ການປະຕິຮູບ ແລະ ເປີດປະຕູສູ່ພາຍນອກເປັນນະໂຍບາຍພື້ນຖານແຫ່ງຊາດຂອງພັກຄອມມູນິດຈີນໃນການບໍລິຫານປະເທດ. ນະໂຍບາຍນີ້ແມ່ນໄດ້ສະເໜີອອກໃນກອງປະຊຸມຄົບຄະນະຄັ້ງທີ 3 ຂອງຄະນະກຳມະການສູນກາງພັກຄອມມູນິດຈີນສະໄໝທີ XI ພາຍໃຕ້ການເປັນປະທານຂອງສະຫາຍ ເຕີ້ງສ້ຽວຜິງ ເມື່ອປີ 1978 ແລະ ໄດ້ຮັບການລົງເລິກຢ່າງຮອບດ້ານຈາກກອງປະຊຸມຄົບຄະນະຄັ້ງທີ 3 ຂອງຄະນະກຳມະການສູນກາງພັກກອມມູນິດຈີນ ສະໄໝທີ XVIII ພາຍໃຕ້ການເປັນປະທານຂອງສະຫາຍ ສີຈິ້ນຜິງ ເມື່ອປີ 2013. ເນື່ອງໃນໂອກາດທີ່ກອງປະຊຸມຄົບຄະນະ ຄັ້ງທີ 3 ຂອງຄະນະກຳມະການສູນກາງພັກກອມ ມູນິດຈີນ ສະໄໝທີ 20 ຈັດຂຶ້ນລະຫວ່າງວັນທີ 15 ຫາ 18 ກໍລະກົດ 2024 ຢູ່ນະຄອນ ຫລວງປັກກິ່ງປະເທດຈີນ, ພວກເຮົາຈະນຳສະເໜີໃຫ້ທ່ານຮັບຮູ້ ນະໂຍບາຍການປະຕິຮູບຂອງຈີນໃນຍຸກໃໝ່. ໂດຍ ມື້ນີ້ສະເໜີຕອນທີ 4ທີ່ເວົ້າເຖິງຄວາມກວມລວມຮອບດ້ານ
ນະຄອນໄຫໂຂ້ວ ແຂວງໄຫຫລໍາ ຕັ້ງຢູ່ແຄມຝັ່ງທະເລ, ເປັນເມືອງທີ່ເຕັມໄປດ້ວຍຕົ້ນພ້າວ, ມີຄື້ນທະເລພັດເຂົ້າຝັ່ງເປັນໄລຍະ, ໜ້ານໍ້າທະເລເຕັມໄປດ້ວຍກຸ່ມເຮືອ ແລະ ກຳປັ່ນຈຳນວນນັບພັນລຳແຂ່ງຂັນກັນອອກເດີນທາງ…ເມື່ອເດືອນເມສາ ປີ 2018 ໄດ້ມີພິທີສະເຫລີມສະຫລອງການສ້າງຕັ້ງແຂວງໄຫຫລໍາ ແລະ ສ້າງເຂດເສດຖະກິດພິເສດຄົບຮອບ 30. ໃນໂອກາດດັ່ງກ່າວ, ສະຫາຍ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດ, ປະທານປະເທດຈີນ ໄດ້ກ່າວຢ່າງໜັກແໜ້ນວ່າ: “ສູນກາງພັກຕົກລົງສະໜັບສະໜູນທົ່ວເກາະໄຫຫລໍາ ສ້າງເຂດທົດລອງການຄ້າເສລີ, ສະໜັບສະໜູນການຄົ້ນຄວ້າເທື່ອລະກ້າວ ແລະ ຊຸກຍູ້ການສ້າງທ່າການຄ້າເສລີ ທີ່ມີສີສັນພິເສດຂອງຈີນຢ່າງໜັກແໜ້ນ, ສ້າງລະບົບນະໂຍບາຍ ແລະ ລະບຽບການທ່າການຄ້າເສລີ ໂດຍແບ່ງເປັນຫລາຍບາດກ້າວ ແລະ ຫລາຍໄລຍະ”.ຈາກນີ້, ແຂວງໄຫຫລໍາ ທີ່ສ້າງຕັ້ງມາເປັນເວລາ 30 ປີ ໄດ້ກາຍເປັນຕົວແບບອັນໃໝ່ ແຫ່ງການປະສົມປະສານການປະຕິຮູບເຂົ້າໃນການເປີດປະຕູສູ່ພາຍນອກ.
