ໃນພາກບ່າຍຂອງການດຳເນີນ ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ວັນທີ 18 ພະຈິກ 2024 ໂດຍການເປັນປະທານຂອງ ທ່ານ ໄຊສົມພອນ ພົມວິຫານ ປະທານພາແຫ່ງຊາດ, ບັນດາສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງຕ່າງໆ ໄດ້ສຸມໃສ່ປະກອບຄຳຄິດຄຳເຫັນ ໃສ່ບົດລາຍງານຂອງລັດຖະບານ ໃນຫລາຍບັນຫາສຳຄັນ. ໃນນັ້ນ, ທ່ານ ໄຊຍະເດດ ຜຸຍຍະວົງ ສສຊ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ໄດ້ສະເໜີໃຫ້ລັດຖະບານເພີ່ມທະວີແກ້ໄຂຫລາຍບັນຫາ ເປັນຕົ້ນ ການປົກປັກຮັກສາພື້ນຖານໂຄງລ່າງໂຍທາທິການ ແລະ ຂົນສົ່ງ ຄວນໃຫ້ມີຄວາມຮັດກຸມຕື່ມ ໂດຍສະເພາະ ການຄວບຄຸມນໍ້າໜັກ ຕາມມາດຕະຖານຂອງທາງ, ຕ້ອງໃຫ້ມີລະບົບການຄຽນຖ່າຍ ໃນເວລາລົດຂົນສົ່ງ ຈະລົງຈາກທາງຫລວງທີ່ຮັບນໍ້າໜັກໄດ້ຫລາຍ ໄປຫາທາງນ້ອຍ ທີ່ຮັບນໍ້າໜັກໄດ້ໜ້ອຍ ເຊິ່ງເຮັດໃຫ້ເສັ້ນທາງເປ່ເພ ຢ່າງໜັກໜ່ວງ. ນອກຈາກນັ້ນ, ລົດບັນ ທຸກທີ່ສາມາດລາກແກ່ໄດ້ສູງເກີນນໍ້າໜັກ ກວ່າເສັ້ນທາງຮັບໄດ້ ຄວນຫ້າມແຕ່ຫົວທີ. ທັງນີ້, ແນໃສ່ ຫລີກລ້ຽງ ການຈັດສັນງົບປະມານເຂົ້າໃນການສ້ອມແປງທາງ ແລະ ສ້າງທາງ ຈົນບໍ່ມີເງິນເຫລືອ ໄປພັດ ທະນາຕາໜ່າງການບໍລິການສັງຄົມດ້ານອື່ນ ທີ່ສົງຜົນປະໂຫຍດໂດຍກົງ ຕໍ່ການແກ້ໄຂຄວາມທຸກຍາກ ແລະ ຊີວິດການເປັນຢູ່ຂອງປະຊາຊົນບັນດາເຜົ່າ ຕາມທິດສັງຄົມນິຍົມ ເປັນຕົ້ນ ລະບົບສຶກສາ, ສາທາ ລະນະສຸກ ແລະ ສະຫວັດດີການສັງຄົມ.
