ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ພ້ອມດ້ວຍການນຳຈາກບັນດາພະແນກການຂັ້ນແຂວງ ຮ່ວມກັບການນຳຂອງເມືອງຫີນບູນ ໂດຍມີ ທ່ານ ຄຳສິງ ອໍລະວັນ ເຈົ້າເມືອງຫີນບູນ ໄດ້ລົງຕິດຕາມສະພາບຜົນເສຍຫາຍດ້ານພື້ນຖານໂຄງລ່າງຈາກໄພທຳມະຊາດ ຢູ່ທີ່ເມືອງຫີນບູນ ໃນວັນທີ 21 ກັນຍາ ຜ່ານມາ, ໃນນັ້ນແມ່ນໄດ້ຕິດຕາມເບິ່ງອາຄານໂຮງໝໍເມືອງ ທີ່ມີການເປ່ເພດ້ານໂຄງສ້າງຫຼັງຄາ ເຮັດໃຫ້ນໍ້າຮົ່ວໄຫຼ ໃນເວລາທີ່ເກີດມີຝົນຕົກ, ຕິດຕາມເສັ້ນທາງແຕ່ບ້ານຜາແດງ ເຂົ້າຫາ ບ້ານນາໂພ ຊຶ່ງແມ່ນເສັ້ນທາງດິນເດີມ ທີ່ມີການເປ່ເພ ເນື່ອງຈາກຖືກນໍ້າຖ້ວມໃນໄລຍະທີ່ຜ່ານມາ, ຕິດຕາມຊົນລະປະທານບ້ານປາກທຶກ ທີ່ເກີດມີນໍ້າ ມີຄວາມຍາວໃນຈຸດທີ່ເປ່ເພປະມານ 100 ແມັດ, ຕິດຕາມຕາຝັ່ງເຈື່ອນແຄມແມ່ນໍ້າຂອງ ໃນຈຸດບ້ານປຸ່ງເໜືອ ລວມເຖິງສຸກສາລາ ແລະ ໂຮງຮຽນບ້ານປຸ່ງເໜືອ.
ໃນໂອກາດລົງຕິດຕາມບັນດາຈຸດຕ່າງໆທີ່ຖືກຜົນກະທົບຈາກໄພພິບັດໃນຄັ້ງນີ້ ທ່ານເຈົ້່ແຂວງຄຳມ່ວນກໍໄດ້ຊີ້ນຳໃຫ້ການນຳຂອງເມືອງຫີນບູນ ແລະ ຂະແໜງການກ່ຽວຂ້ອງຂັ້ນເມືອງ ໃຫ້ລົງກວດກາເກັບກຳຂໍ້ມູນ ໃນບັນດາພື້ນຖານໂຄງລ່າງຈຸດທີ່ມີການເປ່ເພ ແລ້ວມີການອອກແບບດ້ານໂຄງສ້າງ ແລະ ຄິດໄລ່ມູນຄ່າໃນການສ້ອມແປງ ແລ້ວນໍາສະເໜີຕໍ່ຂັ້ນແຂວງ ເພື່ອຄົ້ນຄວ້າແກ້ໄຂໃຫ້ທັນກັບສະພາບການ. ພ້ອມນີ້ທ່ານເຈົ້າແຂວງຍັງໄດ້ລົງຕິດຕາມການກໍ່ສ້າງເສັ້ນທາງປູຢາງ 2 ຊັ້ນ ຈຳນວນ 2 ເສັ້ນຢູ່ເມືອງຫີນບູນ ຄື: ເສັ້ນທາງບ້ານເລົ່າຄາ ແຕ່ແຍກທາງເລກທີ 13 ໃຕ້ ຫາ ບ້ານພົງ, ມີຄວາມຍາວ 9,4 ກິໂລແມັດ, ກວ້າງ 7 ແມັດ ຄາດຄະເນຈະໃຫ້ສໍາເລັດ 100% ໃນທ້າຍປີ 2023 ແລະ ເສັ້ນທາງ ບ້ານຫ້ວຍເຮືອ ແຕ່ແຍກທາງເລກທີ 13 ໃຕ້ ຫາ ບ້ານປຸ່ງເໜືອ, ມີຄວາມຍາວ 9,2 ກິໂລແມັດ, ກວ້າງ 7 ແມັດ ຄາດຈະໃຫ້ສຳເລັດໃນເດືອນພຶດສະພາ 2024 ໂດຍແມ່ນບໍລິສັດ DM ກໍ່ສ້າງຂົວທາງ ເປັນຜູ້ຮັບເໝົາກໍ່ສ້າງ.
ຂ່າວ: ກອງຄຳ
