ໂຮງແຮມລາວພລາຊາ ເປັນໜຶ່ງໂຮງແຮມ ໃນນະຄອນຫຼວງວຽງຈັນ ທີ່ໄດ້ມາດຕະຖານອາຊຽນ ຈົນເປັນທີ່ຍອມຮັບແຂກທັງພາຍໃນ ແລະ ຕ່າງປະເທດ ເຂົ້າມາໃຊ້ບໍລິການນັບມື້ເພີ່ມຂຶ້ນ ແລະ ໂຮງແຮມດັ່ງກ່າວຍັງມີຄວາມພ້ອມ 100% ເພື່ອຮອງຮັບ ແລະ ຕ້ອນຮັບນັກທ່ອງທ່ຽວໃນປີ 2024 ນີ້.
ທ່ານ ທອງພັນ ທະວີໄຊ ຜູ້ຮັບຜິດຊອບຝ່າຍການຕະຫຼາດ ໂຮງແຮມລາວພລາຊາ ໄດ້ໃຫ້ສຳພາດຕໍ່ສື່ມວນຊົນ ໃນໂອກາດງານເປີດໂຕມາດຕະຖານການທ່ອງທ່ຽວໃນ ສປປ ລາວ ເມື່ອບໍ່ດົນມານີ້ວ່າ: ໂຮງແຮມລາວພລາຊາ ໄດ້ເປີດບໍລິການລູກຄ້າມາໄດ້ 20 ກວ່າປີແລ້ວ, ສາມາດຮອງຮັບແຂກທັງພາຍໃນ ແລະ ຕ່າງປະເທດນັບມື້ເພີ່ມຂຶ້ນໃນແຕ່ລະປີ, ໂດຍສະເພາະໄດ້ຮອງຮັບແຂກລັດຖະບານ ແລະ ແຂກທົ່ວໄປຈົນເປັນທີ່ຍອມຮັບມາຮອດປັດຈຸບັນ. ພ້ອມນັ້ນ, ໂຮງແຮມລາວພລາຊາຊຶ່ງໄດ້ຮັບລາງວັນສະຖານທີ່ຈັດງານ, ຫ້ອງປະຊຸມມາດຕະຖານອາຊຽນ ໃນປີ 2018 ທີ່ຊຽງໃໝ່ ປະເທດໄທ ແລະ ປີ 2022 ທີ່ປະເທດກໍາປູເຈຍ ຖືເປັນຂີດໝາຍສໍາຄັນຫຼາຍທີ່ເປັນມາດຕະຖານຂອງໂຮງແຮມ ຊຶ່ງໃນໄລຍະການແຜ່ລະບາດຂອງພະຍາດໂຄວິດ-19 ຜ່ານມາ ຍັງໄດ້ເນັ້ນປັບປຸງຫຼາຍຈຸດຂອງໂຮງແຮມເຊັ່ນ: ຫ້ອງພັກ, ຫ້ອງປະຊຸມໃຫຍ່, ຫ້ອງລັອບບີ້ ແລະ ຈຸດອື່ນໆ ເພື່ອຕ້ອນຮັບປີທ່ອງທ່ຽວລາວ 2024 ນີ້ ໃຫ້ເປັນທີ່ຍອມຮັບ ແລະ ເພິ່ງພໍໃຈຂອງລູກຄ້າທີ່ເຂົ້າມາໃຊ້ບໍລິການ, ມາຮອດປັດຈຸບັນໂຮງແຮມມີຄວາມພ້ອມ 100% ທີ່ຈະຕ້ອນຮັບແຂກທັງພາຍໃນ ແລະ ຕ່າງປະເທດເຂົ້າມາທ່ຽວລາວ ໂດຍສະເພາະເຂົ້າມາໃຊ້ບໍລິການໂຮງແຮມແຫ່ງນີ້. ສຳລັບຫ້ອງປະຊຸມຂອງໂຮງແຮມແມ່ນສາມາດຮອງຮັບແຂກຄົນໄດ້ເຖິງ 150-250 ຄົນ.
ທ່ານ ທອງພັນ ທະວີໄຊ ກ່າວຕື່ມວ່າ: ປັດຈຸບັນຢູ່ ສປປ ລາວ ກໍຄືໃນນະຄອນຫຼວງວຽງຈັນ ການເຮັດທຸລະກິດດ້ານໂຮງແຮມກໍມີການຂະຫຍາຍຕົວ ແລະ ນັບມື້ເພີ່ມຂຶ້ນຫຼາຍ. ສະນັ້ນ, ພວກເຮົາຈະບໍ່ຢຸດການພັດທະນາຢູ່ບ່ອນເກົ່າ, ຕ້ອງໄດ້ມີການປັບປຸງ ແລະ ພັດທະນາຫຼາຍໆດ້ານຢູ່ໃນໂຮງແຮມໃຫ້ຫຼາຍຂຶ້ນກ່ວາເກົ່າ ເພື່ອໃຫ້ເປັນທີ່ເພິ່ງພໍໃຈກັບຄວາມຮຽກຮ້ອງຕ້ອງການຂອງລູກຄ້າ ໂດຍສະເພາະໃຫ້ສົມກັບເປັນໂຮງແຮມລະດັບມາດຕະຖານຂອງອາຊຽນ ເນື່ອງຈາກວ່າປີ 2024 ລາວເຮົາຍັງຈະເປັນເຈົ້າພາບອາຊຽນຕື່ມອີກ.
ດັ່ງນັ້ນ, ເພື່ອໂສມໜ້າໃໝ່ຂອງໂຮງແຮມໃນວຽກງານການທ່ອງທ່ຽວ, ການບໍລິການດ້ານໂຮງແຮມກໍເປັນສ່ວນໜຶ່ງສຳຄັນຫຼາຍ ທີ່ຈະເປັນໂສມໜ້າໃໝ່ ຂອງປະເທດລາວເຮົາ ແລະ ຂໍຝາກເຖິງລູກຄ້າເກົ່າຜູ້ທີ່ເຄີຍເຂົ້າມາໃຊ້ບໍລິການແລ້ວ ແລະ ລູກຄ້າໃໝ່ ທີ່ຍັງບໍ່ເຄີຍເຂົ້າມານຳໃຊ້ຈັກເທື່ອ, ພວກເຮົາຂໍໃຫ້ລູກຄ້າມີຄວາມໝັ້ນໃຈ, ໄວ້ວາງໄວ້ໂຮງແຮມຂອງພວກເຮົາໄດ້ເລີຍ, ເພາະເປັນໂຮງແຮມທີ່ໄດ້ມາດຕະຖານ, ມີການບໍລິການທີ່ດີແລ້ວ, ຍັງມີສິ່ງເອື້ອອໍານວຍຄວາມສະດວກທຸກໆດ້ານ, ທຸກໆສ່ວນຂອງໂຮມແຮມ ໃຫ້ທຸກພາກສ່ວນເຂົ້າມາໃຊ້ບໍລິການໄດ້. ໂຮງແຮມລາວພລາ ຊາຕັ້ງຢູ່ ຖະໜົນສາມແສນໄທ ນະຄອນຫຼວງວຽງຈັນ.
