ການຮຽນ-ການສອນຂອງໂຮງຮຽນປະຖົມສົມບູນບ້ານບວມອໍ້, ເມືອງຊຽງເງິນ, ແຂວງຫລວງພະບາງ ມີຄວາມສະ ດວກສະບາຍຫລາຍກວ່າເກົ່າ ພາຍຫລັງຍັບຍ້າຍມາຢູ່ບ່ອນໃຫມ່ຕາມທີ່ໂຄງການກໍ່ສ້າງທາງລົດໄຟລາວ-ຈີນ ຈັດສັນໃຫ້.
ອາຈານ ບຸນຖັນ, ຜູ້ອໍານວຍການໂຮງຮຽນປະຖົມບ້ານ ບວມອໍ້ ໃຫ້ສໍາພາດຕໍ່ສື່ມວນຊົນລາວ-ຈີນໃນວັນທີ 20 ກັນຍາ 2023 ວ່າ: ເນື່ອງຈາກໂຮງຮຽນປະຖົມບ້ານບວມອໍ້ຫລັງເກົ່າ ນອນຢູ່ໃນເຂດໂຄງການກໍ່ສ້າງທາງລົດໄຟລາວ-ຈີນ, ສະນັ້ນທາງໂຄງການຕ້ອງຍັບຍ້າຍໂຮງຮຽນມາຢູ່ບ່ອນໃຫມ່ພາຍໃນບ້ານດັ່ງກ່າວ ເຊີ່ງຫ່າງກັນບໍ່ຮອດ 1 ກິໂລແມັດ ໂດຍໄດ້ສ້າງອາຄານໃຫມ່ໃຫ້ຈໍານວນ 2 ຫລັງ ປະກອບມີຫ້ອງຮຽນ ແລະ ຫ້ອງການລວມທັງຫມົດ 8 ຫ້ອງ, ພ້ອມຕິດຕັ້ງໂຕະ-ຕັ່ງ, ກະ ດານ, ລະບົບໄຟຟ້າ ແລະ ຫ້ອງນໍ້າຄົບຊຸດ, ຈາກນັ້ນໄດ້ເລີ່ມການຮຽນ-ການສອນຢູ່ໂຮງຮຽນຫລັງໃຫມ່ນັບແຕ່ເດືອນ ພະ ຈິກ ປີ 2021 ເປັນຕົ້ນມາ.
ອາຈານ ບຸນຖັນ ຢືນຢັນວ່າ: ການຮຽນ- ການສອນຂອງໂຮງຮຽນພາຍຫລັງຍ້າຍມາຢູ່ໂຮງຮຽນຫລັງໃຫມ່ ມີຄວາມສະ ດວກສະບາຍຫລາຍ ຍ້ອນມີອາຄານທີ່ແຫນ້ນຫນາຖາວອນ, ໂຕະ-ຕັ່ງ ແລະ ອຸປະກອນການຮຽນທີ່ຄົບຊຸດ, ທັງມີຄວາມສະອາດງາມຕາ ເຊີ່ງແຕກຕ່າງກັນຫລາຍກັບໂຮງຮຽນຫລັງເກົ່າທີ່ເປັນໂຮງຮຽນເຄີ່ງຖາວອນທີ່ຊຸດໂຊມເກົ່າແກ່ ແລະ ຍັງຂາດສິ່ງອໍານວຍຄວາມສະດວກຫລາຍຢ່າງ. ຂະນະທີ່ນັກຮຽນມີຄວາມກະຕືລືລົ້ນຫລາຍໃນການມາໂຮງຮຽນ ແລະ ເຮັດໃຫ້ອັດ ຕາການຂາດຮຽນຂອງນັກຮຽນຫລຸດລົງ ຍ້ອນການຮຽນ-ການສອນສະດວກສະບາຍຫລາຍເມື່ອທຽບໃສ່ໂຮງຮຽນຫລັງເກົ່າ.
ປັດຈຸບັນ ໂຮງຮຽນປະຖົມບ້ານບ້ວມອໍ້ ມີຄູສອນ ທັງຫມົດ 3 ຄົນ ແລະ ນັກຮຽນທັງກຽມອະນຸບານ ແລະ ປະຖົມສຶກສາ 45 ຄົນ.
BT, ວສລ
