ຂປລ. ກະຊວງປ້ອງກັນປະເທດ ແຫ່ງ ສປປ ລາວ ຮ່ວມກັບສະຖານທູດແຫ່ງ ສ ຣັດເຊຍ ປະຈໍາ ສປປ ລາວ ຈັດພິທີເປີດການກວດກູ້ ແລະ ທໍາລາຍເບີດບໍ່ທັນແຕກເພື່ອມະນຸດສະທໍາ ປະຈໍາປີ 2024-2025 ໃນວັນທີ 10 ພະຈິກ 2024 ທີ່ເມືອງວຽງໄຊ ແຂວງຫົວພັນ ໂດຍການເປັນປະທານຮ່ວມຂອງ ທ່ານ ພົນຕີ ປະສິດ ທ່ຽງທໍາ ຮອງລັດຖະມົນຕີ ກະຊວງປ້ອງກັນປະເທດ ແຫ່ງ ສປປ ລາວ, ແລະ ທ່ານ ເວີລາດິມິຣ ກາລີນິນ ເອກອັກຄະລັດຖະທູດແຫ່ງ ສ ຣັດເຊຍ ປະຈໍາ ສປປ ລາວ, ທ່ານ ພຸດພັນແກ້ວ ວົງໄຊ ຮອງເຈົ້າແຂວງ ແຂວງຫົວພັນ, ຄະນະນໍາ 4 ກົມໃຫຍ່, ມີຜູ້ຕາງໜ້າລັດຖະບານ,ອໍານາດການປົກຄອງເມືອງວຽງໄຊ ແລະ ເມືອງຊໍາເໜືອພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ພັນເອກ ປາດຖະໜາ ບຸດຕິຈັກ ຮອງຫົວໜ້າຫ້ອງການເສນາທິການກອງທັບ, ຫົວໜ້າກອງເສນາການຮ່ວມມືການແກ້ໄຂລະເບີດບໍ່ທັນແຕກ ລາວ-ລັດເຊຍ ໄດ້ລາຍງານແຜນການຮ່ວມມື ປະຈໍາປີ 2024-2025; ຄະນະວິຊາການກອງກວດກູ້ລະເບີດເພື່ອມະນຸດສະທຳກອງທັບປະຊາຊົນລາວຮ່ວມກັບຄະນະວິຊາການສູນກວດກູ້ມິນສາກົນກໍາລັງປະກອບອາວຸດແຫ່ງ ສ ຣັດເຊຍໄດ້ສົມທົບກັບຄະນະວິຊາການຂອງພະແນກແຮງງານແລະ ສະຫວັດດີການສັງຄົມແຂວງຫົວພັນ ລົງສໍາຫລວດ ແລະ ເກັບກຳຂໍ້ມູນໄປຄົ້ນຄວ້າວາງແຜນການກວດກູ້ ແລະ ທໍາລາຍລະເບີດບໍ່ທັນແຕກທີ່ຕົກຄ້າງຢູ່ເມືອງວຽງໄຊ ແລະ ເມືອງຊຳເໜືອ ແຂວງຫົວພັນ. ເມືອງວຽງໄຊ ມີ 5 ພື້ນທີ່ ລວມເນື້ອທີ່ 21,52 ເຮັກຕາ ຄື: ພື້ນທີ່ທີ 1: ເປັນດິນທໍາການຜະລິດຢູ່ຂອບເຂດບ້ານນາໄກ່ ມີເນື້ອທີ່ 5,05 ເຮັກຕາ; ທີ 2 ເປັນພື້ນທີ່ປຸກສ້າງສຳນັກງານຫອ້ງວ່າການປົກຄອງ ແລະ ອົງການໄອຍະການ ເມືອງວຽງໄຊ ຢູ່ບ້ານນາໄກ່ ມີເນື້ອທີ່ 12,4 ເຮັກຕາ; ທີ 3 ເປັນພື້ນທີ່ຈະສ້າງສະໜາມກິລາຂອງເມືອງວຽງໄຊ ຢູ່ບ້ານວຽງໄຊ ມີເນື້ອທີ່ 1,5 ເຮັກຕາ; ທີ 4 