ກົມໃຫຍ່ວິທະຍຸ ແລະ ໂທລະພາບແຫ່ງຊາດຈີນ, ກະຊວງຖະແຫຼງຂ່າວ ແລະ ສື່ສານ ສສ ຫວຽດນາມ ແລະ ອໍານາດການປົກຄອງທ້ອງຖິ່ນປະຊາຊົນແຂວງຢຸນນານ ໄດ້ເປີດງານສັບປະດາພາບ ແລະ ສຽງແມ່ນໍ້າຂອງ-ແມ່ນໍ້າລ້ານຊ້າງ (Lancang-Mekong Audiovisual Week) ຄັ້ງທີ 5 ພາຍໃຕ້ຫົວຂໍ້: ສາຍພູ ສາຍນໍ້າຕິດຈອດກັນ ມໍລະດົກ ແລະ ວັດທະນະທຳ ເລົ່າເລື່ອງລາວທີ່ສວຍງາມຂຶ້ນຢ່າງເປັນທາງການໃນວັນທີ 17 ມິຖຸນາຜ່ານມາ ທີ່ນະຄອນຄຸນໝິງ ແຂວງຢຸນນານ ສປ ຈີນ ໂດຍການເປັນກຽດເຂົ້າຮ່ວມເປີດງານຂອງທ່ານ ຢ່າງກົ້ວຣຸ້ຍ(Yang Guo rui) ຮອງຫົວໜ້າກົມໃຫຍ່ວິທະຍຸ ແລະ ໂທລະພາບແຫ່ງຊາດຈີນ, ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫຍ່ໜັງສືພິມປະຊາຊົນ ສປປ ລາວ, ມີຫົວໜ້າພະແນກໂຄສະນາ ແລະ ອົບຮົມແຂວງຢຸນນານ, ມີຮອງເຈົ້າແຂວງຢຸນນານ, ຄະນະນໍາອົງການສື່ມວນຊົນຈາກ 6 ປະເທດ ແມ່ນໍ້າຂອງ-ແມ່ນໍ້າລ້ານຊ້າງ, ສື່ມວນຊົນ ພ້ອມດ້ວຍແຂກຖືກເຊີນເຂົ້າຮ່ວມ.
ການຈັດງານໃນຄັ້ງນີ້ ແນໃສ່ສືບຕໍ່ເພີ່ມທະວີຄວາມເຂົ້າໃຈ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນຂອງປະຊາຊົນຈີນຢາງບໍ່ຢຸດຢັ້ງ ໂດຍຜ່ານມໍລະດົກວັດທະນະທໍາທີ່ບໍ່ເປັນວັດຖຸ, ທີ່ມີເອກະລັກຂອງປະເທດຕ່າງໆ ຈາກບັນດາປະເທດອາຊີໃຕ້ ແລະ ອາຊີຕາເວັນອອກສ່ຽງໃຕ້ກັບປະເທດຈີນ ເຮັດໃຫ້ຄວາມສີວິໄລຂອງປະເທດຕ່າງໆມີການສືບທອດ ແລະ ປະດິດສ້າງໃໝ່ ແລະ ການພັດທະນາ, ການປົກປັກຮັກສາໂດຍຜ່ານການຮ່ວມມື, ງານໃນຄັ້ງນີ້ຖືໄດ້ວ່າ ເປັນງານມະໂຫລານຈັດຂຶ້ນຢ່າງອະລັງການ ແລະ ສວຍງາມເຊັ່ນ: ມີການສະແດງສິລະປະວັດທະນະທຳຂອງບັນດາປະເທດແມ່ນໍ້າຂອງ-ແມ່ນໍ້າລ້ານຊ້າງ, ການຮ້ອງເພງ, ການສາຍວີດີໂອສັ້ນ Generation Z (3 ລະດູການ), ການສະແດງບັນດາລາຍການພາບດີເດັ່ນແມ່ນໍ້າຂອງ-ແມ່ນ້ຳລ້ານຊ້າງ ແລະ ການທ່ອງທ່ຽວສະບາຍດີຢຸນນານ ສປຈີນ. ພ້ອມນັ້ນ, ຍັງມີງານວາງສະແດງລາຍການທ່ອງທ່ຽວສື່ມວນຊົນຈີນສວຍງາມ-ຊີວິດທີ່ສະຫງ່າງາມຢູ່ແຂວງຢຸນນານ ແລະ ກິດຈະກຳອື່ນໆ ຊຶ່ງຜົນງານທີ່ນໍາມາສະແດງລ້ວນແຕ່ ສະແດງໃຫ້ເຫັນການຮ່ວມມືບັນດາປະເທດລ້ານຊ້າງ-ແມ່ນໍ້າຂອງ ທັງເປັນການເພີ່ມທະວີການແລກປ່ຽນ ແລະ ການຮ່ວມມືດ້ານພາບ-ສຽງ ປະກອບສ່ວນຊຸກຍູ້ການກໍ່ສ້າງປະຊາຄົມອາຊຽນໃຫ້ມີໃນອະນາຄົດ. ໃນນັ້ນ, ບັນດາປະເທດລ້ານຊ້າງ-ແມ່ນໍ້າຂອງມີພູມສາດທີ່ໃກ້ຊິດ ແລະ ມີການພົວພັນທາງດ້ານວັດທະນະທຳ, ມີວຽກງານວິທະຍຸ ແລະ ໂທລະພາບດີເດັ່ນເປັນຂົວຕໍ່ເພື່ອເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະ ກັນຂອງປະຊາຊົນຕື່ມອີກ ທັງໄດ້ກາຍເປັນເວທີທີ່ມີຄວາມສໍາຄັນຫຼາຍຂຶ້ນ ສໍາລັບການຮ່ວມມືສື່ມວນຊົນ ແລະ ການແລກປ່ຽນວັດທະນະທໍາ ລະຫວ່າງບັນດາປະເທດລ້ານຊ້າງ-ແມ່ຂອງ.
