ຕອນບ່າຍ ວັນທີ 13 ພະຈິກ 2024, ຄະນະສະຖາບັນສື່ມວນຊົນ ແລະ ໂຄສະນາ, ສະຖາບັນການເມືອງແຫ່ງຊາດ ໂຮ່ຈິມິ່ງ ສສ.ຫວຽດນາມ ນຳໂດຍທ່ານ ປອ ຫງວຽນດຶກຕ່ວນ ຮອງຫົວໜ້າສະຖາບັນສື່ມວນຊົນ ແລະ ໂຄສະນາ ພ້ອມຄະນະໄດ້ເຂົ້າພົບປະທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫລ່ງຂ່າວ, ວັດທະນະທໍາ ແລະ ທ່ອງທ່ຽວ ພ້ອມຄະນະກົມທີ່ກ່ຽວຂ້ອງເຂົ້າຮ່ວມ ເຊິ່ງທ່ານຮອງລັດຖະມົນຕີໄດ້ຕີລາຄາສູງຕໍ່ການເຄື່ອນໄຫວຢ້ຽມຢາມ ພົບປະປຶກສາຫາລືວຽກງານການຮ່ວມຂອງສອງຝ່າຍ ລະຫວ່າງສະຖາບັນສື່ມວນຊົນ ແລະ ໂຄສະນາ ສສ. ຫວຽດນາມ ແລະ ສະຖາບັນສື່ມວນຊົນ, ວັດທະນະທໍາ ແລະ ທ່ອງທ່ຽວ ຂອງລາວ ແລະ ບັນດາອົງການສື່ມວນຊົນຈໍານວນໜຶ່ງ ພິເສດແມ່ນ ລັດຖະບານ ສສ.ຫວຽດນາມ ຍາມໃດກໍໃຫ້ການຊ່ວຍເຫຼືອກໍ່ສ້າງບຸກຄະລາກອນລາວຫລາຍສົມຄວນ ເພື່ອປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມຂອງ ສປປລາວ, ໃນນັ້ນ ຂົງເຂດຖະແຫລ່ງຂ່າວ-ສື່ມວນຊົນ ກໍໄດ້ຮັບການພັດທະນາຊ່ວຍເຫລືອຈາກເພື່ອນຫວຽດນາມ ເປັນຕົ້ນພື້ນຖານໂຄງລ່າງ, ການຈັດຝືກອົບຮົມໃຫ້ແກ່ພະນັກງານນໍາພາຄຸ້ມຄອງສື່ມວນຊົນລາວ ແລະ ຄະນະບັນນາທິການຈໍານວນຫນຶ່ງ ໃນໄລຍະສັ້ນ. ເຖິງຢ່າງໃດກໍຕາມ, ການພັດທະນາວຽກງານສື່ມວນຊົນຂອງລາວ ຍັງຕ້ອງການອີກຫລາຍໃນການກໍ່ສ້າງບຸກຄະລາກອນໃຫ້ມີຄວາມຮູ້, ຄວາມສາມາດ ສອດຄ່ອງກັບວຽກງານຕົວຈິງ ເປັນຕົ້ນວຽກງານຕອບຕ້ານຂ່າວປອມ, ຂ່າວບິດເບືອນ, ເຕັກນິກວິຊາການຂ່າວດ້ານອື່ນໆ ແລະ ການສ້າງຫລັກສູດຝຶກອົບຮົມໃຫ້ແກ່ສື່ມວນຊົນ ຢູ່ລາວ.
ຕໍ່ກັບຄຳເຫັນດັ່ງກ່າວ ທ່ານ ຮອງຫົວໜ້າສະຖາບັນສື່ມວນຊົນ ແລະ ໂຄສະນາ ສສ. ຫວຽດນາມ ກໍໄດ້ແລກປ່ຽນຄຳຄິດເຫັນໃນວຽກງານການຮ່ວມມືກໍ່ສ້າງບຸກຄະລາກອນລາວ ເປັນຕົ້ນໃນຂົງເຂດສື່ມວນຊົນລາວ ເຊິ່ງທີ່ຜ່ານມາການຝືກອົບຮົມແມ່ນຈັດໄລຍະສອງເດືອນຕໍ່ຄັ້ງຕໍ່ປີ ເຫັນວ່າກໍມີບັນຍາກາດທີ່ດີໃນການແລກປ່ຽນບົດຮຽນນຳຄູອາຈານ ແລະ ເສີມສ້າງຄວາມຮູ້ ຄວາມສາມາດໃຫ້ແກ່ບຸກຄະລາກອນສື່ມວນຊົນລາວ ແຕ່ວ່າບຸກຄະລາກອນກໍຍັງຈໍາກັດ. ສະນັ້ນ, ໃນຕໍ່ຫນ້າເພື່ອເສີມຂະຫຍາຍສາຍພົວພັນຮ່ວມມື ໃນການສືບຕໍ່ກໍ່ສ້າງບູກຄະລາກອນໃຫ້ໄດ້ຫລາກຫລາຍຕື່ມ ອາດຈະຈັດອົບຮົມໄລຍະໜຶ່ງຫາສອງອາທິດ ໂດຍອົບຮົມໃນແຕ່ລະຫົວຂໍ້ສະເພາະໃຫ້ແກ່ຂັ້ນຄະນະບັນນາທິການ, ນັກຂ່າວ, ເຕັກນິກທີ່ກ່ຽວຂ້ອງດ້ານສື່ມວນຊົນ ແລະ ເພື່ອໃຫ້ຈັດໄດ້ຫລາຍຊຸດຮຽນ. ນອກນັ້ນ, ທ່ານຍັງໄດ້ສະເໜີໃຫ້ເອົາເຂົ້າແຜນການຮ່ວມມືໃນຕໍ່ຫນ້າໃຫ້ມີການກໍ່ສ້າງທັງໄລຍະສັ້ນ, ໄລຍະກາງ ແລະ ໄລຍະຍາວ ກໍຄືຮຽນຫລັກສູດປະລິນຍາຕີ, ປະລິນຍາໂທ ແລະ ຄົ້ນຄວ້າປະລິນຍາເອກ ວິຊາຕ່າງໆ ທີ່ກ່ຽວຂ້ອງ ເພື່ອເຮັດໃຫ້ການປະກອບສ່ວນພັດທະນາບຸກຄະລາກອນ ສອດຄ່ອງກັບຄວາມຮຽກຮ້ອງຕ້ອງການໃນການພັດທະນາປະເທດຊາດຕໍ່ໄປ.