ທ່ານ ໄຊຍະເດດ ຜຸຍຍະວົງ ຍັງກ່າວຕື່ມວ່າ: ສຳລັບ ການສ້າງແຜນໂຄງການ ທີ່ຈະເອົາເຂົ້າໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X ຢາກໃຫ້ພາກລັດຖະບານ ເພີ່ມທະວີຄວາມເປັນເຈົ້າການຕື່ມ ເພາະໃນຫລາຍ 10 ປີຜ່ານມາ ການສ້າງແຜນ ແມ່ນອີງໃສ່ຄວາມຕ້ອງການຢາກໄດ້ວຽກຂອງບໍລິສັດເປັນຫລັກ ແລະ ເວລາຈັດຕັ້ງປະຕິບັດການຕິດຕາມກວດກາກໍຂາດຄວາມຮັດກຸມ ເຮັດໃຫ້ໝາກຜົນທີ່ໄດ້ຮັບບໍ່ສູງ. ສ່ວນການສົ່ງເສີມພາກທຸລະກິດ ດ້ວຍເງິນກູ້ດອກເບ້ຍຕໍ່າ ຈາກທະນາຄານແຫ່ງ ສປປ ລາວ ຄວນໃຫ້ມີການຖອດຖອນບົດຮຽນຄືນ ເພາະໃນໄລຍະຜ່ານມາ ມັນກາຍເປັນສອງມາດຕະ ຖານ ທີ່ບໍ່ມີຄວາມຍຸຕິທຳ ໃນການແຂ່ງຂັນທາງດ້ານທຸລະກິດ ແລະ ໃນແຜນ ພັດທະນາ 5 ປີຄັ້ງທີ 10 ສະເໜີໃຫ້ ທະນາຄານ ແຫ່ງ ສປປ ລາວ ຍູ້ແຮງການຄຸ້ມຄອງສະຖຽນລະພາບຂອງເງິນກີບ ໃຫ້ມີຄວາມຮັດກຸມຂຶ້ນ, ຫາກອັດຕາເງິນເຟີ້ບໍ່ສູງ ອັດຕາດອກເບ້ຍກໍຈະຕໍ່າ, ດີແທ້ ອັດຕາເງິນເຟີ້ ບໍ່ໃຫ້ເກີນ 3%, ດອກເບ້ຍທະນາຄານທຸລະກິດ ກໍບໍ່ໃຫ້ເກີນ 6% ຖືວ່າເປັນເງື່ອນໄຂທີ່ເອື້ອອຳນວຍແກ່ການດຳ ເນີນທຸລະກິດ ແລະ ຈະປະກອບສ່ວນຢ່າງຕັ້ງໜ້າ ເຂົ້າໃນການສ້າງເສດຖະກິດເອກະລາດເປັນເຈົ້າຕົນເອງ ຕາມແນວທາງການເມືອງຂອງພັກເຮົາ.
ສຳລັບ ຂົງເຂດວັດຖະນະທຳສັງຄົມ ຕິດພັນກັບການສຶກສາ ຢາກໃຫ້ມີການປະຕິຮູບຄືນໃໝ່ ໃຫ້ແທດເໝາະກັບ ສະພາບການຂະຫຍາຍຕົວ ທາງດ້ານເສດຖະກິດ-ສັງຄົມ ແລະ ພື້ນຖານຊີວິດການເປັນຢູ່ຂອງປະຊາຊົນ ເປັນຕົ້ນ ການຈັດຕາຕະລາງການຮຽນ-ການສອນ ຄວນໃຫ້ອີງໃສ່ຫລັກຈິດຕະວິ ທະຍາ, ອາທິດໜຶ່ງຈະໃຫ້ນັກຮຽນແຕ່ລະລະດັບ ຮຽນຈັກຊົ່ວໂມງ, ກິດຈະກຳກິລາ-ດົນຕີ ຈັກຊົ່ວໂມງ. ສ່ວນໃນເຂດທຸກຍາກ ທຸລະກັນດານ ບາງຄອບຄົວມີຄວາມຕ້ອງການແຮງງານສູງ ຄວນໃຫ້ຮຽນເຄິ່ງວັນ ຮຽນຄາບເຊົ້າ ພັກຄາບແລງ, ຮຽນຄາບແລງ ພັກຄາບເຊົ້າ ເພື່ອບໍ່ໃຫ້ນັກຮຽນຖືກກົດດັນ ຈາກຄອບຄົວໃຫ້ປະລະການຮຽນ, ທັງເປັນການແກ້ໄຂ ບັນຫາການສອນຫ້ອງຄວບ ເພາະວິຖີຊີວິດ ຂອງປະຊາຊົນໃນເຂດຊົນນະບົດ ຍັງຫລຸດໂຕນຈາກຄົນໃນເມືອງຫລາຍ. ສະນັ້ນ, ຄວນຈັດສັນເວລາໃຫ້ເດັກ ເຂົ້າຮໍ່າຮຽນ ໃຫ້ແທດເໝາະຕື່ມ. ພ້ອມນີ້, ຍັງໄດ້ ສະເໜີເພີ່ມງົບປະມານ ເຂົ້າໃນການສະໜອງອຸປະກອນການຮຽນ-ການສອນ ຢູ່ເຂດຊົນນະບົດຫ່າງໄກສອກຫລີກ ເປັນຕົ້ນ ປື້ມອ່ານໃຫ້ນັກຮຽນ ໄດ້ສຶກສາຮໍ່າຮຽນດ້ວຍຕົນເອງໃຫ້ຫລາຍຂຶ້ນ.
