ, ໄດ້ຮັບການຮັບຮອງໃນວັນທີ 20 ພະຈິກ ປີ 1989, ແມ່ນສົນທິສັນຍາສິດທິມະນຸດທີ່ໄດ້ຮັບການຍອມຮັບຢ່າງກວ້າງຂວາງທີ່ສຸດ, ໂດຍລະບຸເຖິງສິດທິຂອງເດັກຢູ່ທົ່ວທຸກແຫ່ງ.
