ໃນວາລະດຳເນີນ ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ວັນທີ 17 ມິຖຸນາ 2024 ນີ້, ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ລາຍງານກ່ຽວກັບ ການເຄື່ອນ ໄຫວວຽກງານແຕ່ກອງປະຊຸມສະໄໝສາມັນ ເທື່ອທີ 6 ຫາ ເທື່ອທີ 7 ແລະ ແຜນການຮອດກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX. ຈາກນັ້ນ, ບັນດາສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງຕ່າງໆ ໄດ້ສຸມໃສ່ປະກອບຄຳຄິດຄຳເຫັນ ໃສ່ບົດລາຍງານດັ່ງກ່າວ ໃນຫລາຍບັນຫາສຳຄັນ ໂດຍສະເພາະ ສະເໜີ ໃຫ້ສະພາແຫ່ງຊາດ ຈັດສັນງົບປະມານ ດ້ານການເຄື່ອນໄຫວພົບປະກັບປະຊາຊົນໃນເຂດຫ່າງໄກສອກຫລີກ ຕື່ມອີກ.
ທ່ານ ສີຄໍາ ບຸນມີໄຊ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 8 ແຂວງຫົວພັນ ໄດ້ປະກອບຄຳເຫັນ ໃນຫລາຍບັນຫາສຳຄັນ ໂດຍໄດ້ສະເໜີໃຫ້ສະພາແຫ່ງຊາດ ຈັດສັນງົບປະມານເຂົ້າໃນວຽກງານການເຄື່່ອນໄຫວພົບປະກັບປະຊາຊົນໃນເຂດຫ່າງໄກສອກຫລີກ ຕື່ມອີກ ເພື່ອລົງເລິກ ແລະ ໃກ້ຊິດຕິດແທດ ກັບປະຊາຊົນ ໃຫ້ຫລາຍຂຶ້ນກວ່າເກົ່າ ເພື່ອເຫັນໄດ້ບັນຫາຕ່າງໆທີ່ເກີດຂຶ້ນກັບປະຊາຊົນທ້ອງຖິ່ນ ຢ່າງຈະແຈ້ງ, ເນື່ອງຈາກວ່າ ການລົງພົບປະປະຊາຊົນ ໃນເຂດຫ່າງໄກສອກຫລີກ ໃນໄລຍະຜ່ານມາ ຍັງເຮັດບໍ່ທັນໄດ້ດີເທົ່າທີ່ຄວນ ຍ້ອນງົບປະມານມີຈຳນວນຈໍາກັດ. ນອກຈາກນີ້, ທ່ານຍັງໄດ້ສະເໜີ ໃຫ້ ສະພາແຫ່ງຊາດ ປັບປຸງວຽກງານຕິດຕາມກວດກາຂອງສະພາແຫ່ງຊາດ ໃຫ້ດີຂຶ້ນກວ່າເກົ່າ ໂດຍສະເພາະ ການແກ້ໄຂຜົນຂອງການກວດກາ ໃນໄລຍະຜ່ານມາຍັງເຮັດໄດ້ໜ້ອຍ ເນື່ອງຈາກບັນຫາຕ່າງໆທີ່ປະຊາຊົນສະເໜີຫາສະພາ ແລະ ພາກສ່ວນກ່ຽວຂ້ອງບໍ່ໄດ້ຮັບການແກ້ໄຂ ແລະ ພະຍາ ຍາມສູ້ຊົນແກ້ໄຂຜົນການກວດກາໃຫ້ໄດ້ 60% ຂຶ້ນໄປ ໃນຕໍ່ໜ້າ ໂດຍສະເພາະບັນຫາສະພາບເສດຖະກິດ, ໄພເງິນເຟີ້, ການຂຸດຄົ້ນແຮ່ທາດ ທີ່ສົ່ງຜົນກະທົບຕໍ່ສະພາບແວດລ້ອມ ແລະ ເນັ້ນໜັກໃຫ້ອົງການບໍລິຫານ ຖືສໍາຄັນວຽກງານກວດກາ ຂອງສະພາແຫ່ງຊາດ ແລະ ເປັນເຈົ້າການໃນການຈັດຕັ້ງປະຕິບັດ ແລະ ຖືໂອກາດນີ້ສະຫລຸບຕີລາຄາຄືນ ສາຍດ່ວນ ທີ່ໂທເຂົ້າຫາກອງປະຊຸມສະພາ ໄດ້ຮັບສ່ອງແສງ, ໄດ້ຮັບການແກ້ໄຂຄືແນວໃດ ເພື່ອຮັບປະກັນໃຫ້ ການປະຕິບັດວຽກງານຕົວຈິງມີປະສິທິຜົນ.
ພ້ອມນີ້, ສະມາຊິກສະພາແຫ່ງຊາດ ຫລາຍທ່ານ ຍັງໄດ້ສະເໜີ ໃຫ້ສະພາແຫ່ງຊາດ ປະເມີນການບັງຄັບໃຊ້ກົດໝາຍ ເຊິ່ງເປັນຂໍ້ມູນສຳຄັນໃນການສ້າງ ແລະ ປັບປຸງກົດໝາຍ ເພື່ອເປັນມາດຕະການ ແກ້ໄຂບັນຫາຕ່າງໆ ໄດ້ຢ່າງຖືກຕ້ອງ. ພ້ອມທັງໄດ້ສະແດງຄວາມຊົມເຊີຍຕໍ່ຄວາມເອົາໃຈໃສ່ ຂອງຄະນະປະຈຳສະພາແຫ່ງຊາດ ໃນການນຳພາປະຕິບັດພາລະບົດບາດສິດ ແລະ ໜ້າທີ່ຂອງຕົນ ຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ ໄດ້ຮັບໝາກຜົນໃນຫລາຍດ້ານ ເຖິງວ່າໃນສະພາບປັດຈຸບັນ ພົບກັບຄວາມຫຍຸງຍາກ, ຜະເຊີນກັບວິກິດທາງດ້ານການເງິນ ແລະ ສິ່ງທ້າທາຍຫລາຍຢ່າງ ລວມເຖິງ ສະພາບແວດລ້ອມພາຍນອກ, ສາກົນ ແຕ່ສະພາແຫ່ງຊາດ ຍັງສາມາດຜ່ານຜ່າ ແລະ ປະຕິບັດວຽກງານຕ່າງໆສຳເລັດຕາມແຜນການທີ່ວາງໄວ້.
ຂ່າວ: ທະນູທອງ
ພາບ: ອ່າຍຄຳ
