ຄະນະຝຶກອົບຮົມສື່ມວນຊົນລາວ ຢ້ຽມຢາມ ໜັງສືພິມບັກນິງ ເພື່ອແລກປ່ຽນບົດຮຽນ ກ່ຽວກັບວຽກງານການບໍລິຫານຄຸ້ມຄອງສື່ມວນຊົນ ໃນໄລຍະໃໝ່ ໃນວັນທີ 6 ພະຈິກ 2024 ທີ່ແຂວງບັກນິງ, ສສ ຫວຽດນາມ ໂດຍການຕ້ອນຮັບຂອງທ່ານ ລີ ຊວນ ເລີຍ ຮອງເຈົ້າແຂວງໆບັກນິງ, ມີທ່ານ ນາງ ຫງວຽນ ທິ ເຈືອງ ຢາງ ຮອງຫົວໜ້າສະຖາບັນສື່ມວນຊົນ ແລະ ໂຄສະນາ ຫວຽດນາມ ພ້ອມດ້ວຍຄະນະນຳໜັງສືພິມບັກນິງເຂົ້າຮ່ວມ.
ທ່ານ ລີ ຊວນ ເລີຍ ໄດ້ລາຍງານສະພາບການພັດທະນາເສດຖະກິດ-ສັງຄົມຂອງແຂວງບັກນິງ ໃນໄລຍະຜ່ານມາ ໂດຍໄດ້ຍົກໃຫ້ເຫັນເຖິງທີ່ຕັ້ງ ແລະຈຸດພິເສດຂອງແຂວງ, ຊຶ່ງເປັນແຂວງທີ່ມີເນື້ອທີ່ນ້ອຍທີ່ສຸດໃນບັນດາແຂວງຂອງປະເທດຫວຽດນາມ ມີປະຊາກອນ 1,5 ລ້ານຄົນ, ໃນ 9 ເດືອນຕົ້ນປີ 2024 ລວມຍອດຜະລິດຕະພັນພາຍໃນແຂວງ ເພີ່ມຂຶ້ນ 5,52% ແລະ ດັດຊະນີການຜະລິດອຸດສາຫະກຳ ເພີ່ມຂຶ້ນ 7,5% ທຽບໃສ່ໄລຍະດຽວກັນຂອງປີ 2023, ລວມຍອດການທຶນຈາກຕ່າງປະເທດ ທີ່ໄດ້ຈົດທະບຽນບັນລຸ 4,2 ຕື້ກວ່າໂດລາສະຫະລັດ, ເພີ່ມຂຶ້ນ 3,3 ເທົ່າ ທຽບໃສ່ໃນໄລຍະດຽວກັນໃນປີ 2023, ການດຶງດູດການລົງທຶນຈາກຕ່າງປະເທດ ມາຮອດປັດຈຸບັນ, ແຂວງບັກນິງ ໄດ້ອະນຸມັດ 2.400 ໂຄງການ ໂດຍມີມູນຄ່າການລົງທຶນ 29,3 ຕື້ໂດລາສະຫະລັດ ທີ່ມາຈາກ 41 ປະເທດ.