ການເປີດປະຕູສູ່ພາຍນອກ ແລະ ການປະຕິຮູບເວລາໃດກໍຄຽງຄູ່ກັນ ແລະ ຊ່ວຍຊູຍູ້ສະໜັບສະໜູນກັນ. ສະຫາຍ ສີຈິ້ນຜິງ ໄດ້ຊີ້ໃຫ້ເຫັນຢ່າງເລິກເຊິ່ງວ່າ:“ການຊຸກຍູ້ການປະຕິຮູບແລະ ການພັດທະນາດ້ວຍການເປີດປະຕູສູ່ພາຍນອກ ເປັນເຄັດລັບອັນສຳຄັນ ທີ່ເຮັດໃຫ້ການພັດທະນາຂອງຈີນ ໄດ້ຮັບຜົນສຳເລັດໃໝ່ຢ່າງບໍ່ຢຸດຢັ້ງ.”ເພິ່ນໄດ້ເນັ້ນໜັກຢູ່ເລື້ອຍໆວ່າ: “ການເປີດປະຕູພາໃຫ້ມີຄວາມກ້າວໜ້າ, ການປິດປະຕູຍ່ອມມຈະຫລ້າຫລັງແນ່ນອນ”
ໃນຖານະເປັນອະລິຍະທຳທີ່ຂະຫຍາຍຕົວດ້ວຍຮູບຖານປະເທດມາເຖິງປັດຈຸບັນພຽງໜຶ່ງດຽວຢູ່ໃນໂລກ, ອະລິຍະທຳຈີນໄດ້ກວມລວມຮັບເອົາສິ່ງທີ່ດີທຸກຢ່າງ ຈາກອະລິຍະທຳຕ່າງໆຢູ່ໃນໂລກ ເຊິ່ງເປັນສາເຫດສຳຄັນອັນໜຶ່ງ ທີ່ເຮັດໃຫ້ອະລິຍະທຳຈີນສາມາດພັດທະນາແບບຍືນຍົງ. ສະຫາຍ ສີຈິ້ນຜິງ ເຄີຍໄດ້ຊີ້ແຈງເຖິງລັກສະນະເປີດກວ້າງ ແລະ ກວມລວມແບບນີ້ຂອງອະລິຍະທຳຈີນ ຄື:“ອະລິຍະທຳຈີນແມ່ນໄດ້ຈໍ່ຕົວໃຫ້ເປັນລະບົບເປີດກວ້າງ ຜ່ານຈາກການແລກປ່ຽນ ແລະ ຖອດຖອນບົດຮຽນ ເຊິ່ງກັນ ແລະ ກັນກັບອະລິຍະທຳອື່ນໆຢ່າງບໍ່ຢຸດຢັ້ງ. ຈາກສາສະໜາພຸດຖືກເຜີຍແຜ່ ສູ່ປະເທດຕາເວັນອອກ, ການແລກປ່ຽນເຊື່ອມໂຍງເຂົ້າກັນລະຫວ່າງສາສະໜາອິດສະລາມ ແລະ ປັດຊະຍາຂົງຈື້ ໃນສະໄໝບູຮານ, ຈົນຮອດ “ແນວຄິດວິຊາການປະເທດຕາເວັນຕົກເຜີຍແຜ່ສູ່ຈີນ”, ຂະບວນການວັດທະນະທຳໃໝ່, ລັດທິມາກ ແລະ ແນວຄິດສັງຄົມນິຍົມເຜີຍແຜ່ເຂົ້າສູ່ຈີນ ໃນສະໄໝໃໝ່ນັບແຕ່ປີ 1840 ເປັນຕົ້ນມາ, ຕະຫລອດຮອດການເປີດປະຕູສູ່ພາຍນອກຢ່າງຮອບດ້ານ ນັບຕັ້ງແຕ່ດຳເນີນການປະຕິຮູບ ແລະ ເປີດປະຕູສູ່ພາຍນອກເປັນຕົ້ນມາ, ອະລິຍະທຳຈີນໄດ້ຜ່ານຈາກກວມລວມ ແລະ ຮັບເອົາສິ່ງທີ່ດີທຸກຢ່າງຈາກອະລິຍະທຳອື່ນໆ ໂດຍສາມາດຂະຫຍາຍຕົວໃຫ້ອຸດົມສົມບູນ ແລະ ມີຄຸນຄ່າຫລາຍຍິ່ງຂຶ້ນຢ່າງສະເໝີຕົ້ນສະເໝີປາຍ.
