ຂປລ. ແຫລ່ງຂ່າວຈສກ ແຂວງຈໍາປາສັກ ໃຫ້ຮູ້ວ່າ: ວັນທີ 22 ກັນຍາ 2024, ທ່ານ ອາລຸນໄຊ ສຸນນະລາດ ເຈົ້າແຂວງຈໍາປາສັກ ພ້ອມດ້ວຍການນໍາແຂວງ, ການນໍາພະແນກການອ້ອມຂ້າງ, ກໍາລັງ ປກສ-ປກຊ ຕະຫລອດຮອດພໍ່ແມ່ ປະຊາຊົນ ໄດ້ຮ່ວມແຮງຮ່ວມໃຈກັນ ສ້າງຄັນຄູກັນນໍ້າ ເນື່ອງຈາກລະດັບນໍ້າຂອງ ແລະ ລະດັບນໍ້າເຊໂດນໄດ້ເພີ່ມຂຶ້ນສູງ, ພ້ອມທັງເອົາຈັກສູບນໍ້າເຄື່ອນທີ່ ມາຕິດຕັ້ງຕື່ມ ຢູ່ເຂດຫ້ວຍບ້ານແກ ເພື່ອສູບລະບາຍນໍ້າທີ່ຖ້ວມຂັງຢູ່ໃນບໍລິເວນດັ່ງກ່າວ ໃຫ້ອອກໄດ້ໄວຂຶ້ນຕື່ມ.
ພ້ອມນີ້, ເຈົ້າແຂວງຈໍາປາສັກ ພ້ອມຄະນະ ກໍໄດ້ຕິດຕາມພື້ນທີ່ອື່ນໆ ທີ່ມີຄວາມສ່ຽງ ເປັນຕົ້ນແມ່ນ ເຂດບ້ານຫ້ວຍປູນ, ບ້ານທ່າຫີນເໜືອ ເພື່ອວາງແຜນແກ້ໄຂ ຮັບມືກັບໄພນໍ້່ຖ້ວມໃຫ້ທັນການ.
ຂໍ້ມູນ-ພາບ: ໜັງສືພິມຈຳປາໃໝ່
