ຂ່າວຕ່າງປະເທດລາຍງານ ເມື່ອທ້າຍອາທິດທີ່ຜ່ານມາ, ກົມພາສີອາກອນຂອງກຳປູເຈຍໄດ້ເປີດເຜີຍບົດລາຍງານໂດຍລະບຸວ່າ ລາຍໄດ້ຈາກພາສີມູນຄ່າເພີ່ມ (VAT) ພາກທຸລະກິດ E-commerce ໃນໄລຍະເດືອນມັງກອນ-ພະຈິກຂອງປີນີ້ລວມຢູ່ທີ່ 68,3 ລ້ານໂດລາ.
ບົດລາຍງານລະບຸວ່າ ກຳປູເຈຍເລີ່ມຕົ້ນຈັດເກັບພາສີມູນຄ່າເພີ່ມຈາກການເຮັດທຸລະກຳ E-commerce ຂອງກຸ່ມບໍລິສັດທີ່ມີຖິ່ນຖານໃນຕ່າງປະເທດເຊັ່ນ Google, Meta, Amazon, Microsoft, Youtube, Tiktok ແລະ Netflix ໃນອັດຕາ 10% ຕັ້ງແຕ່ວັນທີ 1 ເມສາ 2022. ທ່ານ ກົງ ວິບູນ ຫົວໜ້າກົມພາສີອາກອນຂອງກຳປູເຈຍກ່າວວ່າ ມູນຄ່າເພີ່ມຈາກການເຮັດທຸລະກຳ E-commerce ຖືວ່າເປັນໜຶ່ງໃນແຫຼ່ງລາຍໄດ້ທີ່ມີສັກກະຍະພາບຂອງກຳປູເຈຍ ແລະ ມີທ່າອ່ຽງເພີ່ມພູນລາຍໄດ້ເຂົ້າງົບປະມານປະເທດໃນໄລຍະຍາວ. ອີກຢ່າງໜຶ່ງ, ກົມພາສີອາກອນເປັນໜ່ວຍງານລັດຖະບານທີ່ຮັບຜິດຊອບການຈັດເກັບພາສີພາຍໃນປະເທດເຊັ່ນ ພາສີລາຍໄດ້, ພາສີເງິນເດືອນ,ພາສີມູນຄ່າເພີ່ມ ແລະ ພາສີທີ່ດິນ.
ກົມພາສີອາກອນຂອງກຳປູເຈຍກ່າວຕື່ມວ່າ ລາຍໄດ້ຈາກການຈັດເກັບພາສີຕ່າງໆໃນໄລຍະ 11 ເດືອນທຳອິດຂອງປີນີ້ລວມຢູ່ທີ່ 3,34 ພັນລ້ານໂດລາ ຊຶ່ງຄິດເປັນ 93,7% ຂອງເປົ້າໝາຍທີ່ກຳນົດໄວ້ໃນປີນີ້.
