ພິທີທຳລາຍອາວຸດລ່າເນື້ອ ແລະ ວັດຖຸຕ້ອງຫ້າມ ໄດ້ຈັດຂຶ້ນໃນວັນທີ 22 ກັນຍາ ນີ້ ທີ່ກອງພັນປ້ອງກັນເຄື່ອນທີ່ ກອງບັນຊາການປ້ອງກັນຄວາມສະຫງົບ (ປກສ) ແຂວງຄຳມ່ວນ ໂດຍການເປັນກຽດເຂົ້າຮ່ວມຂອງທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ປະທານຄະນະກຳມະການປ້ອງກັນຊາດ (ປກຊ) – ປ້ອງກັນຄວາມສະຫງົບ (ປກສ) ແຂວງ, ມີທ່ານ ພັອ ທິບພະຈັນ ໂພໄຊ ຫົວໜ້າກອງບັນຊາການ ປກສ ແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ພັອ ຄຳສິງ ນົນທະສອນ ຮອງຫົວໜ້າກອງບັນຊາການ ປກສ ແຂວງ ໄດ້ລາຍງານການເຄື່ອນໄຫວເກັບກູ້, ທ້ອນໂຮມອາວຸດເສີກ, ອາວຸດລ່າເນື້ອ, ວັດຖຸຕ້ອງຫ້າມ ແລະ ເປົ້າໝາຍການທຳລາຍ ຊຶ່ງສອງກອງບັນ ຊາການ ປກຊ-ປກສ ແຂວງໄດ້ປະສານສົມທົບກັນເພື່ອເຄື່ອນໄຫວເກັບກູ້, ທ້ອນໂຮມອາວຸດເສິກ, ອາວຸດລ່າເນື້ອ ແລະ ວັດຖຸຕ້ອງຫ້າມທຸກຊະນິດ ທີ່ເປັນອັນຕະລາຍໃນໄລຍະຜ່ານມາ ທີ່ເປັນປະກົດການຫຍໍ້ທໍ້ໃນສັງຄົມກ່ຽວກັບການນຳໃຊ້ອາວຸດປືນ, ອາວຸດລ່າເນື້ອຢ່າງຊະຊາຍໂດຍບໍ່ຄຳນຶງເຖິງກົດໝາຍ ແລະ ລະບຽບການ ຊຶ່ງໄດ້ສ້າງຄວາມເສຍໃຫ້ໃຫ້ແກ່ຊີວິດ ແລະ ຊັບສິນຂອງພົນລະເມືອງເປັນຕົ້ນ: ການນຳໃຊ້ອາວຸດປືນໃນການນາບຂູ່, ປຸ້ນຈີ້ຊີງຊັບ, ຂ້າເຈົ້າເອົາຂອງ, ຄາດຕະກຳ ຊຶ່ງປະກົດການດັ່ງກ່າວໄດ້ສົ່ງຜົນກະທົບ ແລະ ສ້າງຄວາມເສຍຫາຍຢ່າງໃຫຍ່ຫຼວງຕໍ່ສັງຄົມ.
ຜ່ານການເຄື່ອນໄຫວຈັດຕັ້ງປະຕິບັດໃນໄລຍະຜ່ານມາ ສາມາດເກັບກູ້, ທ້ອນໂຮມອາວຸດ ແລະ ວັດຖຸຕ້ອງຫ້າມໄດ້ຈຳນວນຫຼາຍລາຍການຊຶ່ງປະກອບມີ: ອາວຸດປືນລວມມີ 194 ກະບອກ, ໃນນີ້ອາວຸດເສີກຍາວ 85 ກະບອກ, ອາວຸດເສີກສັ້ນ 109 ກະບອກ, ອາວຸດລ່າເນື້ອ 2.593 ກະບອກ, ເລົາປືນ 387 ເລົາ, ວັດຖຸຕ້ອງຫ້າມ ປະເພດໝໍ້ຊັອດໄຟຟ້າ 67 ເຄື່ອງ, ຈັກສະຕິນ 20 ເຄື່ອງ. ເປົ້າໝາຍທຳລາຍໃນຄັ້ງນີ້ປະກອບມີ: ອາວຸດລ່າເນື້ອ 2.593 ກະບອກ, ເລົາປືນ 387 ເລົາ, ໝໍ້ຊັອດໄຟຟ້າ 67 ເຄື່ອງ ແລະ ຈັກສະຕິນ 20 ເຄື່ອງ. ສ່ວນອາວຸດເສີກຈໍານວນໜຶ່ງແມ່ນໄດ້ເກັບຮັກສາໄວ້ ແລະ ມອບຕໍ່ໃຫ້ກະຊວງທີ່ກ່ຽວຂ້ອງຄຸ້ມຄອງ. ໃນພິທີໄດ້ມີການຈູດທຳລາຍອາວຸດຈຳນວນດັ່ງກ່າວ.
ຂ່າວ: ກອງຄຳ
