ສະມາຄົມນັກຂ່າວແຫ່ງ ສປປ ລາວ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບອົງການແຄນາໆຊາດ ປະຈຳລາວ ໄດ້ຈັດເວທີເສວະນາພາຍໃຕ້ຫົວຂໍ້: ປັນຍາປະດິດ ແລະ ສິ່ງທ້າທາຍ ຂອງສື່ອອນລາຍສໍາລັບສື່ມວນຊົນລາວ ຂຶ້ນໃນວັນທີ 2 ສິງຫາ ທີ່ໂຮງແຮມລາວເທວ ນະຄອນຫຼວງວຽງຈັນ ແບບ ປົກກະຕິ ແລະ ອອນລາຍ ໂດຍເປັນກຽດເຂົ້າຮ່ວມຂອງ ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາ ອົບຮົມສູນກາງພັກ ຫົວໜ້າບັນນາທິການໃຫຍ່ໜັງສືພິມປະຊາຊົນ, ມີຜູ້ຕາງໜ້າສະຖານທູດອົສຕຣາລີປະຈຳລາວ, ຜູ້ຕາງໜ້າອົງການສະຫະພາບເອີຣົບປະຈໍາລາວ, ມີອະດີດການນໍາກະຊວງ ຖວທ, ຫົວໜ້າກົມ-ຮອງກົມ, ຫົວໜ້າບັນນາທິການຕະຫຼອດຮອດສື່ມວນຊົນສູນກາງ, ແຂວງ ພ້ອມດ້ວຍແຂກຖືກເຊີນເຂົ້າຮ່ວມ.
ທ່ານ ສະຫວັນຄອນ ຣາຊະມຸນຕຣີ ປະທານສະມາຄົມນັກຂ່າວແຫ່ງ ສປປ ລາວ ກ່າວວ່າ: ກອງປະຊຸມ ຄັ້ງນີ້ເປັນໜຶ່ງໃນກິດຈະກຳຈັດຂຶ້ນເພື່ອຂໍ່ານັບຮັບຕ້ອນວັນສື່ມວນຊົນລາວ ແລະ ການພິມຈຳໜ່າຍ ຄົບຮອບ 74 ປີ, ເພື່ອສ້າງໂອກາດ ແລະ ເງື່ອນໄຂໃຫ້ສື່ມວນຊົນລາວເປັນຕົ້ນ ອົງການຄຸ້ມຄອງ, ບັນນາທິການ ແລະ ນັກຂ່າວ ລວມເຖິງຜູ້ປະກອບອາຊີບດ້ານສື່ມວນຊົນໃຫ້ຮຽນຮູ້ ແລະ ເຂົ້າໃຈການປ່ຽນແປງຂອງເຕັກໂນໂລຊີ, ກາລະໂອກາດ ແລະ ສິ່ງທ້າທາຍຂອງສື່ມວນຊົນໃນໄລຍະໃໝ່ ຄຽງຄູ່ກັບການຮຽນຮູ້, ການໝູນໃຊ້ເຕັກໂນໂລຊີໃໝ່ ເປັນຕົ້ນ ນໍາໃຊ້ປັນຍາປະດິດຊ່ວຍໃນການຫຼຸດຜ່ອນເວລາ ແລະ ຂັ້ນຕອນຕ່າງໆ ເຂົ້າໃນວຽກງານຜະລິດ ແລະ ບັນນາທິ ການຂ່າວ, ການນໍາໃຊ້ເອໄອແນໃສ່ສ້າງເງື່ອນໄຂໃຫ້ຜູ້ອ່ານ, ຜູ້ຊົມສື່ໄດ້ຮັບຂໍ້ມູນຂ່າວສານວ່ອງໄວ, ມີເນື້ອໃນ ອຸດົມສົມບູນ, ຖືກຕ້ອງ, ຊັດເຈນ ສາມາດດຶງດູດຄວາມສົນໃຈຂອງຜູ້ບໍລິໂພກຂໍ້ມູນຂ່າວສານ, ສອດຄ່ອງກັບແນວທາງ ຂອງພັກ-ລັດ, ສະພາບຄວາມເປັນຈິງ ແລະ ຄວາມຕ້ອງການຂອງສັງຄົມ. ນອກຈາກນີ້, ຜູ້ເຂົ້າຮ່ວມຈະຮຽນຮູ້ການ ຫັນເປັນດີຈີຕອນຂອງສື່ມວນຊົນ, ການນໍາໃຊ້ສື່ສັງຄົມອອນລາຍ ແລະ ການຕອບໂຕ້ຂ່າວປອມ, ຂ່າວຫຼອກລວງຈາກ ຊ່ຽວຊານຜູ້ທີ່ມີຄວາມຮູ້, ປະສົບການທັງພາກລັດ ແລະ ເອກະຊົນ. ພິເສດປີນີ້, ຜູ້ເຂົ້າຮ່ວມຈະໄດ້ຮັບຟັງບົດຮຽນ ແລະ ບົດບາດຂອງສື່ມວນຊົນກ່ຽວກັບການຊຸກຍູ້ ແລະ ສົ່ງເສີມການພັດທະນາປະເທດຊາດຕາມທິດສີຂຽວ ແລະ ຍືນຍົງ.
ທ່ານ ສະຫວັນຄອນ ຣາຊະມຸນຕຣີ ຍັງໄດ້ຮຽກຮ້ອງບັນດາຜູ້ເຂົ້າຮ່ວມຈົ່ງນໍາໃຊ້ໂອກາດນີ້ຍາດແຍ່ງເອົາ ຄວາມຮູ້, ປະສົບການ ແລະ ບົດຮຽນອັນດີໃນການນໍາໃຊ້ເຄື່ອງມືທັນສະໄໝເຂົ້າໃນວຽກງານຂອງຕົນ. ພ້ອມກັນນັ້ນ, ຈົ່ງແລກປ່ຽນບົດຮຽນຂອງຕົນໃຫ້ບັນດາຜູ້ເຂົ້າຮ່ວມດ້ວຍກັນ. ງານເສວະນາໃນຄັ້ງນີ້ໄດ້ຮັບການສະໜັບໜູນຈາກສະ ຖານທູດອົສຕຣາລີປະຈໍາລາວ, ສະຫະພາບເອີຣົບ ແລະ ນັກທຸລະກິດ.
(ຂ່າວ-ພາບ: ວັນເພັງ)