“ຄວາມກວມລວມຮອບດ້ານ” ເປັນສະຕິປັນຍາຈີນຢ່າງໜຶ່ງທີ່ສອດຫ້ອຍເຂົ້າໃນຂະບວນການປະຫວັດສາດ ແຕ່ສະໄໝບູຮານຈົນມາເຖິງປັດຈຸບັນ. ບົດຄວາມບົດໜຶ່ງທີ່ປະພັນໂດຍ ທ່ຫານຢວີ້ ນັກວັນນະຄະດີສະໄໝລາຊະວົງຖັງ ເມື່ອ 1.000 ກວ່າປີກ່ອນ ໄດ້ລະບຸວ່າ: “ນາຍໝໍຜູ້ເກັ່ງ ແລະ ສະຫລາດຈະຮູ້ເກັບຮັກສາສິ່ງຕ່າງໆໄວ້ ເພື່ອນຳໃຊ້ໃນເວລາທີ່ມີຄວາມຕ້ອງການ.” ສະຕິປັນຍາອັນເກົ່າແກ່ແບບນີ້ໄດ້ພາໃຫ້ຄົນຈີນ ມີຈິດໃຈເປີດກວ້າງ. ຈາກການປະຕິຮູບ ແລະ ເປີດປະຕູສູ່ພາຍນອກ ທີ່ເລີ່ມປະຕິບັດ ເມື່ອປີ 1978 ຈົນຮອດ ການເປີດປະຕູສູ່ພາຍນອກຢ່າງຮອບດ້ານຂອງຈີນ ໃນຍຸກໃໝ່ ເຊິ່ງລ້ວນແຕ່ໄດ້ສ່ອງແສງໃຫ້ເຫັນເຖິງກຳລັງແຮງອັນຍິ່ງໃຫຍ່ ແຫ່ງການປະຕິບັດຕົວຈິງແບບກວມລວມຮອບດ້ານ ດ້ວຍຈິດໃຈເປີດກວ້າງ. ຊາວກອມມູນິດຈີນທີ່ມີສະຫາຍ ເຕີ້ງສ້ຽວຜິງ ເປັນຕົວແທນໄດ້ຫັນເອົາຈິດໃຈ ເປີດກວ້າງໃຫ້ເປັນ ທິດສະດີບໍລິຫານປະເທດຄື “ເປີດປະຕູສູ່ພາຍນອກ” ພ້ອມທັງກຳນົດໃຫ້ເປັນນະໂຍບາຍ ພື້ນຖານແຫ່ງຊາດ ຂອງຈີນ. ຜ່ານຈາກການປະຕິບັດຕົວຈິງມາເປັນເວລາ 30 ກວ່າປີ, ການເປີດປະຕູສູ່ພາຍນອກຂອງຈີນ ໄດ້ຮັບຜົນສຳເລັດທີ່ປະຈັກຕາຕໍ່ຊາວໂລກ.
