ເຈົ້າໜ້າທີ່ພະແນກຕໍາຫຼວດ ປກສ ນະຄອນຫຼວງພະບາງ ໄດ້ລົງມ້າງຄະດີຄ້າ-ຂາຍໂສເພນີ ຫຼື ບໍລິການທາງເພດ ຈໍານວນ 3 ຈຸດ ຢູ່ນະຄອນຫຼວງພະບາງ ແຂວງຫຼວງພະບາງ ເມື່ອມໍ່ໆມານີ້ໂດຍໄດ້ພົບຍິງສາວເຄາະຮ້າຍຖຶກຕົວະຍົວະມາບໍລິການທາງເພດຈໍານວນ 17 ຄົນທີ່ມີອາຍຸ 10 ປີ ຫາ 21 ປີ ເຊິ່ງເປັນປະຊາຊົນມາຈາກເມືອງປາກແຊງແຂວງ ຫຼວງພະບາງ.
ທ່ານ ພັຕ ຄໍາສອນ ພຸດລະວົງ ຫົວໜ້າພະແນກຕໍາຫຼວດ ປກສ ນະຄອນຫຼວງພະບາງລາຍງານໃຫ້ຮູ້ວ່າ: ຈາກການມ້າງຄະດີດັ່ງກ່າວ ສາມາດຈັບຕົວຜູ້ຕົວະຍົວະຍິງສາວຈໍານວນດັ່ງກ່າວໄດ້ 4 ຄົນ (ຊາຍ 1 ແລະ ຍິງ 3 ຄົນ), ພວກກ່ຽວທັງ 4 ໄດ້ໄປຊັກຊວນຕົວະຍົວະຍິງສາວວ່າຈະຊອກວຽກເຮັດງານທໍາຢູ່ໃນເມືອງໃຫ້ ເປັນວຽກທີ່ສະບາຍແຕ່ເນື້ອແທ້ແມ່ນໃຫ້ບໍລິການທາງເພດ.
ທ່ານ ພັຕ ຄໍາສອນ ໄດ້ລາຍງານຕື່ມວ່າ: ວິທີການຂອງຜູ້ຫຼອກລວງຍິງສາວ ແມ່ນພວກກ່ຽວຈະຊັກຊວນເອົາຍິງສາວຢູ່ຊົນນະບົດ ໃຫ້ເຂົ້າມາເຮັດວຽກນໍາແລ້ວໄປເຊົ່າຫ້ອງແຖວ ຢູ່ຕາມຈຸດຕ່າງໆ (ແບ່ງເປັນຫຼາຍຈຸດ), ໂດຍມີການແບ່ງງານກັນລະອຽດເຊັ່ນ: ມີຜູ້ປຸກລະດົມຂົນຂວາຍ, ມີຜູ້ຕິດຕໍ່ແຂກ, ມີຜູ້ຈັດສົ່ງໃຫ້ແຂກ ແລະ ຜູ້ຄຸ້ມຄອງຢູ່ແຕ່ລະຈຸດພັກເຊົາ, ເມື່ອຕິດຕໍ່ແຂກໄດ້ແລ້ວກໍ່ທໍາການຈັດສົ່ງໃຫ້ເຖິງທີ່.
ແຫຼ່ງຂໍ້ມູນຂ່າວ: ປກສ ແຂວງຫຼວງພະບາງ