ເປັນພື້ນທີ່ຂະຫຍາຍສໍານັກງານ-ອົງການຂອງ ເມືອງວຽງໄຊ ມີເນື້ອທີ່ 1,81 ເຮັກຕາ ແລະ ພື້ນທີ່ທີ 5 ເດີນໂຮງຮຽນມັດທະຍົມສົມບູນວຽງໄຊ ມີເນື້ອທີ່ປະມານ 1 ເຮັກຕາກວ່າ. ເມືອງຊຳເໜືອ ເຊິ່ງມີ 5 ພື້ນທີ່ ລວມເນື້ອທີ່: 51 ເຮັກຕາກວ່າ ຄື: ພື້ນທີ່ທີ 1 ເປັນດິນຈະສ້າງສຳນັກງານອົງການໄອຍະການແຂວງ ຢູ່ຂອບເຂດບ້ານຊຳເໜືອ ມີເນື້ອທີ່ 0,53 ເຮັກຕາ; ທີ 2 ເປັນພື້ນທີ່ປຸກສ້າງສຳນັກງານພະແນກກະສິກຳແຂວງຫົວພັນ ຢູ່ບ້ານນາລິວ ມີເນື້ອທີ່ 1,2 ເຮັກຕາ; ທີ 3 ເປັນພື້ນທີ່ຈະສ້າງສະໜາມຖິ້ມຂີ້ເຫຍື້ອຂອງເທສະບານເມືອງຊຳເໜືອ ຢູ່ບ້ານປ່າຈ້າ ມີເນື້ອທີ່ 28,92 ເຮັກຕາ; ທີ 4 ເປັນພື້ນທີ່ຂະຫຍາຍສຳນັກງານ-ອົງການຂອງແຂວງຫົວພັນ ຢູ່ບ້ານມີສຸກ ມີເນື້ອທີ່ 0,65 ເຮັກຕາ ແລະ ພື້ນທີ່ທີ 5: ເປັນພື້ນທີທຳການຜະລິດກະສິກຳຂອງເມືອງຊຳເໜືອ ຢູ່ເຂດໜອງຜັກຕົບ ມີເນື້ອທີ່ປະມານ 19,7 ເຮັກຕາ. ມາຮອດປັດຈຸບັນກຳລັງກອງກວດກູ້ລະເບີດເພື່ອມະນຸດສະທຳກອງທັບປະຊາຊົນລາວໄດ້ຖາງປ່າອານາໄມ ແລະ ປັກໝາຍຂອບເຂດສະໜາມກວດກູ້ສໍາເລັດໃນ 2 ສະໜາມຢູ່ເມືອງວຽງໄຊ ລວມເນື້ອທີ່ 14,67 ເຮັກຕາ ເພື່ອກະກຽມ ໃຫ້ການຮວ່ມມືກວດກູ້ລະເບີດເຊິງຈະເລີ່ມແຕ່ວັນທີ 11 ພະຈິກ 2024 ເປັນຕົ້ນໄປ.
ຈາກນັ້ນ, ທ່ານ ສີວົງໄຊ ສຸລິວົງພັນ ຮັກສາການເຈົ້າເມືອງ ເມືອງວຽງໄຊ ໄດ້ກ່າວມອບດິນ(ຊົ່ວຄາວ) ໃຫ້ກະຊວງປ້ອງກັນປະເທດ ແຫ່ງ ສປປ ລາວ ເພື່ອປະຕິບັດວຽກງານເກັບກູ້ລະເບີດບໍ່ທັນແຕກ, ມອບຕອນດິນ ຈຳນວນ 5 ຕອນ ໃຫ້ຄະນະຮັບຜິດຊອບວຽກງານຮອບດ້ານໃນການສຳຫລວດ ແລະ ເກັບກຳຂໍ້ມູນລະເບີດບໍ່ທັນແຕກ ທີ່ຖືກແຕ່ງຕັ້ງຈາກກະຊວງປ້ອງກັນປະເທດ ແຫ່ງ ສປປ ລາວ ສົມ ທົບກັບຄະນະຮັບຜິດຊອບການກວດກູ້ມິນສາກົນຂອງກໍາລັງປະກອບອາວຸດ ແຫ່ງ ສ ຣັດເຊຍ ເພື່ອຮ່ວມມືກັນໃນການກວດກູ້ລະເບີດບໍ່ທັນແຕກ ໃຫ້ສຳເລັດຕາມໃນເນື້ອທີ່ທັງໝົດ 21,52 ເຮັກຕາ.
