ສະຖາບັນຄົ້ນຄວ້າວິທະຍາສາດການສຶກສາ (ສວສ) ກະຊວງສຶກສາທິການ ແລະ ກິລາ ໄດ້ຈັດກອງປະຊຸມຮັບຮອງຕົ້ນສະບັບປຶ້ມຄູ່ມືຄູແຊກຊ້ອນສຶກສາພົນລະເມືອງໂລກເຂົ້າໃນວິຊາສຶກສາພົນລະເມືອງ ຊັ້ນມັດທະຍົມສຶກສາ ເມື່ອວັນທີ 18 ກັນຍາ 2023 ທີ່ຫ້ອງປະຊຸມຂອງສະຖາບັນດັ່ງກ່າວ, ໂດຍພາຍໃຕ້ການເປັນປະທານຂອງທ່ານ ຮສ.ປອ ອານຸລົມ ວິໄລພອນ ຜູ້ອຳນວຍການ ສະຖາບັນຄົ້ນຄວ້າວິທະຍາສາດການສຶກສາ, ມີຫົວໜ້າ-ຮອງຫົວໜ້າກົມ, ຜູ້ອຳນວຍການສະຖາບັນ, ສູນ, ຄະນະຮັບຜິດຊອບ, ຄູ່ຮ່ວມພັດທະນາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມ, ທ່ານ ຮສ.ປອ ອານຸລົມ ວິໄລພອນ ໄດ້ກ່າວວ່າ: ການຈັດກອງປະຊຸມໃນຄັ້ງນີ້, ເພື່ອຮັບຮອງຕົ້ນສະບັບປຶ້ມຄູ່ມືຄູແຊກຊ້ອນສຶກສາພົນລະເມືອງໂລກເຂົ້າໃນວິຊາສຶກສາພົນລະເມືອງ ຊັ້ນມັດທະຍົມສຶກສາໄດ້ສຳເລັດ ເພື່ອສະໜອງໃຫ້ຄູສອນຂອງພວກເຮົາໃຫ້ມີຕົ້ນສະບັບສົມບູນ ແລະ ເພື່ອເຜີຍແຜ່, ເສີມສ້າງຄວາມເຂົ້າໃຈກ່ຽວກັບເນື້ອໃນສຶກສາພົນລະເມືອງໂລກຕໍ່ຜູ້ເຂົ້າຮ່ວມກອງປະຊຸມ ໂດຍອີງໃສ່ປຶ້ມຄູ່ມືຄູ ແລະ ການທົດລອງການສອນໃນແຕ່ລະຂັ້ນຮຽນຜ່ານມາ ຊຶ່ງການເຊື່ອມໂຍງ ແລະ ເສີມສ້າງເນື້ອໃນສຶກສາພົນລະເມືອງໂລກເຂົ້າໃນຫຼັກສູດຜ່ານສື່ການຮຽນການສອນທີ່ມີປະສິດທິຜົນ ແມ່ນມີຄວາມຈຳເປັນໃນໂລກທີ່ມີການປ່ຽນແປງນີ້ ແລະ ເພື່ອການບັນລຸຄຳໝັ້ນສັນຍາທົ່ວໂລກ ໂດຍສະເພາະຢ່າງຍິ່ງແມ່ນເປົ້າໝາຍການພັດທະນາແບບຍືນຍົງ (SDGs 4.7). ກິດຈະກຳໃນໂຄງການນີ້, ປະກອບມີ ກອງປະຊຸມການສ້າງຄວາມອາດສາມາດ ແລະ ການຮ່ວມມືຜະລິດສື່ການຮຽນການສອນຂອງແຕ່ລະປະເທດ ເຊັ່ນ: ປຶ້ມຄູ່ມືຄູ, ອຸປະກອນການຮຽນຮູ້ (ໜັງສື, ສື່ທີ່ເປັນສຽງ ແລະ ອື່ນໆ) ໂດຍໄດ້ຮັບການສະໜັບສະໜູນຈາກຜູ້ຊ່ຽວຊານ, ນັກການສຶກສາ ແລະ ສູນການສຶກສາເພື່ອຄວາມເຂົ້າໃຈສາກົນໃນພາກພື້ນອາຊີ-ປາຊີຟິກ ສ.