ແຫລ່ງຂ່າວຈາກແຂວງຜົ້ງສາລີ ໃຫ້ຮູ້ວ່າ: ທ່ານ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ຕິດຕາມຊຸກຍູ້ຄວາມຄືບໜ້າຂອງການຈັດຕັ້ງປະຕິບັດໂຄງການກໍ່ສ້າງ ຕຶກສະພາປະຊາຊົນ ຂັ້ນແຂວງ ຜົ້ງສາລີ ໃນວັນທີ 15 ກໍລະກົດ 2024 ໂດຍມີທ່ານ ທອງສີ ເສົາສຸລິພົມ ປະທານສະພາປະຊາຊົນແຂວງ ພ້ອມພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ຫຸມເພັງ ຈອມວິສານ ຮອງປະທານສະພາປະຊາຊົນແຂວງຜົ້ງສາລີ ໄດ້ລາຍງານວ່າ: ໂຄງການກໍ່ສ້າງອາຄານຫ້ອງວ່າການ ສະພາປະຊາຊົນແຂວງ ເຊິ່ງປະຈໍາເຂດເລືອກຕັ້ງທີ 2 ແຂວງຜົ້ງສາລີ ເປັນໂຄງການຈັດລຽງບຸລິມະສິດ ຂອງສະພາແຫ່ງຊາດ ຊຸດທີ VII ແລະ ເປັນໂຄງການທີ່ນອນຢູ່ໃນແຜນພັດທະນາພື້ນຖານໂຄງລ່າງຂອງແຂວງຜົ້ງສາລີ ໃນການຍົກຍ້າຍເທສະບານແຂວງ ຈາກເທສະບານເມືອງຜົ້ງສາລີ ມາພັດທະນາຢູ່ເທສະບານເມືອງບຸນເໜືອ, ເຊິ່ງການດໍາເນີນໂຄງການດັ່ງກ່າວ, ພາຍໃຕ້ການຊີ້ນໍາ ຂອງສະພາແຫ່ງຊາດ ນັບແຕ່ການສໍາຫລວດ-ອອກແບບ ແລະ ຂັ້ນຕອນການດໍາເນີນງານແຕ່ຕົ້ນ ຈົນສໍາເລັດໂຄງການ ໂດຍໃຊ້ເວລາດໍາເນີນການກໍ່ສ້າງ 36 ເດືອນ ຫລື 3 ປີ ໂດຍແມ່ນບໍລິສັດຈິດຈະເລີນກໍ່ສ້າງ ຈໍາກັດ ເປັນຜູ້ຮັບເໝົາກໍ່ສ້າງ ມູນຄ່າເບື້ອງຕົ້ນ 40,5 ຕື້ກວ່າກີບ, ໂຄງການນີ້ ແມ່ນໄດ້ດໍາເນີນການກໍ່ສ້າງນັບແຕ່ກາງປີ 2014 ຈົນຮອດທ້າຍປີ 2017 ແລະ ໄດ້ນໍາໃຊ້ຕາມວັດຖຸປະສົງທີ່ສະພາແຫ່ງຊາດກໍານົດໄວ້. ສໍາລັບແຫລ່ງທຶນການກໍ່ສ້າງ ແມ່ນນໍາໃຊ້ງົບປະມານຂອງລັດ ໂດຍແມ່ນສະພາແຫ່ງຊາດຂຶ້ນແຜນຊໍາລະສະສາງເລີ່ມແຕ່ສົກ 2013-2014 ເປັນຕົ້ນມາ ແລະ ມາຮອດປີ 2023 ໄດ້ຊໍາລະສະສາງແລ້ວ 34,2 ຕື້ກວ່າກີບ. ໃນໄລຍະດໍາເນີນການຈັດຕັ້ງປະຕິບັດໂຄງການກໍ່ສ້າງອາຄານສະພາປະຊາຊົນແຂວງ ແມ່ນມີການດັດແກ້ແຜນຜັງກໍ່ສ້າງ ເຊິ່ງການດັດແກ້ດັ່ງກ່າວ ໄດ້ເຮັດໃຫ້ມີວຽກເພີ່ມເກີດຂຶ້ນ ຈໍານວນ 5 ໜ້າວຽກ ຄື: ຕໍ່ເຕີມອາຄານຊັ້ນທີ 2 ທັງສອງເບື້ອງ (ຫ້ອງປະຊຸມທາງໄກ ແລະ ຫ້ອງສະໝຸດ); ເພີ່ມຫ້ອງນໍ້າ; ເພີ່ມໂຄງເຫລັກເສີມເພດານເຮັດທາງຍ່າງເພື່ອສ້ອມແປງບໍາລຸງ; ປ່ຽນລະບົບເຄື່ອງສຽງ ແລະ ເຄື່ອງໂຫວດລົງຄະແນນສຽງ ແລະ ປັບປຸງເວທີຫ້ອງປະຊຸມ ລວມມູນຄ່າວຽກເພີ່ມທັງໝົດ 3,6 ຕື້ກວ່າກີບ.
ສຳລັບໂຄງການກໍ່ສ້າງກັນເຈື່ອນອ້ອມຕອນດິນອາຄານສະພາປະຊາຊົນແຂວງ ເປັນໂຄງການໜຶ່ງທີ່ມີຄວາມຈໍາເປັນ. ເນື່ອງຈາກວ່າ, ສະພາບພື້ນທີ່-ທີ່ຕັ້ງ ທີ່ຢູ່ເນີນພູສູງ, ເປັນປະເພດດິນຜຸຜ່ອຍ, ມີຄຸນນະພາບຕໍ່າ ຈຶ່ງໄດ້ສະເໜີແນວຄວາມຄິດທີ່ຈະກໍ່ສ້າງກັນເຈື່ອນອ້ອມສໍານັກງານ ເຊິ່ງເປັນໂຄງການສະເໜີໃໝ່ ມີມູນຄ່າກໍ່ສ້າງ 7,6ກວ່າລ້ານກີບ. ພ້ອມກັນນີ້, ທ່ານຍັງສະເໜີຄະນະປະຈໍາສະພາແຫ່ງຊາດ ຊ່ວຍຕິດຕາມກວດກາ ແລະ ຊຸກຍູ້ ກະຊວງແຜນການ ແລະ ການລົງທຶນ ກ່ຽວກັບການດັດແກ້ມູນຄ່າວຽກເພີ່ມ 3,6 ຕື້ກວ່າກີບ ເຂົ້າແຜນການລົງທຶນຂອງລັດຖະບານ ຕື່ມອີກ.
ຂ່າວ-ພາບ: ແສງຄຳ ສາລີວັນ
