ພິທີສະເຫຼີມສະຫຼອງວັນອະນຸລັກສັດນ້ຳ-ສັດປ່າ ແລະ ວັນປ່ອຍປາແຫ່ງຊາດ ຄົບຮອບ 27 ປີ (13 ກໍລະກົດ 1997-13 ກໍລະກົດ 2024) ຢູ່ແຂວງໄຊສົມບູນ ໄດ້ຈັດຂຶ້ນໃນວັນທີ 11 ກໍລະກົດ 2024 ທີ່ ວັງສະຫງວນນ້ຳຈັ້ງ, ບ້ານພູຫົວຊ້າງ, ເມືອງອະນຸວົງ ແຂວງໄຊສົມບູນ ໂດຍການເຂົ້າຮ່ວມຂອງທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ.
ຕະຫຼອດໄລຍະຜ່ານມາ ພະແນກກະສິກຳ ແລະ ປ່າໄມ້ ໄດ້ສົບທົບກັບ ຫ້ອງການກະສິກຳ ແລະ ປ່າໄມ້ ເມືອງອະນຸວົງ ຈັດພິທີສະເຫຼີມສະຫຼອງວັນອະນຸລັກສັດນ້ຳ-ສັດປ່າ ຊຶ່ງສາມາດປ່ອຍໄປໄດ້ທັງໝົດ 15 ຄັ້ງ ລວມຈຳນວນປາທີ່ປ່ອຍ 451.500 ໂຕ (ລວມທັງປີນີ້); ສະເພາະປີນີ້ ແມ່ນປ່ອຍປາທັງໝົດ 5.000 ໂຕ ໃນນັ້ນມີ ປານິນ, ປາໄນ ແລະ ປາປາກ ເພື່ອເປັນການປ່ອຍປາກັບຄືນສູ່ແຫຼ່ງນ້ຳທຳມະຊາດ, ເຮັດໃຫ້ສັດນໍ້າ-ສັດປ່າ ຢູ່ຕາມທໍາມະຊາດ ມີຄວາມສົມດູນກັບລະບົບນິເວດ ເນື່ອງຈາກໄລຍະຜ່ານມາການອະນຸລັກສັດນ້ຳ-ສັດປ່າ ແມ່ນຍັງບໍ່ທັນຮັດກຸມ ແລະ ມີຊ່ອງຫວ່າງຫຼາຍດ້ານ ເປັນຕົ້ນແມ່ນປະຊາຊົນສ່ວນໜຶ່ງຍັງໃຊ້ເຄື່ອງມືຫາປາລ່າສັດແບບດັບສູນ, ຫາປາລ່າສັດບໍ່ຖືກຕ້ອງຕາມລະດູການ ແລະ ຫາປາລ່າສັດບໍ່ຈຳກັດຂະໜາດ ຈຶ່ງເປັນສາເຫດທີ່ເຮັດໃຫ້ສັດນ້ຳ-ສັດປ່າຫຼຸດລົງ.
ຂ່າວ: ແຂວງໄຊສົມບູນ
