ອີງຕາມການມອບໝາຍຂອງລັດຖະບານ, ອົງການໄອຍະການປະຊາຊົນສູງສຸດ ນໍາໂດຍ ທ່ານ ໄຊຊະນະ ໂຄດພູທອນ ກໍາມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ທ່ານ ພົທ ເລືອງ ຕາມ ກວາງ ກໍາມະການສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ໄດ້ລົງນາມໃນ ສົນທິສັນຍາວ່າດ້ວຍການສົ່ງຜູ້ຮ້າຍຂ້າມແດນ ລະຫວ່າງ ສປປ ລາວ ແລະ ສສ ຫວຽດນາມ ໂດຍຊ້ອງໜ້າ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ແລະ ທ່ານ ໂຕ ເລີມ ປະທານປະເທດ ແຫ່ງ ສສ ຫວຽດນາມ ໃນວັນທີ 11 ກໍລະກົດ 2024 ຜ່ານມາ, ທີ່ນະຄອນຫລວງວຽງຈັນ ສປປ ລາວ, ໃນໂອກາດທີ່ ປະທານປະເທດ ແຫ່ງ ສສ ຫວຽດນາມ ທີ່ເດີນທາງມາຢ້ຽມຢາມ ສປປ ລາວ ທາງລັດຖະກິດ, ໃນລະຫວ່າງວັນທີ 11-12 ກໍລະກົດ 2024.
ສົນທິສັນຍາສະບັບນີ້, ເປັນສົນທິສັນຍາສະບັບໃໝ່ທີ່ແຍກອອກຈາກ ສົນທິສັນຍາວ່າດ້ວຍການຮ່ວມມືທາງດ້ານຍຸຕິທໍາ ກ່ຽວກັບບັນຫາແພ່ງ ແລະ ອາຍາ ສະບັບລົງວັນທີ 6 ກໍລະກົດ 1998 ເຊິ່ງໄດ້ຜ່ານການຄົ້ນຄ້ວາ, ເຈລະຈາສອງຝ່າຍ ແລະ ຕົກລົງເຫັນດີເປັນເອກະພາບດ້ານເນື້ອໃນຢ່າງຄົບຖ້ວນສົມບູນແລ້ວ ເຊິ່ງເນື້ອໃນສົນທິສັນຍາດັ່ງກ່າວ, ໄດ້ຄົ້ນຄວ້າພິຈາລະນາ ບົນພື້ນຖານ ກົດໝາຍວ່າດ້ວຍການສົ່ງຜູ້ຮ້າຍຂ້າມແດນ ສະບັບປີ 2012 ຂອງ ສປປ ລາວ, ບັນດາກົດໝາຍພາຍໃນທີ່ກ່ຽວຂ້ອງ, ບັນ ດາສົນທິສັນຍາສອງຝ່າຍ ແລະ ຫລາຍຝ່າຍ ທີ່ ສປປ ລາວ ເປັນພາຄີ ແລະ ລວມທັງ ກົດໝາຍທີ່ກ່ຽວຂ້ອງຂອງ ສສ ຫວຽດນາມ, ສົນທິສັນຍາສະບັບໃໝ່ນີ້ ໄດ້ກໍານົດຫລັກການ ແລະ ວິທີການພື້ນ ຖານໃນການພິຈາລະນາການສົ່ງຜູ້ຮ້າຍຂ້າມແດນ, ການກະທໍາຜິດທີ່ພາໃຫ້ສົ່ງຜູ້ຮ້າຍຂ້າມແດນ, ການປະຕິເສດ, ຂັ້ນຕອນການພິຈາລະນາ, ຊ່ອງທາງໃນການສົ່ງ-ຮັບ ແລະ ກໍານົດອົງການໃຈກາງປະສານງານກ່ຽວກັບວຽກງານດັ່ງກ່າວ, ເຊິ່ງອົງການໃຈກາງປະສານງານກ່ຽວກັບການສົ່ງຜູ້ຮ້າຍຂ້າມແດນ ຂອງ ສປປ ລາວ ແມ່ນອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ອົງການໃຈກາງປະສານງານຂອງ ສສ ຫວຽດນາມແມ່ນ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ.
ສົນທິສັນຍາດັ່ງກ່າວ, ຈະປ່ຽນແທນສົນທິສັນຍາວ່າດ້ວຍການຮ່ວມມື ທາງດ້ານຍຸຕິທໍາກ່ຽວກັບບັນຫາແພ່ງ ແລະ ອາຍາ ລະຫວ່າງ ສປປ ລາວ ແລະ ສສ ຫວຽດນາມ ສະບັບລົງວັນທີ 6 ກໍລະກົດ 1998 ແລະ ຈະເປັນພື້ນຖານສໍາຄັນໃຫ້ແກ່ ການຮ່ວມມືທາງດ້ານກົດໝາຍລະຫວ່າງສອງຝ່າຍ ໃນການສົ່ງຜູ້ຮ້າຍຂ້າມແດນ, ຮັບປະກັນໃຫ້ຜູ້ກະທໍາຜິດ ໄດ້ຮັບການລົງໂທດ ປະກອບສ່ວນໃນການຕ້ານອາຊະຍາກຳຂ້າມຊາດ, ສະກັດກັ້ນການກະທຳຜິດ, ປົກປ້ອງຜົນປະໂຫຍດຂອງລັດ, ລວມໝູ່, ສິດ ແລະ ຜົນປະໂຫຍດອັນຊອບທຳຂອງພົນລະເມືອງ ຂອງສອງປະເທດ ລາວ ແລະ ຫວຽດນາມ ຢ່າງມີປະສິດທິຜົນ, ປະກອບສ່ວນສຳຄັນເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ລາວ-ຫວຽດນາມ ໂດຍສະເພາະ ການພົວພັນຮ່ວມມື ລະຫວ່າງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ໃຫ້ໄດ້ຮັບການພັດທະນາສູ່ລວງເລິກ ແລະ ເກີດດອກອອກຜົນຍິ່ງຂຶ້ນ ຢ່າງບໍ່ຢຸດຢັ້ງ.
