ກົມສື່ສານ ກົມໃຫຍ່ເສນາທິການກອງທັບ ໄດ້ຈັດຕັ້ງພາກສ່ວນຮັບປະກັນວຽກງານຕິດຕໍ່ສື່ສານເຂົ້າປະຈໍາຢູ່ພາກສະໜາມ ໃຫ້ມີຄວາມຮັບປະກັນໄດ້ຕາມວຽກງານໜ້າທີ່ວິຊາສະເພາະ ເພື່ອເປັນການປະກອບສ່ວນໃຫ້ການຊ້ອມຮົບຮ່ວມລາວ-ຈີນ “ໂລ້ກໍາບັງມິດຕະພາບ-2024” ມີຜົນສໍາເລັດຕາມແຜນການ.
ສະຫາຍ ພັນໂທ ດອນສະຫວັນ ບົນຄໍາພັນ ຫົວໜ້າພະແນກເສນາ ກົມສື່ສານ, ອະນຸກໍາມະການຮັບປະກັນວຽກງານສື່ສານພາກສະໜາມ ໄດ້ໃຫ້ສໍາພາດວ່າ: ພາຍຫລັງໄດ້ຮັບການມອບໝາຍໜ້າທີ່ຈາກກົມໃຫຍ່ເສນາທິການກອງທັບ ໃນການຊ້ອມຮົບຮ່ວມລາວ-ຈີນ “ໂລ້ກໍາບັງມິດຕະພາບ-2024” ໂດຍໄດ້ຫ້າງຫາກະກຽມທາງດ້ານກໍາລັງ, ພາຫະນະ ແລະ ອຸປະກອນສື່ສານ ເພື່ອເຂົ້າຮັບປະກັນໃນການຊ້ອມຮົບໃນຄັ້ງນີ້, ໃນນີ້, ໄດ້ນຳໃຊ້ກໍາລັງ 6 ກົມກອງສື່ສານເຂດໃຈກາງ, ນຳໃຊ້ພາຫະນະໃຊ້ລົດວິຊາສະເພາະ 6 ຄັນ ແລະ ດ້ານອຸປະກອນສື່ສານ ກໍໄດ້ຄັດເລືອກເອົາອຸປະກອນທີ່ມີຄຸນນະພາບດີເຂົ້າມາຮັບໃຊ້ໃນວຽກງານຮັບປະກັນຄັ້ງນີ້. ພາຍຫລັງກະກຽມກໍາລັງ, ພາຫະນະ ແລະ ອຸປະກອນສໍາເລັດແລ້ວ ກໍໄດ້ຈັດຝຶກອົບຮົບໃຫ້ພະນັກງານ-ນັກຮົບວິຊາສະເພາະ ເພື່ອໃຫ້ມີຄວາມຊໍານິຊໍານານໃນການ ນໍາໃຊ້ອຸປະກອນສື່ສານຕ່າງໆ, ເມື່ອຝຶກອົບຮົມສຳເລັດແລ້ວ ກົມໃຫຍ່ເສນາທິການກອງທັບ ກໍໄດ້ອອກ ຄໍາສັ່ງແຕ່ລະພາກສ່ວນເຂົ້າຢຶດສະໜາມ. ໃນນີ້, ຜັນຂະຫຍາຍລະບົບຕິດຕໍ່ສື່ສານໃນ 3 ທາງຕິດຕໍ່ ເຊັ່ນ: ດ້ວຍລະບົບວິທະຍຸໂຟນີ້, ລະບົບໂທລະສັບ 2 ລະບົບ ຄື: ໂທລະສັບທາງພາກສະໜາມ ແລະ ໂທລະສັບໃນຕົວເມືອງ ຫລື ໂທລະສັບໂອໂຕເມຕິກ ແລະ ທາງຕິດຕໍ່ສື່ສານທາງດ້ານອິນເຕີເນັດ ເຊິ່ງທັງ 3 ທາງຕິດຕໍ່ນີ້ ໄດ້ຮັບປະກັນໃຫ້ທັງສອງກໍາລັງລາວ-ຈີນ ສາມາດຮັບປະກັນໄດ້ 100%.
ສະຫາຍ ພັນໂທ ດອນສະຫວັນ ບົນຄໍາພັນ ຍັງໃຫ້ຮູ້ອີກວ່າ: ພາຍຫລັງສໍາເລັດການຝຶກຊ້ອມຮ່ວມໃນຄັ້ງນີ້, ກໍໄດ້ຈັດຕັ້ງສະຫລຸບຖອດຖອນບົດຮຽນກັບ ກອງທັບປົດປ່ອຍປະຊາຊົນຈີນ ເປັນຕົ້ນແມ່ນວຽກງານຮັບປະກັນຕິດຕໍ່ສື່ສານ ເພື່ອຈະນໍາເອົາບົດຮຽນໄປປັບປຸງເປັນບົດຮຽນໃນຄັ້ງຕໍ່ໄປ ເພື່ອເຮັດໃຫ້ເຫລົ່າຮົບສື່ສານ ມີຄວາມເຂັ້ມແຂງ, ມີຄວາມຮັບປະກັນ ດັ່ງຄໍາຂວັນທີ່ວ່າ: ປິດລັບ, ປອດໄພ, ວ່ອງໄວ, ຊັດເຈນ.
ຂ່າວ: ຄຳອ້າຍ ທອງວັນ