ນັບແຕ່ປີ 2012 ເປັນຕົ້ນມາ, ສະຫາຍ ສີຈິ້ນຜິງ ໄດ້ຍຶດໝັ້ນຈິດໃຈເປີດກວ້າງແບບກວມລວມຮອບທຸກສິ່ງ ໂດຍໄດ້ສະເໜີແນວຄິດປະດິດສ້າງຄື “ການພັດທະນາແບບເປີດປະຕູສູ່ພາຍນອກ”. ເພິ່ນຊີ້ໃຫ້ເຫັນວ່າ: “ການເປີດປະຕູສູ່ພາຍນອກຂອງຈີນ ແມ່ນເປັນແບບຮອບດ້ານ ແລະ ກວມທຸກຂົງເຂດ, ຕ້ອງຊຸກຍູ້ການສ້າງໃຫ້ເປັນສະພາບການໃໝ່ ແຫ່ງການເປີດປະຕູສູູ່ພາຍນອກຢ່າງຮອບດ້ານ” ເຊິ່ງສະພາບການໃໝ່ແບບນີ້ທີ່ເພິ່ນນຳພາສ້າງຕັ້ງຂຶ້ນນັ້ນ ມີເນື້ອໃນອັນອຸດົມສົມບູນທີ່ສຸດ ເຊິ່ງບໍ່ພຽງແຕ່ກວມເຖິງການປັບປຸງ ແຜນການເປີດປະຕູສູ່ພາຍນອກຂອງເຂດແຄວ້ນ, ແຜນການການຄ້າກັບຕ່າງປະເທດ ແລະ ແຜນການລົງທຶນ ໃຫ້ສົມບູນຂຶ້ນ ເພື່ອສ້າງໃຫ້ເປັນໂຄງປະກອບໃໝ່ ດ້ານການເປີດປະຕູສູ່ພາຍນອກເທົ່ານັ້ນ, ຍັງກວມເຖິງການປະດິດສ້າງຮູບແບບການເປີດປະຕູສູ່ພາຍນອກ, ປັບປຸງແຜນການໃຫ້ມີປະສິດທິຜົນດີຂຶ້ນ, ຍົກສູງຄຸນນະພາບ, ນຳພາການປະດິດສ້າງ, ຊຸກຍູ້ການປະຕິຮູບ ແລະການພັດທະນາດ້ວຍການເປີດກວ້າງ ການເປີດປະຕູສູ່ພາຍນອກ.
ການສ້າງໂຄງປະກອບໃໝ່ຂອງເສດຖະກິດແບບເປີດປະຕູສູ່ພາຍນອກເປັນພຶດຕິກຳຕົວຈິງ ທີ່ມີລັກສະນະປະດິດສ້າງຂອງການປະຕິບັດແນວຄິດສີຈິ້ນຜິງ ກ່ຽວກັບ“ການພັດທະນາແບບເປີດປະຕູສູ່ພາຍນອກ” ໄດ້ສຸມໃສ່ທັບມ້າງອຸປະສັກດ້ານໂຄງປະກອບ ແລະກົນໄກ, ຜ່ານຈາກການເລັ່ງກໍ່ສ້າງຈຸດສູງແຫ່ງການເປີດປະຕູສູ່ພາຍນອກຕ່າງໆເຊັ່ນ: ເຂດທົດລອງການຄ້າເສລີ, ທ່າການຄ້າເສລີເປັນຕົ້ນ, ຊຸກຍູ້ການປະດິດສ້າງດ້ານລະບົບລະບຽບການ. ນັບແຕ່ປີ 2013 ເປັນຕົ້ນມາ, ຈີນໄດ້ສ້າງຕັ້ງເຂດທົດລອງການຄ້າເສລີ ຈຳນວນ 22 ແຫ່ງ ໂດຍແບ່ງເປັນ6ຊຸດ ເຊິ່ງໄດ້ກາຍເປັນສະພາບການປະດິດສ້າງ ດ້ານການປະຕິຮູບ ແລະ ເປີດປະຕູສູ່ພາຍ ນອກທີ່ປົກຄຸມທົ່ວປະເທດ, ປະສານສົມທົບກັນຊຸກຍູ້ເຂດແຄມຝັ່ງທະເລ, ເຂດໃນ ແລະ ເຂດຊາຍແດນໃຫ້ພັດທະນາໄປຄຽງຄູ່ກັນ.
(ເຂດຫລິນກາງເຂດທົດລອງການຄ້າເສລີຊຽງໄຮ້ທີ່ມີການປ່ຽນແປງສູ່ໂສມໜ້າໃໝ່ໃນທຸກມື້ມີຕຶກສູງສຽດຟ້າເກີດຂຶ້ນໃໝ່ນັບມື້ນັບຫລາຍ, ເປັນເມືອງທີ່ພວມເລັ່ງພັດທະນາໃຫ້ຫຍັບເຂົ້າໃກ້ຄໍາວ່າຕົວເມືອງທັນສະໄໝແຫ່ງຍຸກອະນາຄົດ)
ການສ້າງໂຄງປະກອບໃໝ່ຂອງເສດຖະກິດແບບເປີດປະຕູສູ່ພາຍນອກ ມີສ່ວນປະກອບທີ່ສຳຄັນ ຄື: ເປັນການເປີດກວ້າງດ້ານລະບຽບການ ເຊັ່ນ ຫລັກການ, ກົດລະບຽບ, ການຄຸ້ມຄອງແລະມາດຕະຖານເປັນຕົ້ນ. ໃນ 10 ກວ່າປີຜ່ານມານີ້, ພາຍໃຕ້ການຊີ້ນຳນຳພາຂອງ ສະຫາຍ ສີຈິ້ນຜິງ, ຈີນໄດ້ປັບປຸງກົດໝາຍກ່ຽວກັບການຄ້າຕໍ່ຕ່າງປະເທດ ແລະ ການລົງທຶນຂອງຕ່າງປະເທດໃຫ້ສົມບູນຂຶ້ນຢ່າງບໍ່ຢຸດຢັ້ງ, ໄດ້ຜ່ານການສ້າງກົດໝາຍແນໃສ່ເພີ່ມທະວີການສົ່ງເສີມ ແລະ ການປົກປັກຮັກສາການລົງທຶນຂອງຕ່າງປະເທດ ເພື່ອຮັດແໜ້ນພື້ນຖານການປົກຄອງ ຕາມກົດໝາຍຂອງການເປີດປະຕູສູ່ພາຍນອກ ໃນລະດັບສູງຢ່າງບໍ່ຢຸດຢັ້ງ.
ການປັບປຸງໂຄງປະກອບໃໝ່ຂອງເສດຖະກິດແບບເປີດປະຕູສູ່ພາຍນອກຂອງຈີນ ໃຫ້ສົມບູນຢ່າງບໍ່ຢຸດຢັ້ງ ບໍ່ພຽງແຕ່ໄດ້ຍົກສູງລະດັບການສ້າງລະບຽບການ ແລະ ການປົກຄອງຕາມກົດໝາຍ ດ້ານການເປີດປະຕູສູ່ພາຍນອກເທົ່ານັ້ນ, ຍັງໄດ້ຊຸກຍູ້ການສ້າງໂຄງປະກອບເສດຖະກິດ ຕະຫລາດສັງຄົມນິຍົມທີ່ມີລະດັບສູງຢ່າງແຂງແຮງນຳອີກ ເຊິ່ງໄດ້ສ້າງຊ່ອງທາງການພັດທະນາທີ່ກວ້າງຂວາງກວ່າເກົ່າໃຫ້ແກ່ປະເທດຈີນ ແລະ ສ້າງໂອກາດພັດທະນາໃໝ່ໃຫ້ແກ່ທົ່ວໂລກ.
