ພິທີເປີດສູນຂໍ້ມູນຂ່າວສານການທ່ອງທ່ຽວ ນະຄອນຫຼວງວຽງຈັນ(ນວ) ແລະ ຫ້ອງວາງສະແດງສິນຄ້າຫັດຖະກຳ-ໂອດອບ ຈັດຂຶ້ນວັນທີ 17 ພະຈິກ 2023 ທີ່ ບ້ານ ໜອງບອນ ເມືອງໄຊເສດຖາ ນະຄອນຫຼວງວຽງຈັນ ເປັນກຽດເຂົ້າຮ່ວມຂອງ ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ ທ່ານ ນາງ ແພງຈັນ ແພງເມືອງ ຫົວໜ້າກົມແຜນການ ແລະ ການຮ່ວມມື ກະຊວງຖະແຫຼງຂ່າວວັດທະນະທຳ ແລະ ທ່ອງທ່ຽວ(ຖວທ) ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກ ຖວທ ນວ ທ່ານ ນາງ ອໍລະໄທ ສັນຕິຄົງຄາ ປະທານບໍລິສັດກິດຕິພົງກຣຸບ ພ້ອມດ້ວຍ ແຂກທີ່ຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ອໍລະໄທ ສັນຕິຄົງຄາໄດ້ກ່າວວ່າ: ເພື່ອເປັນການສົ່ງເສີມ ແລະ ໂຄສະນາການທ່ອງທ່ຽວຂອງລາວ ແລະ ໃຫ້ນັກທ່ອງທ່ຽວໄດ້ຮັບຄວາມສະດວກ ແລະ ວ່ອງໄວທາງດ້ານຂໍ້ມູນການທ່ອງທ່ຽວ ແລະ ການບໍລິການດ້ານການທ່ອງທ່ຽວຂອງນະຄອນຫຼວງວຽງຈັນ ດັ່ງນັ້ນ ພະແນກ ຖວທ ນວ ແລະ ບໍລິສັດແລນມາກທ່ອງທ່ຽວຈຳກັດ (Landmark Travel Sole Co.,Ltd) ຮ່ວມມືສ້າງສູນຂໍ້ມູນຂ່າວສານການທ່ອງທ່ຽວນະຄອນຫຼວງວຽງຈັນ ສູນດັ່ງກ່າວຕັ້ງຢູ່ ບ້ານ ໜອງບອນ ເມືອງໄຊເສດຖາ ນະຄອນຫຼວງວຽງຈັນ ເນື້ອທີ່ຂອງສູນແມ່ນປະມານ 60 ຕາແມັດ ມູນຄ່າການກໍ່ສ້າງລວມທັງໝົດ 1,3 ຕື້ກວ່າກີບ ເລີ່ມກໍ່ສ້າງມາແຕ່ຕົ້ນເດືອນ ມິຖຸນາ ແລະ ສຳເລັດການກໍ່ສ້າງໃນທ້າຍເດືອນກັນຍາ 2023 ສູນແຫ່ງນີ້ຈະເປັນບ່ອນແນະນຳການເດີນທາງ ແລະ ໃຫ້ຄຳປຶກສາໃນການເດີນທາງ ໃຫ້ຂໍ້ມູນກ່ຽວກັບສະຖານທີ່ທ່ອງທ່ຽວ ແນະນຳກ່ຽວກັບໂຮງແຮມ ແລະ ຮ້ານອາຫານ ຄູ່ມືການນຳທ່ຽວ ແລະ ບັນດາພາສາຕ່າງປະເທດຕ່າງໆ ແລະ ຈະເປັນບ່ອນປະສານກ່ຽວກັບຜູ້ນຳທ່ຽວ ແລະ ການຮັບຂໍ້ມູນຂ່າວສານຈາກນັກທ່ອງທ່ຽວ ເຊິ່ງຈຸດປະສົງໃນການຮ່ວມມືກັບພະແນກ ຖວທ ນວ ນີ້ແມ່ນເພື່ອເຫັນໄດ້ເຖິງຄວາມສຳຄັນຂອງນັກທ່ອງທ່ຽວເພາະຢູ່ໃນ ນວ ມີສະຖານທີ່ທ່ອງທ່ຽວຫຼາຍແຫ່ງທີ່ມີຄວາມງົດງາມ ແລະ ມີຄວາມສຳຄັນທາງດ້ານວັດທະນະທຳ ແລະ ປະຫວັດສາດ ຖ້າຫາກພວກເຮົາມີສູນດັ່ງກ່າວແລ້ວກໍຈະສາມາດໃຫ້ບໍລິການແກ່ນັກທ່ອງທ່ຽວຢ່າງຮອບດ້ານເພື່ອກະກຽມຕ້ອນຮັບປີທ່ອງທ່ຽວລາວ 2024 ແລະ ກອງປະຊຸມສຸດຍອດອາຊຽນ ແລະ ກອງປະຊຸມທີ່ສຳຄັນຕ່າງໆ ເພື່ອຜັນຂະຫຍາຍແນວທາງຂອງພັກ ແລະ ລັດຖະບານທີ່ໄດ້ມີນະໂຍບາຍສົ່ງເສີມການທ່ອງທ່ຽວທາງດ້ານການທ່ອງທ່ຽວວັດທະນະທຳ ປະຫວັດສາດ ແລະ ທຳມະຊາດ ສປປ ລາວເຮົາມີທ່າແຮງທາງດ້ານການທ່ອງທ່ຽວ ຍ້ອນເຫັນໄດ້ຄວາມສຳຄັນຄືດັ່ງກ່າວຈຶ່ງໄດ້ຮ່ວມືກັບ ພະແນກ ຖວທ ນວ ເປີດສູນດັ່ງກ່າວ.
ທ່ານ ນາງ ວິໄລວອນ ຈັນທະລາຕີ ໄດ້ກ່າວວ່າ: ເພື່ອຈັດຕັ້ງປະຕິບັດຜັນຂະຫຍາຍແນວທາງນະໂຍບາຍຂອງພັກ-ລັດຖະບານໃຫ້ປະກົດຜົນເປັນຈິງໂດຍສະເພາະແມ່ນການກະກຽມເປີດປີທ່ອງທ່ຽວລາວປີ 2024 ແລະ ກອງປະຊຸມສຳຄັນຕ່າງໆ ແລະ ດັ່ງທີ່ຮັບຮູ້ນຳກັນ ນວ ເປັນຫົວໜ່ວຍຍຸດທະສາດທາງດ້ານເສດຖະກິດ ວັດທະນະທຳ -ສັງຄົມເປັນສູນກາງໃນການຕ້ອນຮັບນັກທ່ອງທ່ຽວ ແລະ ເພື່ອເຮັດໃຫ້ວຽກງານການທ່ອງທ່ຽວ ນວ ໄດ້ຖືກຈັດຕັ້ງປະຕິບັດຢ່າງມີປະສິດທິຜົນ ແລະ ປະສົບຜົນສຳເລັດຕາມລະດັບຄາດໝາຍທີ່ວາງໄວ້ຈຶ່ງໄດ້ຮ່ວມມືກັບກຸ່ມບໍລິສັດກິດຕິພົງເຊິ່ງກໍແມ່ນໜຶ່ງໃນນາມປະທານສະມາຄົມທຸລະກິດໂຮງແຮມ ຮ້ານອາຫານ ນວ ຈຶ່ງໄດ້ຕົກລົງເຊັນບົດບັນທຶກຮ່ວມກັນເປີດສູນນຳໃຊ້ຂໍ້ມູນຂ່າວສານການທ່ອງທ່ຽວແຫ່ງນີ້ ພ້ອມທັງມີຫ້ອງວາງສະແດງ ແລະ ຈຳໜ່າຍສິນຄ້າທີ່ລະນຶກ ແລະ ໃນຕໍ່ໜ້າຈະສ້າງສະຖານທີ່ແຫ່ງນີ້ເປັນຈຸດຮັບບໍລິການນັກທ່ອງທ່ຽວເພື່ອທ່ຽວຊົມຕົວເມືອງໃນລາຍການທ່ອງທ່ຽວລາຕີວຽງຈັນ.
# Pui
