ຂ່າວສານຫວຽດນາມລາຍງານວ່າ: ໃນວັນທີ 1 ສິງຫາ ຜ່ານມາ ຕາມເວລາທ້ອງຖິ່ນ, ທ່ານ ອັນໂຕນີ ບຣິນເຄນ ລັດຖະມົນຕີກະຊວງການຕ່າງປະເທດ ອາເມຣິກາ ແລະ ທ່ານ ແຈັກ ຊັລລິແວນ ທີ່ປຶກສາຄວາມໝັ້ນຄົງແຫ່ງຊາດອາເມຣິກາ ພ້ອມກັບ ທ່ານ ວິວຽນ ບາລາຄຣິສແນນ ລັດຖະມົນຕີການຕ່າງປະເທດ ສິງກະໂປ, ທ່ານນາງ ໂຈເຊຟຟິນ ເທວ ລັດຖະມົນຕີວ່າການກະຊວງການພັດທະນາດີຈີຕອນ ແລະ ຂໍ້ມູນຂ່າວສານ ໄດ້ເປັນປະທານກອງປະຊຸມສົນທະນາເຕັກໂນໂລຊີທີ່ສໍາຄັນ ແລະ ເກີດໃໝ່ (CET) ອາເມຣິກາ ແລະ ສິງກະໂປ ຄັ້ງທີ 2 ຢູ່ ສິງກະໂປ.
ຂ່າວລະບຸວ່າ: ໃນການພົບປະ, ບັນດາລັດຖະມົນຕີໄດ້ຕີລາຄາສູງບັນດາບາດກ້າວບຸກທະລຸທີ່ສຳຄັນໃນການເພີ່ມທະວີການພົວພັນຮ່ວມມືລະຫວ່າງວິສາຫະກິດ, ວິທະຍາສາດ ແລະ ຄວາມໝັ້ນຄົງແຫ່ງຊາດຂອງ 2 ປະເທດ, ກວດກາຄືນບັນດາຂົງເຂດຮ່ວມມືທີ່ພວມດຳເນີນຢູ່ ແລະ ປຶກສາຫາລືກ່ຽວກັບບັນດາທິດທາງເພື່ອສືບຕໍ່ຮັດແໜ້ນຊ່ອງວ່າງລະຫວ່າງບັນດາລະບົບນິເວດປະດິດສ້າງ ອະນາຄົດທີ່ສົດໃສໃຫ້ແກ່ປະຊາຊົນອາເມຣິກາ ແລະ ສິງກະໂປ ພ້ອມທັງບັນດາຄູ່ຮ່ວມມືໃນສະມາຄົມປະຊາຊາດອາຊີຕາເວັນອອກສຽງໃຕ້ (ອາຊຽນ) ແລະ ໃນພາກພື້ນອິນໂດປາຊີຟິກ.
ສອງຝ່າຍໄດ້ເນັ້ນໜັກເຖິງຄວາມຄືບໜ້າທີ່ບັນລຸໄດ້ໃນການເຈລະຈາ ແລະ ລົງນາມໃນສັນຍາຮ່ວມມືດ້ານວິທະຍາສາດ ແລະ ເຕັກໂນໂລຊີ ລະຫວ່າງ ອາເມຣິກາ ແລະ ສິງກະໂປ ເພື່ອເສີມສ້າງຂີດຄວາມສາມາດດ້ານວິທະຍາສາດ ແລະ ເຕັກໂນໂລຊີ ໃນບັນດາຂົງເຂດທີ່ຕ່າງຝ່າຍຕ່າງມີຜົນປະໂຫຍດເພື່ອສັນຕິພາບ.
ສອງຝ່າຍກ່າວຢ້ຳຄືນຄວາມສຳຄັນຂອງການປະຕິບັດໜ້າທີ່ທີ່ມີຄວາມຮັບຜິດຊອບ ໃນການນຳໃຊ້ປັນຍາປະດິດ (AI) ແລະ ຈະສືບຕໍ່ຊຸກຍູ້ໃຫ້ປະເທດອື່ນໆເຂົ້າຮ່ວມຖະແຫຼງການການເມືອງກ່ຽວກັບຄວາມຮັບຜິດຊອບຂອງການນໍາໃຊ້ AI ເພື່ອຈຸດປະສົງທາງການທະຫານ.
