ກອງປະຊຸມພົບປະການຮ່ວມມືດ້ານອຸດສາຫະກຳການທ່ອງທ່ຽວລາວ-ຈີນ ໄດ້ຈັດຂຶ້ນໃນວັນທີ 3 ກໍລະກົດຜ່ານມາ ທີ່ຫໍວັດທະນາທໍາແຫ່ງຊາດ ນະຄອນຫຼວງວຽງຈັນ ໂດຍການເປັນປະທານຂອງ ທ່ານນາງ ດາລານີ ພົມມະວົງສາ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ມີທ່ານ ສາລີ ພິມພິນິດ ປະທານສະມາຄົມສົ່ງເສີມການທ່ອງທ່ຽວລາວ-ຈີນ, ທ່ານ ຈາງ ຊີຫຼົງ ອະດີດຮອງຫົວໜ້າກົມ ເຈົ້າໜ້າທີ່ອາວຸໂສຂັ້ນ 1 ກົມພົວພັນ ແລະ ຮ່ວມມືສາກົນກະຊວງວັດທະນະທຳ ແລະ ທ່ອງທ່ຽວແຫ່ງ ສປ ຈີນ, ທ່ານ ຢູ ຈີນຟາງ ປະທານສະພາການທ່ອງທ່ຽວຈີນ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານນາງ ດາລານີ ພົມມະວົງສາ ໄດ້ມີຄຳເຫັນວ່າ: ກອງປະຊຸມພົບປະແລກປ່ຽນຄັ້ງນີ້ ແມ່ນເວທີໜຶ່ງທີ່ມີຄວາມໝາຍສໍາຄັນເພື່ອເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ການເປັນຄູ່ຮ່ວມຍຸດທະສາດຮອບ ດ້ານໝັ້ນຄົງຍາວນານຕາມທິດ 4 ດີ ແລະ ການເປັນຄູ່ຮ່ວມຊາຕາກໍາລາວ- ຈີນ, ຈີນ-ລາວ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ນັບມື້ໄດ້ຮັບການເພີ່ມພູນຄູນສ້າງຢ່າງຕໍ່ເນື່ອງ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ເວົ້າລວມ, ເວົ້າສະເພາະ ການສົ່ງເສີມການທ່ອງທ່ຽວເປັນໜຶ່ງໃນແຜນວຽກບຸລິມະສິດທີ່ສໍາຄັນຂອງລັດຖະບານລາວ ພາຍໃຕ້ການສະໜັບສະໜູນຮ່ວມມືຢ່າງຈິງໃຈຂອງ ສປ ຈີນ ໃນໄລຍະຜ່ານມາ.ຜົນຂອງກອງປະຊຸມຄັ້ງນີ້ ຍັງຈະສົ່ງຜົນດີໃຫ້ແກ່ ສປປ ລາວ ໃນການສົ່ງເສີມທ່າແຮງດ້ານການທ່ອງທ່ຽວ ໃຫ້ຄະນະຜູ້ແທນຈາກ ສປ ຈີນ ໄດ້ຮັບຮູ້ ແລະ ສ້າງກາລະໂອກາດໃນການລົງທຶນດ້ານການທ່ອງທ່ຽວຢູ່ ສປປ ລາວ ຕື່ມອີກ ຫວັງຢ່າງຍິ່ງວ່າ ການເປີດປີທ່ອງທ່ຽວລາວ 2024 ນີ້ຈະເປັນໂອກາດອັນດີເພື່ອໃຫ້ປະຊາຊົນຈີນ ກໍຄືນັກທ່ອງທ່ຽວຕ່າງປະເທດຈາກທຸກມຸມໂລກໄດ້ມາຢ້ຽມຢາມ, ທ່ອງທ່ຽວສະຖານທີ່ທ່ອງທ່ຽວວັດທະນະທໍາ ທໍາມະຊາດ ແລະ ປະຫວັດສາດທີ່ມີຄວາມຫຼາກຫຼາຍຂອງ ສປປ ລາວ ທັງໄດ້ຮັບຮູ້ເຂົ້າໃຈເມື່ອມາສໍາຜັດດ້ວຍຕົນເອງໃນຄວາມຫຼາກຫຼາຍ, ຄວາມສວຍງາມ, ຄວາມໂດດເດັ່ນ ແລະ ເປັນເອກະລັກຂອງວັດທະນະທໍາລາວ ໂດຍຜ່ານການນໍາໃຊ້ເສັ້ນທາງລົດໄຟລາວ-ຈີນ ໂດຍສະເພາະໃນໄລຍະປີທ່ອງທ່ຽວລາວ 2024 ລັດຖະບານ ສປປ ລາວ ໄດ້ມີນະໂຍບາຍຍົກເວັ້ນວີຊາແບບບໍ່ຕິດວີຊາສະຕິກເກີ້ສໍາລັບນັກທ່ອງທ່ຽວຈີນ, ຮົງກົງ, ມາເກົາ ທີ່ຖືໜັງສືຜ່ານແດນທໍາມະດາ ລວມທັງນັກທ່ອງທ່ຽວຈີນທີ່ເປັນກຸ່ມທີ່ຖືໜັງສືຜ່ານແດນໄຕ້ຫວັນແມ່ນອອກວີຊາປິວ ແຕ່ບໍ່ຕິດວີຊາສະຕິກເກີ້ທີ່ມາທ່ອງທ່ຽວເປັນກຸ່ມໃນນາມບໍລິສັດນໍາທ່ຽວ ສາມາດພັກເຊົາໄດ້ 15 ວັນແຕ່ຕ້ອງໃຫ້ຜ່ານການບໍລິການຂອງບໍລິສັດ ນໍາທ່ຽວຢູ່ ສປປ ລາວ ແລະ ໄດ້ລົງທະບຽນຮັບຮອງຈາກກະຊວງ ຖວທ.
ຂ່າວ: ຍຸພິນທອງ, ພາບ: ບຸນອູ້ມ
