ງານວາງສະແດງສິລະປະຮ່ວມສະໄໝລາວ ພາຍໃຕ້ຫົວຂໍ້ “ຄວາມຫວັງ” ຄັ້ງທໍາອິດ (LCAE) ຈັດຂຶ້ນໃນວັນທີ 31 ຕຸລາ 2024 ນີ້, ຢູ່ນະຄອນຫລວງວຽງຈັນ (ນວ) ໂດຍໄດ້ເຕົ້າໂຮມເອົາສິລະປະຍຸກສະໄໝ ແລະ ກຸ່ມເດັກພິເສດຢູ່ລາວ ແນໃສ່ລົງເລິກຄົ້ນຄວ້າຂົງເຂດຂອງສັງຄົມ, ວັດທະນະທໍາ ແລະ ຄວາມຫວັງ ຜ່ານຮູບແບບສິລະປະ ທີ່ຫລາກຫລາຍສີສັນ ແລະ ຫລາຍມີຕິ ເຊິ່ງງານວາງສະແດງ ດັ່ງກ່າວ, ຈະໄດ້ຈັດຂຶ້ນຈົນຮອດວັນທີ 10 ພະຈິກ 2024 ໂດຍໄດ້ນຳເອົາ ຮູບແຕ້ມ, ຮູບຖ່າຍ, ວິດີໂອ, ປະຕິມາກຳ, ສິລະປະການຕິດຕັ້ງ ແລະ ສິລະປະພາບ-ສຽງ ມາວາງສະແດງ ເຊິ່ງສະແດງໃຫ້ເຫັນເຖິງຄວາມຫລາກຫລາຍ ແລະ ຄວາມເປັນໄປໄດ້ ທີ່ບໍ່ມີຂອບເຂດຂອງສິລະປະຮ່ວມສະໄໝລາວ.
ໂອກາດດັ່ງກ່າວ, ທ່ານ ຫົວ ໄອ້ຫລຸນ (LIU AILUN) ຜູ້ລິເລີ່ມ ແລະ ຜູ້ອອກແບບ LCAE ກ່າວວ່າ: ງານວາງສະແດງ ໃນຄັ້ງນີ້, ຈະເຮັດໃຫ້ຜູ້ເຂົ້າຊົມ ໄດ້ຮັບຮູ້ເຖິງຄວາມອົບອຸ່ນ ແລະ ພະລັງງານຂອງສິລະປະຮ່ວມສະໄໝ, ທັງເປັນເວທີສົ່ງເສີມການພັດທະນາສີລະປະຮ່ວມສະໄໝລາວ ແລະ ການແລກປ່ຽນວັດທະນະທໍາ ກັບສາກົນ. ໃນອະນາຄົດ, ງານວາງສະແດງຮູບແບບນີ້, ຈະນໍາສະເໜີຜົນງານ ຂອງນັກສິລະປະລາວ ໄປສູ່ຜູ້ຊົມສາກົນ ໃນວົງກວ້າງຂຶ້ນ ໂດຍຜ່ານງານວາງສະແດງ ແລະ ໂຄງການສິລະປະ, ສ້າງຂົວຕໍ່ລະຫວ່າງສິລະປະ ແລະ ສັງຄົມ, ສົ່ງເສີມນະວັດຕະກຳ ທາງດ້ານວັດທະນະທໍາ. ງານວາງສະແດງຄັ້ງນີ້, ບໍ່ພຽງແຕ່ແມ່ນການສະແດງສິລະປະຮ່ວມສະໄໝລາວ ທີ່ສໍາຄັນເທົ່ານັ້ນ, ຫາກຍັງແມ່ນເວທີການສົນທະນາຢ່າງເລິກເຊິ່ງລະຫວ່າງສັງຄົມ ແລະ ວັດທະນະທໍາ.
ສຳລັບ ທຶນທີ່ໄດ້ຈາກງານວາງສະແດງຄັ້ງນີ້, ຈະນໍາໃຊ້ເຂົ້າໃນວຽກງານການກຸສົນຂອງເດັກພິເສດໃນລາວ, ສະແດງໃຫ້ເຫັນເຖິງບົດບາດອັນສໍາຄັນທາງດ້ານສິລະປະ ໃນການສົ່ງເສີມຄວາມກ້າວໜ້າ ຂອງສັງຄົມໄດ້ເທື່ອລະກ້າວ.
ງານວາງສະແດງຄັ້ງນີ້, ຮ່ວມກັນຈັດຂຶ້ນໂດຍ HOPE VISION LAOS ແລະ Lines Studio by Lab De Lines ໂດຍໄດ້ຮັບການສະໜັບສະໜູນ ຈາກ NAGA MALL, ບໍລິສັດ ຕ່າຂ່າຍໄຟຟ້າພາກໃຕ້ ຈີນແມ່ນໍ້າຂອງ-ແມ່ນໍ້າລ້ານຊ້າງສາກົນຈຳກັດ, CRRC Qingdao Sifang Co., Ltd, Khounta Sign, Sky- surfing Commercial Travel Agent., Ltd ແລະ ຄູ່ຮ່ວມພັດທະນາ ແລະ ສິລະປະຂອງ Swiss Cooperation Mekong. The Art House Café ແລະ CineArt Film.
ຂ່າວ-ພາບ: ທະນູທອງ