ສຳລັບວຽກງານສື່ມວນຊົນ ປັດຈຸບັນ, ໜັງສືພິມ ບັກນິງ ມີຜະລິດຕະພັນຕົ້ນຕໍ ແລະ ພິມຈຳໜ່າຍຄື: ລາຍວັນ, ລາຍອາທິດ, ລາຍເດືອນ ແລະ ໜັງສືພິມເອເລັກໂຕຣນິກ, ຊຶ່ງພິມປະມານ 19.000 ສະບັບຕໍ່ມື້ ແລະ ເປັນໜຶ່ງໃນບັນດາໜັງສືພິມຂອງພັກທ້ອງຖິ່ນທີ່ມີຈຳນວນພິມຫລາຍທີ່ສຸດໃນທົ່ວປະເທດ. ໃນສະພາບປັດຈຸບັນ ໜັງສືພິມ ບັກນິງ ໄດ້ຫັນໄປສູ່ສື່ແບບໃໝ່ທີ່ຫລາກຫລາຍຊ່ອງທາງໃນການໂຄສະນາເຜີຍແຜ່ ຂໍ້ມູນ ແລະ ຂ່າວຕ່າງໆ ເປັນຕົ້ນ ເວັບໄຊ, ເຟສບຸກ ແລະ ຢູທູບ ຊຶ່ງໄດ້ດຶງດູດຜູ້ລົງທະບຽນ ແລະ ຕິດຕາມຊ່ອງດັ່ງກ່າວເປັນຈຳນວນຫລວງຫລາຍ. ເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານທີ່ໄດ້ຮັບມອບໝາຍ, ຄະນະນຳໜັງສືພິມ ບັກນິງ ໄດ້ເອົາໃຈໃສ່ນຳພາ-ຊີ້ນຳການເມືອງແນວຄິດໃຫ້ພະນັກງານ-ນັກຂ່າວ ໃນຄວາມຮັບຜິດຊອບຂອງຕົນ ໂດຍການຝຶກອົບຮົມ, ຍົກລະດັບດ້ານການເມືອງ ແລະ ວິຊາສະເພາະ ໃຫ້ມີຄຸນສົມບັດການເມືອງໜັກແໜ້ນ, ມີຄວາມສາມາດ, ມີຄວາມຮັບຜິດຊອບ ແລະ ມີຈັນຍາບັນດ້ານວິຊາຊີບ ພ້ອມທັງ ເຮັດວຽກງານໂຄສະນາເຜີຍແຜ່ນະໂຍບາຍ ແລະ ມະຕິຕ່າງໆຂອງພັກ-ລັດໃຫ້ສັງຄົມໄດ້ຮັບຮູ້ ແລະ ທົ່ວເຖິງ.
ໂອກາດດຽວກັນນີ້, ທ່ານ ໂອລຳ ຈັນທະວິໄລ ຫົວໜ້າພະແນກບໍລິຫານ, ວິທະຍຸກະຈາຍສຽງແຫ່ງຊາດລາວ ຕາງໜ້າຄະນະຝຶກອົບຮົມສື່ມວນຊົນລາວ ໄດ້ກ່າວສະແດງຄວາມຂອບໃຈຕໍ່ ການຕ້ອນຮັບຂອງຄະນະນຳແຂວງບັກນິງໃນຄັ້ງນີ້, ຊຶ່ງການຢ້ຽມຢາມຄັ້ງນີ້ ກໍເພື່ອແລກປ່ຽນປະສົບການດ້ານການບໍລິຫານຄຸ້ມຄອງ ແລະ ໂຄສະນາເຜີຍແຜ່ວຽກງານສື່ມວນຊົນ ໂດຍສະເພາະດ້ານການປະດິດສ້າງທາງດ້ານເຕັກໂນໂລຢີ ແລະ ການຫັນເປັນທັນສະໄໝຂຶງສື່ມວນຊົນ ຢູ່ແຂວງບັກນິງ ພ້ອມທັງເປັນປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານ ລະຫວ່າງສອງຊາດລາວ-ຫວຽດນາມ, ຫວຽດນາມ-ລາວ ໃຫ້ໝັ້ນຄົງຂະນົງແກ່ນຕະຫລອດໄປ.
ໃນມື້ດຽວກັນ, ຄະນະດັ່ງກ່າວຍັງໄດ້ໄປຢ້ຽມຊົມສະຖານທີ່ ທີ່ສຳຄັນ ຂອງແຂວງບັກນິງ ເປັນຕົ້ນ ຫໍພິພິທະພັນຮູບແຕ້ມພື້ນເມືອງດົງໂຮ່ ແລະ ວັດບຸດທາບ, ຊຶ່ງເປັນວັດທີ່ເກົ່າແກ່ ເປັນປູຊະນີຍະສະຖານມີສະຖາປັດຕະຍະກຳທີ່ເປັນເອກະລັກສະເພາະ ໂດຍການຕົກແຕ່ງດ້ວຍວັດສະດຸທີ່ເປັນໄມ້ ແລະ ຫີນທີ່ແກະສະຫລັກມີລວດລາຍທີ່ສວຍງາມ ແລະ ເປັນເອກະລັກ.