ຈາກ “ດອກໄມ້ບານພຽງຊະນິດດຽວ” ຮອດ“ດອກໄມ້ນານາຊະນິດເບັ່ງບານພ້ອມກັນເຕັມສວນ”: ຈິດໃຈເປີດກວ້າງຂອງສະຫາຍ ສີຈິ້ນຜິງ ຍັງສະແດງໃຫ້ເຫັນໃນການນຳພາປະເທດຈີນເປີດປະຕູສູ່ພາຍນອກ ໄປສູ່ການຊຸກຍູ້ໃຫ້ປະເທດຕ່າງໆໃນໂລກ ຮ່ວມກັນເປີດປະຕູສູ່ພາຍນອກ. ເພິ່ນເວົ້າວ່າ: “ການພັດທະນາຂອງຈີນປັດສະຈາກໂລກບໍ່ໄດ້, ຄວາມຈະເລີນຮຸ່ງເຮືອງຂອງໂລກ ກໍຕ້ອງການປະເທດຈີນເຊັ່ນດຽວກັນ.” ເພິ່ນໄດ້ພັນລະນາດ້ວຍຄຳປຽບທຽບທີ່ມີຊີວິດຊີວາ ວ່າ: “ດອກໄມ້ບານພຽງຊະນິດດຽວບໍ່ສົມວ່າເປັນລະດູບານໃໝ່, ດອກໄມ້ນານາຊະນິດເບັ່ງບານພ້ອມກັນ ຈຶ່ງຈະສ້າງຄວາມສວຍງາມເຕັມສວນ.” ເພິ່ນໃຫ້ຄຳໝັ້ນສັນຍາວ່າ: “ຈີນຈະຍຶດໝັ້ນປະຕິບັດຍຸດທະສາດ ການເປີດປະຕູສູ່ພາຍນອກທີ່ຕ່າງຝ່າຍຕ່າງໄດ້ຮັບຜົນປະໂຫຍດ ຢ່າງໝັ້ນຄົງບໍ່ປ່ຽນແປງ ເພື່ອໃຫ້ປະເທດຈີນຮັບເອົາແຮງຂັບເຄື່ອນ ການພັດທະນາຈາກໂລກ ແລະໃຫ້ການພັດທະນາຂອງຈີນ ສ້າງຜົນປະໂຫຍດຫລາຍກວ່າເກົ່າໃຫ້ແກ່ໂລກ.” ສະຫາຍ ສີຈິ້ນຜິງໄດ້ປະຕິບັດຕາມຄຳໝັ້ນສັນຍາດັ່ງກ່າວ ດ້ວຍການກະທຳຕົວຈິງ ຄື: ນັບແຕ່ປີ 2012 ຄືສັງຄົມນິຍົມທີ່ມີສີສັນພິເສດຂອງຈີນ ໄດ້ເຂົ້າສູ່ຍຸກໃໝ່ເປັນຕົ້ນມາ, ຈີນໄດ້ຕັ້ງໜ້າເຂົ້າຮ່ວມການບໍລິຫານເສດຖະກິດໂລກ, ຊຸກຍູ້ການສ້າງໃຫ້ເປັນກຳລັງແຮງສັງລວມຂອງໂລກ ທີ່ເປີດກວ້າງພ້ອມກັນ ເປັນຕົ້ນ: ຍຶດໝັ້ນປົກປັກຮັກສາໂຄງປະກອບການຄ້າຫລາຍຝ່າຍ, ຊຸກຍູ້ໃຫ້ການຄ້າ ແລະ ການລົງທຶນຫັນເປັນເສລີ ແລະ ມີຄວາມສະດວກຫລາຍຂຶ້ນ, ເດັດດ່ຽວຄັດຄ້ານລັດທິຝ່າຍດຽວ ແລະ ລັດທິປົກປ້ອງການຄ້າ; ເພີ່ມທະວີການປະສານງານກັບກົນໄກສາກົນ ແລະ ກົນໄກຫລາຍຝ່າຍ ເຊັ່ນ: ອົງການສະຫະປະຊາຊາດ, ກຸ່ມ G20, ອົງການບຣິກສ ແລະ ອື່ນໆ, ຍຶດໝັ້ນປົກປັກຮັກສາຖານະແກນກາງ ແລະ ບົດບາດຂອງອົງການສະຫະປະຊາຊາດ ໃນວຽກງານສາກົນ; ລົງເລິກການຮ່ວມມືຢູ່ໃນພາກພື້ນ ແລະ ອະນຸພາກພື້ນ, ເຂົ້າຮ່ວມອົງການຮ່ວມມືເສດຖະກິດອາຊີ-ປາຊີຟິກ, ອົງການຮ່ວມມືຊຽງໄຮ ແລະ ກົນໄກການຮ່ວມມືພາກພື້ນອື່ນໆ ຢ່າງມີລັກສະນະສ້າງສັນ, ຊຸກຍູ້ໃຫ້ການຮ່ວມມືໃນອະນຸພາກພື້ນ ເປັນຕົ້ນ: ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ໃຫ້ພັດທະນາເຂົ້າສູ່ລວງເລິກ ແລະ ລວງກວ້າງຢ່າງບໍ່ຢຸດຢັ້ງ; ເພີ່ມທະວີການຮ່ວມມືສາກົນ ໃນຂົງເຂດເສດຖະກິດີຈິຕອນ ເຊິ່ງໄດ້ປ່ຽນແປງສະພາບການທີ່ປະເທດ ພວມພັດທະນາຂາດລັກສະນະຕົວແທນ ໃນລະບົບບໍລິຫານ ການເງິນທົ່ວໂລກຢ່າງຊັດເຈັນ.
