ໃນລະຫວ່າງໃນວັນທີ 18-22 ກັນຍາ 2023, ຄະນະຜູ້ແທນສະພາແຫ່ງຊາດ (ສພຊ) ແຫ່ງ ສປປ ລາວ ນຳໂດຍ ທ່ານ ມະນະໂສ ຊາມຸນຕຣີ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໄດ້ເດີນທາງໄປເຂົ້າຮ່ວມກອງປະຊຸມເວທີປຶກສາຫາລື ແລກປ່ຽນມິດຕະພາບ ລະຫວ່າງ ສະ ມາຊິກລັດຖະສະພາສາກົນ ຢູ່ ນະຄອນເຊີນເຈີນ ແຂວງກວາງຕົງ ສປ ຈີນ ຊຶ່ງສະມາຄົມມິດຕະພາບນານາຊາດແຫ່ງ ສປ ຈີນ ເປັນເຈົ້າພາບຈັດຂຶ້ນ; ກອງປະຊຸມດັ່ງກ່າວ ມີຄະນະຜູ້ແທນຕາງໜ້າລັດຖະສະພາຂອງບັນດາປະເທດຕ່າງໆ ຈໍານວນ 15 ປະເທດ ເປັນຕົ້ນ: ປະເທດເອຈີເລຍ, ຊິລີ, ຮອນດູລັດ, ຍີ່ປຸ່ນ, ລາວ, ນິກາລາກົວ, ປາກິດສະຖານ, ຣັດເຊຍ, ສີລັງກາ, ໄທ, ອາເຈນຕິນາ, ອາເມຣິກາ, ຈາໄມກາ, ນິວຊີແລນ ແລະ ລັດຖະສະພາສະຫະພາບເອີຣົບ ແລະ ມີຜູ້ແທນເຂົ້າຮ່ວມທັງໝົດຫຼາຍກວ່າ 50 ທ່ານ.
ກອງປະຊຸມຄັ້ງນີ້ ດຳເນີນໄປພາຍໃຕ້ຫົວຂໍ້ຫຼັກ “ກ້າວໄປສູ່ການພັດທະນາແບບຍືນຍົງສໍາລັບທຸກຄົນ” ເພື່ອປຶກສາຫາລືແລກປ່ຽນບົດຮຽນທີ່ດີ ໃນການປະກອບສ່ວນເຂົ້າໃນການພັດທະນາຂອງໂລກ ໃຫ້ມີຄວາມຍືນຍົງ ແລະ ເປັນບ່ອນທີ່ໜ້າຢູ່ອາໄສ ຂອງໝົດທຸກຄົນ ໃນການບັນລຸເປົ້າໝາຍການພັດທະນາແບບຍືນຍົງ (SDGs). ບັນດາຄະນະຜູ້ແທນທີ່ເຂົ້າຮ່ວມກໍໄດ້ຮ່ວມກັນແລກປ່ຽນຄໍາຄິດຄໍາເຫັນ ແລະ ປຶກສາຫາລືໃນ 6 ຫົວຂໍ້ຍ່ອຍທີ່ສໍາຄັນ ເປັນຕົ້ນ: ການປົກຄອງລັດດ້ວຍກົດໜາຍ, ພື້ນຖານຂອງສິດທະມະນຸດ, ລະບົບນິເວດ ແລະ ການປົກປັກຮັກສາສິ່ງແວດລ້ອມ, ນະວັດຕະກໍາ, ຄວາມກ້າວໜ້າຂອງວັດທະນະທໍາ ແລະ ການພັດທະນາໂດຍສັນຕິ, ບັນດາຜູ້ແທນໄດ້ມີການແລກປ່ຽນ ແລະ ປະກອບຄໍາເຫັນຢ່າງສ້າງສັນ ແລະ ກົງໄປກົງມາ ຊຶ່ງຕາງໜ້າຄະນະຜູ້ແທນລາວ ໄດ້ປະກອບຄໍາເຫັນໃນຫົວຂໍ້ຍ່ອຍທີ່ 3 “ການພັດທະນາສີຂຽວ ແລະ ລຸດຄາບອນຕ່ໍາ, ນິເວດວິທະຍາ ແລະ ການປົກປັກຮັກສາສິ່ງແວດລ້ອມ”.
ໃນກອງປະຊຸມຄັ້ງນີ້, ຄະນະຜູ້ແທນສະພາແຫ່ງຊາດລາວ ໄດ້ປະກອບຄຳເຫັນ ໂດຍສະແດງໃຫ້ເຫັນສະພາບລວມ ຂອງການພັດທະນາເສດຖະກິດ-ສັງຄົມ ຊຶ່ງຖືເອົາເອົານະໂຍບາຍການຫັນເປັນສີຂຽວ, ການປົກປັກຮັກສາສິ່ງແວດລ້ອມ, ການຈັດຕັ້ງປະຕິບັດແນວທາງນະໂຍບາຍ ແລະ ບັນດານິຕິກໍາ ທີ່ກ່ຽວຂ້ອງ ທີ່ສະພາແຫ່ງຊາດໄດ້ຮັບຮອງ ແລະ ປະກາດໃຊ້ ໃນໄລຍະຜ່ານມາ. ພ້ອມກັນນີ້, ຍັງໄດ້ແລກປ່ຽນບັນດາສິ່ງທ້າທາຍ ໃນການພັດທະນາແບບຢືນຢົງ ຢູ່ ສປປ ລາວ ແລະ ຮຽກຮ້ອງໃຫ້ມີການສະໜັບສະໜູນ ແລະ ຮ່ວມມືຊຶ່ງກັນ ແລະ ກັນ ຈາກບັນດາປະເທດຕ່າງໆ ໃນພາກພື້ນ ແລະ ໃນໂລກ ໃຫ້ຫຼາຍຂຶ້ນ.
ໃນໂອກາດເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນໄດ້ໄປຢ້ຽມຢາມພື້ນຖານການພັດທະນາເສດ ຖະກິດ-ສັງຄົມ ຂອງນະຄອນເຊີນເຈີນ ແຂວງກວາງຕົງ ສປ ຈີນ ໂດຍສະເພາະການຢ້ຽມຊົມຫໍພິພິທະພັນສິລະປະຮ່ວມສະໄໝ ແລະ ການວາງແຜນຜັງຄະຄອນເຊີນເຈີນ, ຢ້ຽມຢາມ ບໍລິສັດລົດເມ ພື້ນຖານໂຄງລ່າງຂອງນະຄອນເຊີນເຈີນ, ສະຖາບັນການພົວພັນສາກົນກວນໄຫ ແລະ ບໍລິດສັດ BYD.
(ຂ່າວ: ສພຊ)
