ຂ່າວຕ່າງປະເທດລາຍງານ, ທ່າອ່ຽງເສດຖະກິດອາຊີຕາເວັນອອກສ່ຽງໃຕ້ 2024-2034 (Navigating High Winds: Southeast Asia Outlook 2024-2034) ທີ່ຮ່ວມເຜີຍແຜ່ໂດຍທະນາຄານດີບີເອສ (DBS Bank), ບໍລິສັດ Bain & Company ແລະ Angsana Council ໃນວັນທີ 1 ສິງຫາ ຜ່ານມາ ລະບຸວ່າ: ປະເທດເສດຖະກິດຂັ້ນນຳ 6 ແຫ່ງຂອງອາຊີຕາເວັນອອກສ່ຽງໃຕ້ ໄດ້ແກ່: ຫວຽດນາມ, ຟີລິບປິນ, ອິນໂດເນເຊຍ, ມາເລເຊຍ ແລະ ສິງກະໂປ ຈະມີອັດຕາການຂະຫຍາຍຕົວສະເລ່ຍຕໍ່ປີຢູ່ທີ່ 6,1% ໃນ10 ຂ້າງໜ້າ.
ລາຍງານນີ້ຊີ້ວ່າ: ປະເທດເສດຖະກິດຂັ້ນນຳ 6 ແຫ່ງຂອງພາກພື້ນ ຈະໄດ້ຮັບຜົນປະໂຫຍດຈາກຜູ້ບໍລິໂພກຫຼາຍກວ່າ 600 ລ້ານຄົນ ໃນຕະຫຼາດອາຊີຕາເວັນອອກສ່ຽງໃຕ້ ແລະ ຄວາມສຳພັນທາງປະຫວັດສາດອັນແຂງແຮງກັບປະເທດເສດຖະກິດການຄ້າຂະໜາດໃຫຍ່.
ຂະນະດຽວກັນ, ລັດທິກີດກັ້ນທາງການຄ້າ (protectionism) ທີ່ເພີ່ມຫຼາຍຂຶ້ນໃນຕະຫຼາດພັດທະນາແລ້ວ ແລະ ການຫຼຸດກິດຈະກຳການຜະລິດຂະແໜງອຸດສາຫະກຳເທື່ອລະໜ້ອຍ ເນື່ອງຈາກແຮງຊຸກຍູ້ຂອງຄວາມສາມາດການແຂ່ງຂັນທີ່ປ່ຽນແປງໄປຈະສົ່ງຜົນບໍ່ດີຕໍ່ເສດຖະກິດ.
ລາຍງານຄາດຄະເນວ່າ: ສິງກະໂປ ຈະຂະຫຍາຍຕົວໃນອັດຕາສະເລ່ຍຕໍ່ປີ 2,5% ໃນອີກ 10 ປີຂ້າງໜ້າ ໂດຍການຜະລິດຂັ້ນສູງ, ການບໍລິການ, ການທ່ອງທ່ຽວ ແລະ ກຸ່ມບຸກຄະລາກອນທີ່ມີຄວາມສາມາດລະດັບໂລກຈະເປັນກົນໄກຂັບເຄື່ອນເສດຖະກິດທີ່ແຂງແຮງ.
ສ່ວນຄວາມທ້າທາຍດ້ານປະຊາກອນ, ຂໍ້ຈຳກັດດ້ານທີ່ດິນ, ແຮງງານ ແລະ ຕົ້ນທຶນທາງທຸລະກິດທີ່ສູງຂຶ້ນອາດຈຳກັດໂອກາດຂອງສິງກະໂປໄດ້ດ້ວຍເຊັ່ນດຽວກັນ.
