ຕອນບ່າຍວັນທີ 28 ພຶດສະພາ 2024, ທ່ານ ສະເຫລີມໄຊ ກົມມະສິດ ຮອງນາຍົກລັດຖະ ມົນຕີ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ອະລາສແດຣ໌ ສະກອດ (Alasdair Scott), ຫົວໜ້າຄະນະປະເມີນເສດຖະກິດມະຫາພາກ ຂອງອົງການກອງທຶນການເງິນສາກົນ (IMF), ຈຸດປະສົງ ເພື່ອສະຫລຸບຜົນການປະເມີນເສດຖະກິດມະຫາພາກຂອງ ສປປ ລາວ ຕາມພັນທະມາດຕາ IV ຂອງອົງການ IMF (Article IV) ປະຈໍາປີ 2024 ແລະ ໃຫ້ຄຳແນະນຳດ້ານນະໂຍບາຍເບື້ອງຕົ້ນໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງ ສປປ ລາວ. ໃນໂອກາດນີ້, ທ່ານ ອະລາສແດຣ໌ ສະກອດ ໄດ້ລາຍງານຜົນການປະເມີນເສດຖະກິດມະຫາພາກ ປະຈຳປີ 2024 ຂອງ ສປປ ລາວ ເຊິ່ງເຫັນໄດ້ວ່າຫລາຍຂົງເຂດວຽກງານທີ່ຕິດພັນກັບວຽກງານເສດຖະກິດ ແມ່ນໄດ້ຮັບການພັດທະນາໃນລະດັບດີຂຶ້ນເທື່ອລະກ້າວ. ຄຽງຄູ່ກັນນີ້, ກໍຍັງມີສິ່ງທ້າທາຍຫລາຍດ້ານທີ່ ສປປ ລາວ ຍັງຕ້ອງສືບຕໍ່ຮັບມື ແລະ ປັບປຸງ ເປັນຕົ້ນ ການປັບປຸງໂຄງສ້າງໜີ້ສິນພາກລັດ, ການບໍລິຫານງົບປະມານ ແລະ ນະໂຍບາຍທາງດ້ານເງິນຕາ ເຊິ່ງ ອົງການ IMF ກໍໄດ້ອະທິບາຍວ່າ ການມາປະເມີນເສດຖະກິດຄັ້ງນີ້ ແມ່ນເພື່ອວິເຄາະບັນຫາ ແລະ ຊອກຫາວິທີທາງອອກ.
ພ້ອມດຽວກັນ, ກໍຍິນດີທີ່ຈະໃຫ້ການຊ່ວຍເຫລືອທາງດ້ານນະໂຍບາຍ ແລະ ດ້ານວິຊາການແກ່ຂະແໜງການເງິນ ແລະ ຂະແໜງການກ່ຽວຂ້ອງຂອງ ສປປ ລາວ ທັງໃນໄລຍະສັ້ນ ແລະ ໄລຍະຍາວ. ບົນຈິດໃຈດັ່ງກ່າວ, ທ່ານ ຮອງນາຍົກ ລັດຖະມົນຕີ ກໍໄດ້ກ່າວຕ້ອນຮັບຢ່າງອົບອຸ່ນ ຕໍ່ການມາເຄື່ອນໄຫວເຮັດວຽກຢູ່ ສປປ ລາວ ຂອງ ທ່ານ ອະລາສແດຣ໌ ສະກອດ ແລະ ຄະນະ ພ້ອມທັງ ຂອບໃຈຕໍ່ອົງການ IMF ທີ່ໄດ້ສໍາເລັດການປະຕິບັດໜ້າທີ່ ຢູ່ ສປປ ລາວ. ໂອກາດນີ້, ທ່ານ ຮອງນາຍົກລັດຖະມົນຕີ ກໍໄດ້ແຈ້ງໃຫ້ຊາບວ່າ ປັດຈຸບັນ, ລັດຖະບານລາວ ກໍາລັງສຸມໃສ່ການຈັດຕັ້ງປະຕິບັດບັນດາມາດຕະການ ເພື່ອຮັບມືກັບສະພາບເສດຖະກິດ ເຊິ່ງຖືວ່າຢູ່ໃນລະດັບທີ່ດີຂຶ້ນເທື່ອລະກ້າວ ໂດຍສະເພາະວຽກງານການປັບປຸງໂຄງສ້າງໜີ້ສິນພາກລັດ, ການປັບປຸງກົດໝາຍ ວ່າດ້ວຍ ການສົ່ງເສີມການລົງທຶນ ເພື່ອສ້າງສະພາບແວດລ້ອມທີ່ດີເພື່ອການດຳເນີນທຸລະກິດ ຢູ່ ສປປ ລາວ. ພ້ອມນີ້ ກໍໄດ້ສະແດງຄວາມຂອບໃຈຕໍ່ອົງການ IMF ທີ່ໄດ້ໃຫ້ຄໍາແນະນໍາທີ່ດີ ຕໍ່ການແກ້ໄຂບັນຫາເສດຖະກິດ ຂອງ ສປປ ລາວ ແລະ ຫວັງວ່າອົງການ IMF ຈະສືບຕໍ່ໃຫ້ການຊ່ວຍເຫລືອໃນດ້ານຕ່າງໆໃຫ້ແກ່ ສປປ ລາວ ໃນຕໍ່ໜ້າ.
ໃນຕອນທ້າຍ, ທ່ານ ສະເຫລີມໄຊ ກົມມະສິດ ໄດ້ອວຍພອນໃຫ້ ທ່ານ ອະລາສແດຣ໌ ສະກອດ ຈົ່ງປະສົບຜົນສຳເລັດໃນການປະຕິບັດໜ້າທີ່ວຽກງານ ແລະ ເຊື້ອເຊີນໃຫ້ ທ່ານປະທານອົງການ IMF ມາເຂົ້າຮ່ວມກອງປະຊຸມສຸດຍອດອາຊຽນ ໃນເດືອນຕຸລາ 2024 ທີ່ ນະຄອນຫລວງວຽງຈັນ ທີ່ຈະມາເຖິງນີ້.
