ກອງປະຊຸມໂຕະມົນປະຈໍາປີ 2024 ພາຍໃຕ້ຫົວຂໍ້ “ເພີ່ມທະວີການເປັນຄູ່ຮ່ວມ ເພື່ອສະໜັບສະໜູນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ຂອງ ສປປ ລາວ” ຈັດຂຶ້ນໃນວັນທີ 14 ພະຈິກ 2024 ຢູ່ນະຄອນຫລວງວຽງຈັນ ໂດຍການເປັນປະທານຮ່ວມ ຂອງ ທ່ານ ເພັດ ພົມພິພັກ ລັດຖະມົນຕີ ກະຊວງແຜນການ ແລະ ການລົງທຶນ ແລະ ທ່ານ ບັກໂຮເດຍ ເບີຄະນ໋ອຟ ຜູ້ປະສານງານອົງການ ສປຊ ປະຈຳ ສປປ ລາວ, ມີບັນດາຮອງລັດຖະມົນຕີ, ຮອງເຈົ້າແຂວງ, ຮອງເລຂາທິການ ແລະ ຮອງປະທານກຳມະທິການສະພາແຫ່ງຊາດ, ບັນດາເອກອັກຄະລັດຖະທູດ, ທູຕານຸທູດ, ອົງການຈັດຕັ້ງສາກົນ, ອົງການທີ່ບໍ່ສັງກັດລັດຖະບານ, ອົງການທີ່ບໍ່ວັງຜົນກຳໄລ ແລະ ພາກສ່ວນເອກະຊົນ ເຂົ້າຮ່ວມ.
ໂອກາດດັ່ງກ່າວ, ທ່ານ ເພັດ ພົມພິພັກ ໃຫ້ຮູ້ວ່າ: ການຈັດກອງປະຊຸມໂຕະມົນ ແຕ່ລະຄັ້ງ ແມ່ນມີຄວາມໝາຍຄວາມສໍາຄັນຫລາຍ ຕໍ່ ສປປ ລາວ ເຊິ່ງກອງປະຊຸມ ໃນຄັ້ງນີ້ ຖືເປັນ ໂອກາດດີ ໃຫ້ແກ່ພວກເຮົາ ໄດ້ປຶກສາຫາ ກັນໃນຫລາຍຫົວຂໍ້ທີ່ສໍາຄັນ ເປັນຕົ້ນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 9 ສໍາລັບປີ 2024 ແລະ ທິດທາງແຜນການປີ 2025 ແລະ ຮ່າງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 10 (2026-2030); ຄວາມຄືບໜ້າໃນການກະກຽມຫລຸດພົ້ນອອກຈາກສະຖານະພາບດ້ອຍພັດທະນາ ຂອງ ສປປ ລາວ ແລະ ຜົນການເຂົ້າຮ່ວມກອງປະຊຸມສຸດຍອດວ່າດ້ວຍອະນາຄົດ ທີ່ ສຳນັກງານຂ້າຫລວງໃຫຍ່ ອົງການສະຫະປະຊາຊາດ, ນະຄອນນິວຢອກ ປະເທດສະຫະລັດອາເມລິກາ; ຜົນສໍາເລັດຂອງການປຶກສາຫາລືກຸ່ມສົນທະ ນາທີ 1 ໃນຫົວຂໍ້ທິດທາງໄລຍະສັ້ນ ແລະ ໄລຍະຍາວ ໃນການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ເພື່ອບັນ ລຸເປົ້າໝາຍການພັດທະນາເສດກິດຂອງ ສປປ ລາວ ໃຫ້ມີຄວາມຍືນຍົງ, ສີຂຽວ, ເຊື່ອມໂຍງ-ເຊື່ອມຈອດ ແລະ ມີຄວາມຫລາກຫລາຍທາງດ້ານເສດຖະກິດ; ຜົນສໍາເລັດຂອງການປຶກສາຫາລືກຸ່ມສົນທະນາທີ 2 ໃນຫົວຂໍ້ທິດທາງໄລຍະສັ້ນ ແລະ ໄລຍະຍາວ ໃນການພັດທະນາຊັບພະຍາກອນມະນຸດ ຂອງ ສປປ ລາວ (ການນໍາໃຊ້ທ່າແຮງຂອງປະຊາກອນໜຸ່ມ ໃນການພັດທະນາໃຫ້ມີຄວາມຍືນຍົງ); ການຮ່ວມມືເພື່ອການພັດທະນາ (ຜົນການສໍາຫລວດຮອບວຽນທີ 4 ຂອງການເປັນຄູ່ຮ່ວມ ເພື່ອການຮ່ວມມືເພື່ອການພັດທະນາທີ່ມີປະສິດທິຜົນ ແລະ ຜົນການທົບທວນແຜນດໍາເນີນງານ ຖະແຫລງການວຽງຈັນ ວ່າດ້ວຍການເປັນຄູ່ຮ່ວມ ເພື່ອການພັດທະນາ ທີ່ມີປະສິດທິຜົນ). ເຖິງວ່າ ສປປ ລາວ ຈະຜະເຊີນກັບຄວາມຫຍຸ້ງຍາກປານໃດກໍຕາມ ແຕ່ບັນດາປະເທດເພື່ອນມິດ, ຄູ່ຮ່ວມພັດ ທະນາ ຍັງຮັກສາຄຳໝັ້ນສັນຍາ ທີ່ຈະສືບຕໍ່ສະໜັບສະໜູນຊ່ວຍເຫລືອລັດຖະບານ ສປປ ລາວ ເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແຕ່ລະໄລຍະ ໂດຍລວມແມ່ນມີທ່າອ່ຽງທີ່ດີຂຶ້ນ.
ທ່ານ ບັກໂຮເດຍ ເບີຄະນ໋ອຟ ໄດ້ມີຄໍາເຫັນວ່າ: ເນື່ອງຈາກຄວາມທ້າທາຍຫລາຍຢ່າງທີ່ພວກເຮົາກໍາລັງຜະ ເຊີນຢູ່ໃນປັດຈຸບັນ ຫລາຍກວ່າທີ່ເຄີຍມີມາ, ບັນດາຄູ່ຮ່ວມມືພັດທະນາຂອງ ສປປ ລາວ ຕ້ອງຊອກຫາວິທີການເຮັດວຽກຮ່ວມກັນຢ່າງມີປະສິດທິຜົນກວ່າເກົ່າ ເພື່ອສະໜັບສະໜູນເສັ້ນທາງການພັດທະນາແບບຍືນຍົງ ແລະ ຮອບ ດ້ານ. ຂະບວນການໂຕະມົນນີ້, ຖືເປັນເວທີອັນລໍ້າຄ່າ ເພື່ອຊ່ວຍໃຫ້ພວກເຮົາບັນລຸເປົ້າໝາຍດັ່ງກ່າວ ແລະ ດ້ວຍການປຶກສາຫາລືທີ່ມີແກ່ນສານ ບົນພື້ນຖານການປຶກສາຫາລືບັນດາເນື້ອໃນດ້ານການເງິນເພື່ອການພັດທະນາ, ການຟື້ນຟູ ແລະ ຄວາມຢຶດຢຸ່ນ ແລະ ການກະກຽມໃຫ້ແກ່ການຫລຸດພົ້ນອອກຈາກການ ເປັນປະເທດດ້ອຍພັດທະນາ ໄດ້ສະແດງໃຫ້ເຫັນເຖິງຄວາມໝາຍຄວາມສໍາຄັນຂອງກອງປະຊຸມໃນຄັ້ງນີ້ ທີ່ເປັນເວທີໃຫ້ແກ່ການປຶກສາຫາລື ແລະ ການແລກປ່ຽນເຊິ່ງກັນ ແລະ ກັນ.
ພາຍຫລັງສຳເລັດກອງປະຊຸມດັ່ງກ່າວ, ປະທານກອງປະຊຸມ ພ້ອມດ້ວຍຜູ້ຕາງໜ້າຝ່າຍຄູ່ຮ່ວມພັດທະນາ ຈະນໍາສະເໜີຜົນ ແລະ ເນື້ອໃນຈິດໃຈຂອງກອງປະຊຸມ ເພື່ອລາຍງານຕໍ່ ທ່ານ ນາຍົກລັດຖະມົນຕີ ແຫ່ງ ສປປ ລາວ ເພື່ອເປັນທິດທາງໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຄັ້ງທີ 9 ແລະ ວາລະ 2030 ຢ່າງມີປະສິດທິຜົນ.
