ສູນກາງ ອົງການພຸດທະສາສະໜາສຳພັນລາວ (ອພສ) ໄດ້ຈັດກອງປະຊຸມເຜີຍແຜ່ທໍາມະນູນສົງລາວ ສະບັບປັບປຸງຂຶ້ນໃນວັນທີ 21 ກັນຍາ ຜ່ານມາ, ທີ່ວັດບ້ານທ່າຫີນ ນະຄອນປາກເຊ ແຂວງຈຳປາສັກ ໂດຍການເປັນປະທານຂອງພະອາຈານໃຫຍ່ມະຫາບຸນມາ ສິມມາພົມ ປະທານສູນກາງ ອົງການພຸດທະສາສະໜາ ສຳພັນແຫ່ງ ສປປ ລາວ (ອພສ), ມີພະອາຈານ ພວງປະເສີດ ພູມະວົງ ຄະນະບໍລິຫານງານປະຈໍາການ ອພສ, ພະອາຈານມະຫາສຸວັນ ຈັນທະຣາຊ ປະທານ ອພສ ແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້, ຈັດຂຶ້ນເພື່ອເປັນການເຜີຍແຜ່ທໍາມະນູນສົງລາວ ສະບັບປັບປຸງ ໃຫ້ແກ່ຄະນະ ອພສ ແຂວງຈຳປາສັກ ແລະ ພາກສ່ວນກ່ຽວຂ້ອງໄດ້ຮັບຮູ້ ຊຶ່ງທໍາມະນູນສົງລາວສະບັບປັບປຸງມີທັງໝົດ 13 ໝວດ 74 ມາດຕາ ຊຶ່ງໄດ້ກຳນົດຫຼັກການ, ລະບຽບການ, ມາດຕະການໃນການຈັດຕັ້ງການເຄື່ອນໄຫວຂອງພະສົງລາວ ເພື່ອຮັບປະກັນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃຫ້ມີປະສິດທິຜົນສູງ ແນໃສ່ເຕົ້າໂຮມຄວາມສາມັກຄີຂອງບັນພະຊິດ, ພຸດທະສາສະນິກະຊົນ ແລະ ປະຊາຊົນລາວບັນດາເຜົ່າທັງພາຍໃນ ແລະ ຕ່າງ ປະເທດໂດຍຖືເອົາຫຼັກພະທໍາມະວິໃນ, ລັດຖະທໍາມະນູນ, ກົດໝາຍ, ລະບຽບການ ແລະ ຮີດຄອງປະເພນີໃນການຜັນຂະຫຍາຍເຂົ້າໃນທຸກຂົງເຂດວຽກງານ, ການດຳລົງຊີວິດປະຈໍາວັນ ແລະ ຮັບປະກັນຄວາມເປັນເອກະພາບໃນການຈັດຕັ້ງປະຕິບັດໃຫ້ເໝາະສົມກັບກາລະໂອກາດ ແລະ ຄວາມເປັນຈິງຢູ່ ສປປ ລາວ. ເພື່ອໃຫ້ພະສົງສະມະເນນ, ອົງການຈັດຕັ້ງພາກລັດ-ເອກະຊົນ ປະຊາຊົນບັນດາເຜົ່າໄດ້ຮັບຮູ້ເຂົ້າໃຈເຄົາລົບ ແລະ ປະຕິບັດຕາມລັດຖະທໍາມະນູນທີ່ໄດ້ກຳນົດໄວ້.
ຂ່າວ: ເກດສະໜາ ແກ້ວສຸວັນນະແສງ
