ຂ່າວຕ່າງປະເທດລາຍງານ ໃນວັນທີ 18 ກັນຍາ ຜ່ານມາ, ກະຊວງພາຍໃນຍີ່ປຸ່ນໄດ້ເປີດເຜີຍບົດລາຍງານໂດຍລະບຸວ່າ: 29,1% ຂອງປະຊາກອນໃນຍີ່ປຸ່ນມີອາຍຸ 65 ປີຂຶ້ນໄປ ເພີ່ມຂຶ້ນ 0,1% ເມື່ອທຽບກັບສະຖິຕິຂອງປີ 2022 ແລະ ເປັນສະຖິຕິສູງທີ່ສຸດຂອງໂລກ ໂດຍອີຕາລີຢູ່ໃນອັນດັບທີ 2 ດ້ວຍສະຖິຕິ 24,5% ຕາມມາດ້ວຍແຟັງລັງ 23,6%.
ຂະນະທີ່ປະຊາກອນປະມານ 12,59 ລ້ານຄົນ ຫຼື ຄິດເປັນ 1 ໃນ 10 ຂອງປະຊາກອນທົ່ວປະເທດໃນປັດຈຸບັນມີຜູ້ທີ່ມີອາຍຸ 80 ປີຂຶ້ນໄປ ແລະ ປະຊາກອນປະມານ 20 ລ້ານຄົນ ມີອາຍຸ 75 ປີຂຶ້ນໄປ. ຍ້ອນເຫດຜົນນີ້, ຍີ່ປຸ່ນຈຶ່ງຍັງຄົງມີແຮງງານອາຍຸສູງໃນລະບົບ ປັດຈຸບັນມີຈຳນວນປະມານ 9 ລ້ານຄົນ ຄິດເປັນອັດຕາສ່ວນ 13,6% ຂອງແຮງງານທັງໝົດທົ່ວປະເທດ ແຕ່ຍັງນ້ອຍກວ່າ ສ ເກົາຫຼີ ຊຶ່ງມີອັດຕາສ່ວນແຮງງານອາຍຸສູງ ຢູ່ທີ່ 36,2%. ທັງນີ້, ກະຊວງພາຍໃນຍີ່ປຸ່ນໄດ້ຄາດຄະເນວ່າ ອັດຕາສ່ວນປະຊາກອນຜູ້ອາຍຸສູງ ໃນປະເທດຈະເພີ່ມຂຶ້ນມາຢູ່ທີ່ 34,8% ພາຍໃນປີ 2040.