ໃນງານຄັ້ງນີ້, ບັນດາຜູ້ແທນອົງການສື່ມວນຊົນທັງ 6 ປະເທດລ້ານຊ້າງ-ແມ່ນໍ້າຂອງ ໄດ້ຜັດປ່ຽນກັນຂຶ້ນມີຄໍາເຫັນ. ໂອກາດນີ້, ທ່ານ ວັນໄຊ ຕະວິນຍານ ໄດ້ມີຄໍາເຫັນວ່າ: ການຈັດງານໃນຄັ້ງນີ້ ຖືເປັນບາດກ້າວທີ່ສໍາຄັນໃນການຮ່ວມມືດ້ານກິດຈະການສື່ມວນຊົນຂອງ 6 ປະເທດລຸ່ມແມ່ນໍ້ຂອງ-ແມ່ນໍ້າລ້ານຊ້າງ ຊຶ່ງມີເປົ້າໝາຍ ແລະ ຈຸດປະສົງຮ່ວມກັນໃນການເສີມສ້າງສັນຕິພາບ ແລະ ສະຖຽນລະພາບຂອງພາກພື້ນ, ຫຼຸດຜ່ອນຄວາມແຕກໂຕນກັນດ້ານການພັດທະນາ, ເພີ່ມທະວີການຮ່ວມມື ແລະ ຮ່ວມກັນສ້າງປະຊາຄົມຮ່ວມຊາຕາກຳຂອງປະເທດລຽບຕາມແມ່ນໍ້າຂອງ-ແມ່ນໍ້າລ້ານຊ້າງ ດ້ວຍການສ້າງຄວາມເຂົ້າອົກເຂົ້າໃຈກັນ, ສາມັກຄີຊ່ວຍເຫຼືອເຊິ່ງກັນ ແລະ ກັນ, ເພີ່ມທະວີການປຶກສາຫາລື ແລະ ແລກປ່ຽນການພົວພັນຮ່ວມມືຢ່າງສະເໝີພາບ, ຕ່າງຝ່າຍຕ່າງໄດ້ຮັບຜົນປະ ໂຫຍດຮ່ວມກັນພ້ອມສົ່ງເສີມ ແລະ ແລກປ່ຽນປະສົບການໃນການຜະລິດ, ການເຜີຍແຜ່ເນື້ອໃນຂໍ້ມູນຂ່າວສານຕ່າງໆ ຜ່ານຊ່ອງທາງຂອງສື່ມວນຊົນທັງສື່ແບບເກົ່າ ແລະ ແບບໃໝ່ ເປັນການເພີ່ມທະວີການຮ່ວມມີທາງດ້ານອຸດສາຫະກຳ, ວິທະຍຸ, ໂທລະພາບ, ຮູບເງົາ ລວມທັງການພັດທະນາຊັບພະຍາກອນມະນຸດ, ນະໂຍບາຍ, ເຕັກໂນໂລຊີ ແລະ ຮູບແບບວິທີການຕ່າງໆຂອງສື່ມວນຊົນ. ເຊື່ອແນ່ວ່າໃນງານສັບປະດາພາບ ແລະ ສຽງແມ່ນໍ້າ
ຂອງ-ແມ່ນໍ້າລ້ານຊ້າງ, ກອງປະຊຸມເວທີປຶກສາຫາລື ແລະ ກິດຈະກໍາປິ່ນອ້ອມຄັ້ງນີ້ ບັນດາທ່ານຜູ້ແທນອົງການ ສື່ມວນຊົນທັງ 6 ປະເທດຈະໄດ້ຊົມໃຊ້ກາລະໂອກາດນີ້ຮ່ວມກັນປຶກສາຫາລື ເພື່ອຮ່ວມກັນພັດທະນາ ແລະ ຊຸກຍູ້ເຮັດໃຫ້ການຮ່ວມມືໃນດ້ານຕ່າງໆລະຫວ່າງ 6 ປະເທດໃນພາກພື້ນຂອງພວກເຮົານີ້ໄດ້ຮັບຜົນສໍາເລັດຢ່າງໜ້າເພິ່ງພໍໃຈ ແລະ ໃຫຍ່ຫຼວງກວ່າເກົ່າ.
ຈາກນັ້ນ, ບັນດາຜູ້ແທນອົງການສື່ມວນຊົນປະເທດລ້ານຊ້າງ-ແມ່ນໍ້າຂອງໄດ້ໄປຢ້ຽມຢາມ, ທັດສະນະ, ທ່ຽວຊົມສະຖານທີ່ຕ່າງໆທີ່ເກົ່າແກ່ ແລະ ມີຊື່ສຽງ, ທ່ຽວຊົມວິຖີການດໍາລົງຊີວິດ, ທຳມະຊາດອັນສວຍງາມຂອງແຂວງ ຢຸນນານຕື່ມອີກ. ຂ່າວ-ພາບ: ວັນເພັງ