ທ່ານ ພົນຕີ ປະສິດ ທ່ຽງທໍາ ໄດ້ກ່າວວ່າ: ໃນຊຸມປີຜ່ານມາ, ພັກ-ລັດຖະບານລາວ ໄດ້ເອົາໃຈໃສ່ແກ້ໄຂບັນຫາ ລະເບີດບໍ່ທັນແຕກ ໂດຍຈັດເຂົ້າໃນເປົ້າໝາຍ ສະຫັດສະວັດຂອງການພັດທະນາ ໂດຍຖືເອົາການໂຄສະນາສຶກສາໃຫ້ພົນລະເມືອງລາວ ຮັບຮູ້ເຖິງຄວາມອັນຕະລາຍຂອງລະເບີດບໍ່ທັນແຕກທີ່ຕົກຄ້າງ, ດໍາເນີນການກວດກູ້ ແລະ ທໍາລາຍລະເບີດບໍ່ທັນແຕກ, ປົດປ່ອຍພື້ນທີ່ໃຫ້ປະຊາຊົນໄດ້ທຳການຜະລິດ ແລະ ດຳລົງຊີວິດຢ່າງປອດໄພ ແລະ ຊ່ວຍເຫລືອຜູ້ຖືກເຄາະຮ້າຍ, ປັບປຸງລະບົບຄຸ້ມຄອງຂໍ້ມູນຂ່າວສານ, ຄົ້ນຄ້ວາ – ພິຈາລະນາຮັບ ເອົາໂຄງການຊ່ວຍເຫລືອຈາກເພື່ອນມິດ ແລະ ສາກົນ. ໃນນີ້, ກະຊວງປ້ອງກັນປະເທດ ສປປ ລາວ ໄດ້ເປັນເຈົ້າການຮ່ວມມືກັບ ກະຊວງປ້ອງກັນປະເທດ ແຫ່ງ ສ ຣັດເຊຍ ແກ້ໄຂບັນຫາລະເບີດບໍ່ທັນແຕກ ໄລຍະ 6 ປີ ທີ່ຜ່ານມາຄື: ຢູ່ເມືອງຄຳເກີດ, ແຂວງບໍລິຄໍາໄຊ ໃນສົກ 2018-2019, ຢູ່ເມືອງແປກ ແຂວງຊຽງຂວາງ ສົກ 2019-2020 ແລະ 2020-2021, ຢູ່ເມືອງນາກາຍແຂວງຄໍາມ່ວນ, ສົກ 2021-2022 ແລະ ສົກປີ 2022-2023, ຢູ່ເມືອງກາສີ ແຂວງວຽງຈັນ ສົກປີ 2023-2024, ເຊິ່ງ ສາມາດປົດປ່ອຍພື້ນທີ່ດິນ ອອກຈາກບັນຫາລະເບີດບໍ່ທັນແຕກໄດ້ 194,04 ເຮັກຕາ, ທໍາລາຍລະເບີດອອກຈາກຝືນແຜ່ນດິນລາວໄດ້ 3.548 ໜ່ວຍ. ພ້ອມກັນນັ້ນ, ສູນກວດກູ້ມິນສາກົນ ແຫ່ງ ສ ຣັດເຊຍ ໄດ້ສົ່ງຄູມາຝຶກອົບຮົມດ້ານການແກ້ໄຂລະເບີດບໍ່ທັນແຕກ ເພື່ອມະນຸດສະທຳ ໃຫ້ພະນັກງານ, ນັກຮົບ ກອງທັບປະຊາຊົນລາວ ໄດ້ 146 ທ່ານ. ຜ່ານການປະຕິບັດແຜນການຮ່ວມມືລະຫວ່າງ ສອງກະຊວງປ້ອງກັນປະເທດ ລາວ-ຣັດເຊຍ ເຫັນວ່າ ປະສົບຜົນສໍາເລັດດີ ແລະ ໄດ້ນໍາເອົາຜົນປະໂຫຍດ ມາໃຫ້ປະເທດຊາດ ແລະ ປະຊາຊົນລາວ ຢ່າງໜ້າພາກພູມໃຈ. ສະນັ້ນ, ໃນສົກ 2024-2025 ນີ້ ສອງກໍາລັງພວກເຮົາຈຶ່ງໄດ້ຮັບອະນຸມັດຈາກ ລັດຖະບານ ຂອງສອງປະເທດລາວ ແລະ ຣັດເຊຍ ມາສືບຕໍ່ກວດກູ້ ແລະ ທຳລາຍລະເບີດບໍ່ທັນແຕກຕົກຄ້າງ ຢູ່ເມືອງວຽງໄຊ ແລະ ເມືອງຊໍາເໜືອ ແຂວງຫົວພັນ ເພື່ອປະກອບສ່ວນແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ, ປົດປ່ອຍເນື້ອທີ່ທຳການຜະລິດໃຫ້ປະຊາຊົນບັນດາເຜົ່າ, ເພື່ອເຮັດໃຫ້ການດຳລົງຊີວິດຂອງປະຊາຊົນ ປາສະຈາກຄວາມອັນຕະລາຍຈາກລູກລະເບີດບໍ່ທັນແຕກຕົກຄ້າງ, ຄຽງຄູ່ກັນນັ້ນ ຍັງເປັນການປະກອບສ່ວນສໍາຄັນ ເຂົ້າໃນການຈັດຕັ້ງປະຕິບັດ ເປົ້າໝາຍສະຫັດສະວັດແຫ່ງການພັດທະນາຂອງລັດຖະບານ ແນ່ໃສ່ລົບລ້າງຄວາມທຸກຍາກຂອງປະຊາຊົນບັນດາເຜົ່າ ໃຫ້ໄດ້ໃນປີ 2030.
ຂ່າວ-ພາບ: ຂັນໄຊ