ເກົາຫຼີ, ຜົນໄດ້ຮັບຈະສະໜັບສະໜູນການເພີ່ມປະສິດທິພາບຂອງການສຶກສາພົນລະເມືອງໂລກ ໃນສະຖານການສຶກສາ ສປປ ລາວ, ກິດຈະກຳຜ່ານມາ ປີທີ 1 (2021) ສຳເລັດການວິເຄາະສະຖານະການ ແລະ ການສ້າງແຜນປະຕິບັດໂຄງການ, ປີທີ 2 (2022) ແມ່ນສຳເລັດພັດທະນາເອກະສານຫຼັກສູດ ເຊັ່ນ: ພັດທະນາແບບແຜນປະຕິບັດງານຂອງການສຶກສາພົນລະເມືອງໂລກ, ພັດທະນາຫຼັກສູດແຊກຊ້ອນການສຶກສາພົນລະເມືອງໂລກ (GCED) ສໍາລັບໂຮງຮຽນມັດທະຍົມຕອນຕົ້ນ ແລະ ຕອນປາຍ, ພັດທະນາຄູ່ມືຄູກ່ຽວກັບຫຼັກສູດແຊກຊ້ອນການສຶກສາພົນລະເມືອງໂລກ (GCED) ແລ້ວໄດ້ຈັດກອງປະຊຸມສຶກສາເນື້ອໃນ ແລະ ກວດຜ່ານຫຼັກສູດແຊກຊ້ອນການສຶກສາພົນລະເມືອງໂລກ ແລະ ປີທີ 3 (2023) ຈະເປັນການທົດລອງນໍາໃຊ້ປຶ້ມຄູ່ມືຄູທີ່ສ້າງຂຶ້ນ ແລະ ພ້ອມກວດສອບປັບປຸງຄືນ (ເປັນປີຊຸດທ້າຍຂອງໂຄງການ).
ສຳລັບການທົດລອງນຳໃຊ້ປຶ້ມຄູ່ມືຄູຈະມີ 2 ໄລຍະ ຄື: ໄລຍະທີ 1 ກອງປະຊຸມປະຖົມນິເທດຄະນະພັດທະນາຫຼັກສູດ ແລະ ກອງປະຊຸມທົດລອງນຳໃຊ້ປຶ້ມຄູ່ມືຄູຈາກຊ່ຽວຊານໂຄງການ ຢູ່ແຂວງບໍລິຄຳໄຊ (ສໍາເລັດໄປແລ້ວ), ໄລຍະທີ 2 ກອງປະຊຸມທົດລອງໃຫຍ່ ຊຶ່ງພວກເຮົາໄດ້ເອົາກຸ່ມຕົວຢ່າງ 3 ແຂວງເຂົ້າຮ່ວມ ປະກອບມີ ແຂວງຊຽງຂວາງ, ແຂວງບໍລິຄຳໄຊ ແລະ ແຂວງສະຫວັນນະເຂດ (ແມ່ນມີຜົນສຳເລັດໄປໄດ້ດ້ວຍດີ). ພ້ອມກັນນັ້ນ, ກອງປະຊຸມຄັ້ງນີ້ ຂໍໃຫ້ບັນດາຄະນະກຳມະການຮັບຮອງຫຼັກສູດ ແລະ ສື່ການຮຽນການສອນ ສຸມຈິດໃຈປະກອບຄຳຄິດຄຳເຫັນຢ່າງກົງໄປກົງມາໃສ່ການກວດຜ່ານ, ຮັບຮອງ ແລະ ປັບປຸງຕົ້ນສະບັບປຶ້ມຄູ່ມືຄູແຊກຊ້ອນສຶກສາພົນລະເມືອງໂລກໃຫ້ສໍາເລັດ ເພື່ອໃຫ້ມີຄວາມເປັນເອກະພາບ ແລະ ສາມາດຮັບຮອງໄດ້.
ນອກຈາກນີ້, ຜູ້ເຂົ້າຮ່ວມກອງປະຊຸມຍັງໄດ້ຮັບຟັງການລາຍງານສະພາບລວມຂອງການຈັດຕັ້ງປະຕິບັດໂຄງການພັດທະນາຫຼັກສູດ ແລະ ແຊກຊ້ອນການສຶກສາພົນລະເມືອງໂລກ, ພາບລວມປຶ້ມສຶກສາພົນລະເມືອງ ມ.ຕົ້ນ, ມ.ປາຍ. ກອງປະຊຸມດັ່ງກ່າວ, ໄດ້ດຳເນີນໄປເປັນເວລາ 2 ວັນ ລະຫວ່າງວັນທີ 18-19 ກັນຍາ 2023.
ໂດຍ ບົວລະພາ
