ໃນຕອນເຊົ້າວັນທີ 7 ພະຈິກ 2024, ທີ່ ນະຄອນຄຸນໝິງ, ສປ ຈີນ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະເຂົ້າຮ່ວມກອງປະຊຸມສຸດຍອດອະນຸພາກພື້ນແມ່ນ້ຳຂອງ (GMS) ຄັ້ງທີ 8, ພາຍໃຕ້ຄໍາຂວັນ: “ກ້າວສູ່ປະຊາຄົມທີ່ດີຂຶ້ນ ໂດຍຜ່ານການພັດທະນາທີ່ຂັບເຄື່ອນດ້ວຍນະວັດຕະກໍາ” ພາຍໃຕ້ການເປັນປະທານຂອງ ທ່ານ ຫລີ ສຽງ ນາຍົກລັດຖະມົນຕີ ແຫ່ງ ສປ ຈີນ ໂດຍມີການນໍາຂັ້ນສູງຈາກປະເທດສະມາຊິກອະນຸພາກພື້ນແມ່ນໍ້າຂອງ (ກໍາປູເຈຍ, ລາວ, ມຽນມາ, ໄທ ແລະ ຫວຽດນາມ) ລວມທັງ ປະທານທະນາຄານພັດທະນາອາຊີ (ADB) ໄດ້ເຂົ້າຮ່ວມໃນກອງປະຊຸມຄັ້ງນີ້.
ກອງປະຊຸມສຸດຍອດຄັ້ງນີ້, ໄດ້ແບ່ງອອກເປັນ 2 ພາກ ຄື: ກອງປະຊຸມວົງແຄບ (Retreat Session) ແລະ ກອງປະຊຸມຄົບຄະນະ (Plenary Session) ໂດຍມີເປົ້າໝາຍເພື່ອເສີມຂະຫຍາຍສາຍພົວພັນມິດຕະພາບ, ຮັດແໜ້ນ ແລະ ຜັນຂະຫຍາຍການຮ່ວມມືທາງດ້ານເສດຖະກິດໃນຂົງເຂດອະນຸພາກພື້ນແມ່ນໍ້າຂອງ ແລະ ກໍານົດທິດທາງແຜນວຽກການພັດທະນາຂອງອະນຸພາກພື້ນແມ່ນໍ້າຂອງ ໃຫ້ມີຄວາມແທດເໝາະ ແລະ ຕອບສະໜອງໄດ້ຄວາມຕ້ອງ ການໃນການພັດທະນາ ແລະ ການເຊື່ອມໂຍງທາງດ້ານເສດຖະກິດ-ສັງຄົມ ຂອງບັນດາປະເທດສາມາຊິກອະນຸພາກພື້ນແມ່ນ້ຳຂອງ ໂດຍໄດ້ສຸມໃສ່ການສ້າງ ແລະ ນຳໃຊ້ນະວັດຕະກຳ ເພື່ອຮັບປະກັນທາງດ້ານການພັດທະນາເສດຖະກິດ-ສັງຄົມ ໃຫ້ສາມາດເຊື່ອມໂຍງ ແລະ ທຽບທັນກັບພາກພື້ນອື່ນໆຢູ່ໃນໂລກ.
ກ່ອນກອງປະຊຸມສຸດຍອດອະນຸພາກພື້ນແມ່ນ້ຳຂອງ ຄັ້ງທີ 8 ຍັງໄດ້ມີການດຳເນີນບັນດາກອງປະຊຸມປິ່ນອ້ອມທີ່ສຳຄັນຄື: ກອງປະຊຸມເຈົ້າແຂວງເພື່ອປຶກສາຫາລືກ່ຽວກັບການພັດທະນາ ແລວທາງເສດຖະກິດອະນຸ ພາກພື້ນແມ່ນໍ້າຂອງ; ກອງປະຊຸມເຈົ້າໜ້າທີ່ອາວຸໂສອະນຸພາກພື້ນແມ່ນນ້ຳຂອງ ເພື່ອປຶກສາຫາລືກ່ຽວກັບບັນດາແຜນວຽກ ແລະ ການຈັດຕັ້ງປະຕິບັດບັນດາຍຸດທະສາດຕ່າງໆໃນຂອບການຮ່ວມມືທາງດ້ານເສດຖະກິດໃນຂົງເຂດພາກພື້ນ ແລະ ສາກົນ ແລະ ຄົ້ນຄວ້າເອກະສານເພື່ອນຳສະເໜີໃຫ້ກອງປະຊຸມສຸດຍອດໃນຄັ້ງນີ້ຮັບຮອງເອົາ ແລະ ກອງປະຊຸມຄູ່ຮ່ວມພັດທະນາອະນຸພາກພື້ນແມ່ນນ້ຳຂອງ ເຊິ່ງເສີມສ້າງ ແລະ ຍົກສູງການມີສ່ວນຮ່ວມຂອງບັນດາຄູ່ຮ່ວມພັດທະນາ ແລະ ຄູ່ຮ່ວມຍຸດທະສາດຂອງ ຂົງເຂດອະນຸພາກພື້ນແມ່ນ້ຳຂອງ ສົ່ງເສີມການຮ່ວມມື ແລະ ດຶງດູດການລົງທຶນຂອງຄູ່ຮ່ວມພັດທະນາ ເຂົ້າໃນຂົງເຂດເສດຖະກິດ ແລະ ສັງຄົມ ໃຫ້ໄດ້ຮັບໝາກຜົນຍິ່ງຂຶ້ນ. ອັນສຳຄັນ, ກອງປະຊຸມຄັ້ງນີ້ ໄດ້ຮັບຮອງເອົາ 2 ເອກະສານສໍາຄັນ ຄື: ຖະແຫລງການຮ່ວມ ກອງປະຊຸມສຸດຍອດອະນຸພາກພື້ນແມ່ນໍ້າຂອງ ຄັ້ງທີ 8 ແລະ ຍຸດທະສາດນະວັດຕະກໍາເພື່ອການພັດທະນາ ຮອດປີ 2030.
