ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດ IX ໄດ້ດຳເນີນມາຮອດວັນທີ 7 ກໍລະກົດ 2022 ທີ່ຫໍສະພາແຫ່ງຊາດ ໂດຍພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ. ພາຍຫຼັງຮັບຟັງການສະເໜີຮ່າງກົດໝາຍ 9 ສະບັບ ຕໍ່ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດ IX. ໃນນັ້ນ, ມີກົດໝາຍສ້າງໃໝ່ 3 ສະບັບ ແລະ ກົດໝາຍສະບັບປັບປຸງ 6 ສະບັບຄື: ກົດໝາຍວ່າດ້ວຍ ອາວຸດ ແລະ ວັດຖຸລະເບີດ (ສ້າງໃໝ່), ກົດໝາຍວ່າດ້ວຍ ການຄຸ້ມຄອງເງິນຕາຕ່າງປະເທດ (ປັບປຸງ), ກົດໝາຍວ່າດ້ວຍ ການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ປັບປຸງ), ກົດໝາຍວ່າດ້ວຍ ການແກ້ໄຂຄໍາຮ້ອງທຸກ (ປັບປຸງ), ກົດໝາຍວ່າດ້ວຍ ຊັບສິນຂອງລັດ (ປັບປຸງ), ກົດໝາຍວ່າດ້ວຍ ວິຈິດສິນ (ສ້າງໃໝ່), ກົດໝາຍວ່າດ້ວຍຄວາມປອດໄພຂອງເຂື່ອນ (ສ້າງໃໝ່), ກົດໝາຍວ່າດ້ວຍ ການປັບປຸງບາງມາດຕາຂອງກົດໝາຍ ວ່າດ້ວຍນໍ້າ ແລະ ຊັບພະຍາກອນນໍ້າ (ປັບປຸງ), ກົດໝາຍວ່າດ້ວຍ ການປັບປຸງບາງມາດຕາຂອງກົດໝາຍວ່າດ້ວຍ ສານປະຊາຊົນ (ປັບປຸງ). ຈາກນັ້ນ, ບັນດາ ສສຊ ກໍໄດ້ປະກອບຄຳຄິດເຫັນໃສ່ຮ່າງກົດ ໝາຍດັ່ງກ່າວຢ່າງກົງໄປກົງມາ ເພື່ອໃຫ້ອະນຸກຳມະການຮັບຜິດຊອບຮ່າງກົດໝາຍນຳໄປພິຈາລະນາປັບປຸງໃຫ້ມີເນື້ອໃນຮັດກຸມ ແລະ ສອດຄ່ອງກັບວຽກງານແຕ່ລະຂະແໜງການ.
ການພິຈາລະນາ ແລະ ລົງຄະແນນສຽງຮັບຮອງເອົາກົດໝາຍ 9 ສະບັບນີ້, ແມ່ນຜົນສໍາເລັດທີ່ສໍາຄັນໃນການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ 5 ປີ ທີ່ກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX ໄດ້ຮັບຮອງເອົາ ທັງເປັນການປະກອບສ່ວນສໍາຄັນໃນການປັບປຸງ ແລະ ເພີ່ມທະວີພາຫະນະເຄື່ອງມືຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງປະເທດເຮົາໃຫ້ເປັນລະບົບຄົບຊຸດ ເພື່ອຮັບປະກັນການປົກປ້ອງສິດ ແລະ ຜົນປະໂຫຍດຂອງຊາດ, ຂອງລັດລວມໝູ່, ບຸກຄົນ, ນິຕິບຸກຄົນ ແລະ ປະຊາຊົນລາວບັນດາເຜົ່າ, ສະກັດກັ້ນ ແລະ ຕ້ານບັນດາປະກົດການຫຍໍ້ທໍ້ທີ່ເປັນການປະພຶດລະເມີດກົດໝາຍຢູ່ໃນສັງຄົມ ແລະ ແນວຄິດອິດສະຫຼະເສລີຕາມໃຈຊອບທີ່ຢູ່ເໜືອກົດໝາຍ ພ້ອມກັນນັ້ນ ກໍເປັນການຮັບປະກັນໃຫ້ແກ່ການສ້າງລັດ ປະຊາທິປະໄຕ ປະຊາຊົນ ໃຫ້ເປັນລັດທີ່ປົກຄອງດ້ວຍກົດໝາຍຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນເທື່ອລະກ້າວ ທັງເປັນການຮັບປະກັນໃຫ້ແກ່ການເຊື່ອມຈອດ ເຊື່ອມໂຍງເຂົ້າສູ່ພາກພື້ນ ແລະ ສາກົນ. ຈາກນັ້ນ, ປະທານກອງປະຊຸມໄດ້ສະຫຼຸບສັງລວມຄຳຊີ້ແຈງຂອງອະນຸກຳມະການຮັບຜິດຊອບຮ່າງກົດໝາຍ ແລະ ຄໍາຄິດເຫັນຂອງບັນດາ ສສຊ. ຈາກນັ້ນ, ປະທານໄດ້ສະເໜີໃຫ້ ບັນດາ ສສຊ ລົງຄະແນນສຽງຮັບຮອງເອົາກົດ ໝາຍ 9 ສະບັບດັ່ງກ່າວດ້ວຍສຽງສ່ວນຫຼາຍ. ຖ້າຫາກກົດໝາຍເຫຼົ່ານີ້, ປະກາດໃຊ້ແມ່ນຈະເປັນບ່ອນອີງທີ່ສໍາຄັນເຂົ້າໃນການຈັດຕັ້ງປະຕິບັດວຽກງານແຕ່ລະຂົງເຂດທີ່ຕິດພັນກັບກົດໝາຍດັ່ງກ່າວໃຫ້ມີຄວາມຖືກຕ້ອງ ສອດຄ່ອງ ແລະ ມີປະສິດທິຜົນຫຼາຍຂຶ້ນ.
(ຂ່າວ: ຍຸພີນທອງ, ພາບ: ແສງຈັນ)