ນັບແຕ່ປີ 2012 ເປັນຕົ້ນມາ, ສະຫາຍ ສີຈິ້ນຜິງ ໄດ້ສະເໜີຂໍ້ລິເລີ່ມການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ໂດຍໄດ້ເປີດກວ້າງຂົງເຂດທີ່ຈີນ ກັບປະເທດຕ່າງໆໃນໂລກມີຜົນປະໂຫຍດຮ່ວມກັນ ເປັນຕົ້ນ: 150 ກວ່າປະເທດ, 30 ກວ່າອົງການຈັດຕັ້ງສາກົນກັບຈີນ ໄດ້ລົງນາມໃນເອກະສານການຮ່ວມມື ກ່ຽວກັບການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”; ໂຄງການໃຫຍ່ທີ່ເປັນສັນຍະລັກ ແລະ ໂຄງການກ່ຽວກັບຊີວິດການເປັນຢູ່ ຂອງປະຊາຊົນທີ່ລົງທຶນໜ້ອຍແຕ່ມີປະສິດທິຜົນຫລາຍ ໄດ້ຊ່ວຍເຫລືອປະເທດທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ຫລຸດຜ່ອນຄວາມທຸກຍາກຢ່າງກວ້າງຂວາງ ແລະ ເພີ່ມຄວາມສຸກໃຫ້ກັບປະຊາຊົນ, ໄດ້ຊຸກຍູ້ການລົງທຶນເກືອບ 1.000 ຕື້ໂດລາສະຫະລັດ ແລະສ້າງເປັນ 3.000 ກວ່າໂຄງການຮ່ວມມື້ ເຊິ່ງໄດ້ສ້າງວຽກເຮັດງານທຳ 420.000 ຕຳແໜ່ງ ແລະ ພາໃຫ້ເກືອບ 40.000.000 ຄົນຫລຸດພົ້ນອອກຈາກຄວາມທຸກຍາກ; ສ້າງເວທີການຄ້າແລະການລົງທຶນ ແຫ່ງການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ຢ່າງຕໍ່ເນື່ອງ, ຈັດງານວາງສະແດງສິນຄ້າລະດັບພາກພື້ນຕ່າງໆ ເຊັ່ນ: ງານວາງສະແດງສິນຄ້ານຳເຂົ້າສາກົນຈີນ, ງານຕະຫລາດນັດສິນຄ້ານຳເຂົ້າສົ່ງອອກຂອງຈີນ, ງານຕະຫລາດນັດການຄ້າການບໍລິການສາກົນຈີນ, ງານຕະຫລາດນັດການຄ້າ ແລະ ການລົງທຶນສາກົນຈີນ ແລະ ງານວາງສະແດງເຄື່ອງບໍລິໂພກສາກົນຈີນເປັນຕົ້ນ ເຊິ່ງໄດ້ຊຸກຍູ້ການຮ່ວມມືດ້ານເສດຖະກິດການຄ້າລະຫວ່າງປະເທດຮ່ວມກັນສ້າງ “ໜຶ່ງແລວໜຶ່ງເສັ້ນທາງ”; ເລັ່ງຈັດຕັ້ງປະຕິບັດຍຸດທະສາດເຂດການຄ້າເສລີ ເຊິ່ງເຄືອຂ່າຍເຂດການຄ້າເສລີທີ່ມີມາດຕະຖານສູງທີ່ຕັ້ງພື້ນຖານຢູ່ປະເທດໃກ້ຄຽງ, ເປີດກວ້າງໄປສູ່ປະເທດຮ່ວມກັນສ້າງ “ໜຶ່ງແລວໜຶ່ງເສັ້ນທາງ ແລະ ມຸ່ງໜ້າສູ່ທົ່ວໂລກໄດ້ສ້າງຂຶ້ນໃນເບື້ອງຕົ້ນ.”
