ໃນໂອກາດວັນປູກຕົ້ນໄມ້ແຫ່ງຊາດ ຄົບຮອບ 44 ປີ (1 ມິຖຸນາ 1980-1 ມິຖຸນາ 2024) ແລະ ວັນເດັກນ້ອຍສາກົນ ຄົບຮອບ 100 ປີ (ວັນທີ 1 ມິຖຸນາ 1924 – 1 ມິຖຸນາ 2024), ໃນວັນທີ 1 ມິຖຸນາ ຜ່ານມາ, ຫ້ອງວ່າການສໍານັກງານປະທານປະເທດ ຮ່ວມກັບ ໂຮງຮຽນວັດທະນະທຳຊົນເຜົ່າກອງທັບ (ຮວຜທ) ຈັດຂະບວນການປູກຕົ້ນໄມ້ ຢູ່ ໂຮງຮຽນດັ່ງກ່າວ ໂດຍມີ ທ່ານ ນາງ ປານີ ຢາທໍ່ຕູ້ ຮອງປະທານປະເທດ, ມີການນໍາກະຊວງ, ບັນດາກົມໃຫຍ່, ຫ້ອງວ່າການກະຊວງປ້ອງກັນປະເທດ, ບໍລິສັດ, ຄະນະພັກ-ຄະນະອໍານວຍການ, ພະນັກງານ-ນັກຮົບ, ນັກຮຽນ ທົ່ວໂຮງຮຽນວັດທະນະທຳຊົນເຜົ່າກອງທັບ ເຂົ້າຮ່ວມ.
ທ່ານ ນາງ ປານີ ຢາທໍ່ຕູ້ ໄດ້ກ່າວວ່າ: ວັນທີ 1 ມິຖຸນາ ບໍ່ພຽງແຕ່ເປັນວັນແຫ່ງການປົກປ້ອງສິດ ແລະ ຜົນປະໂຫຍດຂອງເດັກເທົ່ານັ້ນ, ແຕ່ຍັງເປັນວັນປູກຕົ້ນໄມ້ແຫ່ງຊາດອີກດ້ວຍ ຕາມການກໍານົດຂອງລັດຖະບານ ຊຶ່ງມາຮອດປີນີ້ ພໍດີຄົບຮອບ 44 ປີ ຊຶ່ງໃນທຸກໆປີ ການນໍາພັກ-ລັດ, ພະນັກງານ, ທະຫານຕໍາຫຼວດ, ນັກຮຽນຮູ້ປັນຍາຊົນ ແລະ ຊັ້ນຄົນຕ່າງໆ ນັບແຕ່ສູນກາງລົງຮອດແຕ່ລະທ້ອງຖິ່ນໃນຂອບເຂດທົ່ວປະເທດ ໄດ້ພາກັນຈັດກິດຈະກຳປູກຕົ້ນໄມ້ໃຫ້ເປັນປ່າຢ່າງເປັນຂະບວນຟົດຟື້ນ ແນໃສ່ເພີ່ມເນື້ອທີ່ປົກຫຸ້ມປ່າໄມ້ໃຫ້ເພີ່ມຂຶ້ນໃນແຕ່ລະປີ. ຕະຫຼອດໄລຍະຜ່ານມາ, ພັກ ແລະ ລັດຖະບານ ເຫັນໄດ້ຄວາມສໍາຄັນຂອງວຽກງານຄຸ້ມຄອງ-ປົກປັກຮັກສາຊັບພະຍາກອນ ທຳມະຊາດ ແລະ ສິ່ງແວດລ້ອມ ໂດຍສະເພາະແມ່ນການປູກ, ການປົກປັກຮັກສາປ່າໄມ້ ຊຶ່ງໄດ້ກໍານົດເອົາຫຼາຍເຂດໃນທົ່ວປະເທດເປັນປ່າປ້ອງກັນ ແລະ ປ່າສະຫງວນ ແລະ ເປັນປ່າຜະລິດ, ອອກນິຕິກຳຫຼາຍສະບັບ ເພື່ອຄຸ້ມຄອງປ່າໄມ້ ແລະ ໄດ້ຮັບການຈັດຕັ້ງປະຕິບັດມີໝາກຜົນຢູ່ແຕ່ລະຂັ້ນ. ສະນັ້ນ, ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ, ກະຊວງປ້ອງກັນປະເທດ ໄດ້ສົມທົບກັບຫ້ອງວ່າການສໍານັກງານປະທານປະເທດ ພ້ອມກັນຈັດກິດຈະກຳປູກຕົ້ນໄມ້ຮ່ວມກັນ ຢູ່ໂຮງຮຽນວັດທະນາທຳຊົນເຜົ່າກອງທັບ ເພື່ອປູກຈິດສໍານຶກ, ຮັກ ແລະ ຫວງແຫນປ່າໄມ້, ສ້າງຄ້າຍຄູສີຂຽວໃຫ້ແກ່ໂຮງຮຽນ ໃຫ້ມີຄວາມສວຍງາມ, ຮົ່ມເຢັນ, ປະກອບສ່ວນເຂົ້າໃນການພັດທະນານະຄອນຫຼວງວຽງຈັນ ຕາມທິດສີຂຽວ ແລະ ຍືນຍົງ. ເພື່ອຮັບປະກັນໃຫ້ແກ່ຕົ້ນໄມ້ແຕ່ລະຕົ້ນທີ່ປູກໄປນັ້ນ ໄດ້ເຕີບໂຕ ແລະ ຂຽວງາມໄປພ້ອມກັບການພັດທະນາຫຼານນ້ອຍນັກຮຽນ, ຈຶ່ງມອບໃຫ້ຄະນະອໍານວຍການຊີ້ນໍາຄູ-ອາຈານຮັບຜິດຊອບໃນແຕ່ລະຫ້ອງຮຽນ ວາງແຜນ ແລະ ມອບໝາຍໃຫ້ເເຕ່ລະຫ້ອງຮຽນຮັບຜິດຊອບບົວລະບັດ ແລະ ດູແລແຕ່ລະຕົ້ນໄມ້ໃຫ້ມີຄວາມຈະເລີນເຕີບໂຕຢ່າງແຂງແຮງ ແລະ ຂຽວງາມ ສ້າງໃຫ້ຫຼານນ້ອຍນັກຮຽນ ຮູ້ຮັກການອອກແຮງງານ, ຮູ້ປົກປັກຮັກສາຊັບສົມບັດລວມໝູ່ໃຫ້ຄົງຢູ່ຕະຫຼອດໄປ, ເອົາໃຈໃສ່ສຶກສາອົບຮົມ ແລະ ຄຸ້ມຄອງຫຼານນັກຮຽນໃຫ້ມີຄຸນສົມບັດ, ມີນໍ້າໃຈຮັກຊາດ, ມີລະບຽບວິໄນ ໂດຍສະເພາະແມ່ນເອົາໃຈໃສ່ ປະຕິບັດ 7 ລະບອບ ແລະ 18 ວຽກຂອງກອງທັບໃຫ້ເຂັ້ມງວດ; ມີຄວາມສາມັກຄີ, ຊ່ວຍເຫຼືອຊຶ່ງກັນ ແລະ ກັນ ໃນເວລາຮໍ່າຮຽນ ແລະ ອື່ນໆ.
ຂ່າວ: ຂປລ
