ຕາມຂ່າວຈາກ ບັງກລາເທດ,ວັນທີ27 ມິຖຸນານີ້,ບັງກລາເທດ ເປີດໃຊ້ຂົວ ຂ້າມແມ່ນ້ຳ ຂະໜາດໃຫຍ່ ທີ່ສຸດ ໃນປະເທດ ຢ່າງເປັນທາງການ ຫລັງໃຊ້ເວລາ ກໍ່ສ້າງມາເຖິງ8ປີ ເພື່ອຊ່ວຍ ອຳນວຍ ຄວາມສະດວກ ໃນການເດີນທາງ ຈາກທີ່ເຄີຍໃຊ້ ທ່າເຮືອ ຂ້າມຝາກ ເປັນຫລັກ ໂດຍບໍລິສັດຈີນ ເປັນຜູ້ຮັບ ເໝົາກໍ່ສ້າງ ຂົວ ແຫ່ງນີ້ ຢູ່ຫ່າງຈາກ ນະຄອນຫລວງ ດາກາ ລົງໄປທາງໃຕ້ ປະມານ 50ກິໂລແມັດ ເປັນເສັ້ນທາງ ເຊື່ອມຕໍ່ ທາງພາກຕາເວັນອອກ ແລະ ຕາເວັນຕົກ ຂອງປະເທດ ເຂົ້າດ້ວຍກັນ ຊຶ່ງຈະຊ່ວຍອຳນວຍ ຄວາມສະດວກ ໃນການທາງດີ ຂຶ້ນກວ່າເກົ່າ.ສຳລັບ ຂົວຂ້າມແມ່ນ້ຳPadma ເປັນຂົວ2ຊັ້ນ ໂດຍຊັ້ນເທິງ ເປັນຖະໜົນ 4ເລນ ສ່ວນຊັ້ນ ລຸ່ມ ເປັນຂົວລົດໄຟ ມີໄລຍະທາງຍາວ 6,15 ກິໂລແມັດ ເພື່ອສ້າງປະໂຫຍດ ໃຫ້ກັບ ປະຊາຊົນ ກວ່າ80 ລ້ານຄົນ ແລະ ຈະຊ່ວຍຊຸກຍູ້ ໃຫ້ ຍອດລວມ ຜະລິດ ຕະພັນ ພາຍໃນປະເທດ(ຈີດີພີ) ຂອງບັງກລາເທດ ເພີ່ມສູງຂຶ້ນເຖິງ 1,5%ຕໍ່ປີ./.
(ພາກຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