(ປີ 2022, ການທົດລອງປູກແນວພັນເຂົ້າທີ່ປະຢັດນ້ຳແລະຕ້ານທານຄວາມແຫ້ງແລ້ງຂອງຈີນຢູ່ປະເທດໂບສວານາໄດ້ປະສົບຜົນສຳເລັດ. ຈີນໄດ້ຮ່ວມກັບ140ກວ່າປະເທດແລະເຂດແຄວ້ນ ຢູ່ໃນໂລກດຳເນີນການແລກປ່ຽນດ້ານວິທະຍາສາດເຕັກນິກກະສິກຳແລະໄດ້ເຜີຍແຜ່ເຕັກນິກກະສິກຳ 1000ກວ່າເຕັກນິກ)
(ວັນທີ 3ທັນວາ2021, ເສັ້ນທາງລົດໄຟຈີນ-ລາວໄດ້ເປີດນຳໃຊ້ຢ່າງເປັນທາງການເຊິ່ງໄດ້ປ່ຽນແປງປະຫວັດສາດຂອງລາວທີ່ບໍ່ມີທາງລົດໄຟລາງມາດຕະຖານ ທັງໄດ້ປ່ຽນແປງປະຫວັດສາດຂອງກິ່ງແຂວງປົກຄອງຕົນເອງເຜົ່າລື້ສິບສອງພັ່ນນາຈີນທີ່ບໍ່ມີທາງລົດໄຟເຂົ້າເຖິງ)
ສະຫາຍ ສີຈິ້ນຜິງ ກ່າວວ່າ: “ການເປີດປະຕູສູ່ພາຍນອກແມ່ນແຮງຂັບເຄື່ອນອັນສຳຄັນທີ່ຊຸກຍູ້ ຄວາມກ້າວໜ້າຂອງອະລິຍະທຳມວນມະນຸດ, ແມ່ນເສັ້ນທາງທີ່ຕ້ອງເດີນຜ່ານ ຂອງການພັດທະນາໂລກ ໃຫ້ມີຄວາມຈະເລີນຮຸ່ງເຮືອງ.” ມີບົດວິເຄາະເຫັນວ່າ: ສະຫາຍ ສີຈິ້ນຜິງ ໄດ້ນຳພາບຸກເບີກສະພາບການໃໝ່ຂອງໂລກທີ່ຮ່ວມມື ແບບຕ່າງຝ່າຍຕ່າງໄດ້ຮັບຜົນປະໂຫຍດ ເຊິ່ງ ໄດ້ບັນລຸການປ່ຽນແປງຄັ້ງປະຫວັດສາດ ຈາກການທີ່ພັກກອມມູນິດຈີນນຳພາຈີນ ເປີດປະຕູສູ່ພາຍນອກໄປສູ່ການທີ່ຊຸກຍູ້ໃຫ້ປະເທດຕ່າງໆ ໃນໂລກຮ່ວມກັນເປີດປະຕູສູ່ພາຍນອກ ເຊິ່ງໄດ້ເພີ່ມຄວາມມີຊີວິດຊີວາໃຫ້ກັບການພັດທະນາທົ່ວໂລກ.
