ເພື່ອສ້າງຂະບວນການ ສະເຫຼີມສະຫຼອງວັນສື່ມວນຊົນ ແລະ ການພິມຈໍາໜ່າຍ ຄົບຮອບ 74 ປີ (13 ສິງຫາ 1950-13 ສິງຫາ 2024) ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດເວທີເສວະນາ ພາຍໃຕ້ຫົວຂໍ້ “ສຳມະນາວິທະຍາສາດຕ້ານຂ່າວປອມໃນສື່ສັງຄົມອອນລາຍ ແລະ ບົດບາດຂອງສື່ທີ່ເປັນທາງການໃນການຕ້ານຂ່າວປອມ” ຂຶ້ນໃນວັນທີ 8 ສິງຫານີ້ ທີ່ກະຊວງ ຖວທ ໂດຍການເປັນປະທານຂອງທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ, ມີບັນດາຫົວໜ້າກົມ, ຫົວໜ້າອົງການສື່ມວນຊົນ, ສື່ມວນຊົນທີ່ກ່ຽວຂ້ອງເຂົ້າຮ່ວມ. ເພື່ອສ້າງຄວາມຮັບຮູ້ ແລະ ແລກປ່ຽນບົດຮຽນຊຶ່ງກັນ ແລະ ກັນໃນຂົງ ເຂດວຽກງານຖະແຫຼງຂ່າວ-ສື່ມວນຊົນ, ສ້າງຄວາມເຂັ້ມແຂງໃຫ້ແກ່ພະນັກງານ, ນັກຮົບສື່ມວນຊົນ.
ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ ກ່າວວ່າ: ຂ່າວປອມໝາຍເຖິງຂໍ້ມູນທີ່ບໍ່ເປັນ ຄວາມຈິງ ຫຼື ບິດເບືອນທີ່ເຜີຍແຜ່ອອກໄປເຮັດໃຫ້ຜູ້ຮັບຊົມ-ຮັບຟັງ ເຊື່ອວ່າເປັນຄວາມຈິງ ຊຶ່ງອາດຈະມີຈຸດປະສົງເພື່ອທໍາລາຍຊື່ສຽງ, ສ້າງຄວາມຢ້ານກົວ ຫຼື ປ່ຽນຄວາມຄິດເຫັນຂອງສັງຄົມ ຊຶ່ງຂ່າວປອມມີຫຼາຍຮູບແບບເຊັ່ນ: ຂ່າວທີ່ສ້າງຂຶ້ນໂດຍບໍ່ມີພື້ນຖານຄວາມຈິງ, ຂ່າວທີ່ເຂົ້າໃຈຜິດທີ່ປະກອບດ້ວຍຂໍ້ມູນທີ່ແທ້ຈິງບາງຢ່າງ ແຕ່ຖືກນໍາສະເໜີໃນທາງທີ່ເຂົ້າໃຈຜິດ, ຂ່າວສຽດສີ ຂ່າວທີ່ໃຊ້ການສຽດສີ ແລະ ຕະຫຼົກເພື່ອວິພາກວິຈານ ສະທ້ອນເຖິງບັນຫາໃດໜຶ່ງ ບາງຄັ້ງສາມາດເຂົ້າໃຈຜິດເປັນຂ່າວທີ່ແທ້ຈິງ, ຂ່າວທີ່ມີເນື້ອໃນປະສົມປະກອບດ້ວຍການປະສົມຂອງຂໍ້ມູນທັງຄວາມຈິງ ແລະ ບໍ່ຖືກ ຕ້ອງເຮັດໃຫ້ເຮົາຍາກທີ່ຈະກວດສອບ; ພ້ອມນີ້, ທ່ານຫົວໜ້າກົມສື່ມວນຊົນ ຍັງໃຫ້ຮູ້ກ່ຽວກັບບົດບາດຂອງສື່ມວນຊົນວ່າ: ບົດບາດຂອງສື່ມວນຊົນທາງການ ໃນການຕ້ານຂ່າວປອມຄື: ກວດສອບຄວາມຈິງ ຊຶ່ງສື່ມວນຊົນຄວນກວດ ກາເບິ່ງຂໍ້ເປັນຈິງຢ່າງລະ ອຽດກ່ອນທີ່ຈະເຜີຍແຜ່ຂ່າວ, ການນໍາໃຊ້ແຫຼ່ງຂ່າວທີ່ເຊື່ອຖືໄດ້ ແລະ ການກວດສອບຂໍ້ມູນຈາກຫຼາຍແຫຼ່ງຈະຊ່ວຍຫຼຸດຜ່ອນການແຜ່ກະ ຈາຍຂອງຂ່າວປອມ, ການສະໜອງຂໍ້ມູນທີ່ຖືກຕ້ອງ ການເຜີຍແຜ່ຂໍ້ມູນທີ່ຖືກຕ້ອງ ແລະ ເຊື່ອຖືໄດ້ຊ່ວຍສ້າງຄວາມເຊື່ອໝັ້ນໃຫ້ກັບປະຊາຊົນ, ສື່ມວນຊົນຄວນເນັ້ນໜັກເຖິງການລາຍງານຂ່າວທີ່ເປັນຈິງ ແລະ ມີຈັນຍາບັນ, ການສຶກສາຂ່າວປອມ ສື່ມວນຊົນສາມາດຜະລິດບົດຄວາມ ຫຼື ໂຄງການທີ່ໃຫ້ຄວາມຮູ້ແກ່ປະຊາ ຊົນໃນການກວດສອບຂ່າວປອມ, ລວມທັງການຈໍາແນກລະຫວ່າງ ຂ່າວທີ່ເຊື່ອຖືໄດ້ ແລະ ຂ່າວປອມ.
ທ່ານ ໂພສີ ແກ້ວມະນີວົງ ຍັງໃຫ້ຮູ້ເຖິງ ທິດທາງ ແລະ ການພັດທະນາສື່ມວນຊົນໃນຍຸກໃໝ່ ໂດຍທ່ານ ໄດ້ຍົກໃຫ້ເຫັນເຖິງວິໄສທັດຂອງສື່ມວນຊົນລາວວ່າ: ພັດທະນາສື່ມວນຊົນລາວໃຫ້ກ້າວສູ່ຄຸນນະພາບ, ທັນສະໄໝ, ວ່ອງໄວ, ຊັດເຈນ, ທັນເຫດການ, ທັນເວລາ ສາມາດເຂົ້າເຖິງໄດ້ທຸກພື້ນທີ່ທົ່ວປະເທດ; ມີຄວາມຫຼາກຫຼາຍ ຄົບຖ້ວນດ້ານເນື້ອໃນ, ເປັນແຫຼ່ງສະໜອງຂໍ້ມູນຂ່າວສານ ແລະ ໃຫ້ສາລະຄວາມຮູ້ຢ່າງຮອບ ດ້ານໃຫ້ແກ່ພັກ-ລັດ ປະຊາຊົນບັນດາເຜົ່າທຸກຊັ້ນຄົນ, ຊຸກຍູ້ສົ່ງເສີມ ສ້າງບຸກຄະລາກອນສື່ມວນຊົນທີ່ມີຄຸນທາດທາງດ້ານການເມືອງ ໜັກແໜ້ນ ແລະ ມີວຸດທິ ສື່ສານມວນຊົນທີ່ກ້າວໜ້າສົມຄູ່ກັບຍຸກສະໄໝ; ສ້າງຄວາມເຂັ້ມແຂງ ແລະ ຫັນໄປສູ່ກຸ້ມຕົນເອງໃນລະດັບທີ່ແນ່ນອນ; ສົ່ງເສີມການຮ່ວມມືລະຫວ່າງ ພາກລັດ ແລະ ພາກເອກະຊົນ, ການຮ່ວມມືກັບຕ່າງປະເທດໃນການສົ່ງເສີມການລົງທຶນໃນວຽກງານຖະແຫຼງຂ່າວໃຫ້ກວ້າງ; ຂະຫຍາຍ ຂອບເຂດການພົວພັນ, ເຊື່ອມໂຍງກັບເວທີສື່ມວນຊົນສາກົນໃຫ້ນັບມື້ນັບກວ້າງຂວາງ ແລະ ມີຄວາມໝັ້ນຄົງຍືນຍົງ.
