ໃນຕອນເຊົ້າວັນທີ 8 ກັນຍາ 2023 ທີ່ເມືອງທ່າແຕງ, ແຂວງເຊກອງ ໄດ້ຈັດກອງປະຊຸມເຜີຍແຜ່ບັນດານິຕິກຳ ທີ່ກ່ຽວຂ້ອງ ຄະນະສະເພາະກິດ 19/ກມສພ ໃຫ້ ເຈົ້າແຂວງ-ຮອງເຈົ້າແຂວງ ຜູ້ຊີ້ນໍາວຽກງານຂົງເຂດເສດຖະ ກິດ ແລະ ພະນັກງານຫຼັກແຫຼ່ງ ບັນດາແຂວງພາກໃຕ້ (ເຊກອງ, ຈໍາປາສັກ, ສາລະວັນ ແລະ ອັດຕະປື) ໂດຍການໃຫ້ກຽດເປັນປະທານ ຂອງ ພົນເອກ ວິໄລ ຫຼ້າຄຳຟອງ, ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນຄວາມສະຫງົບ (ປກສ), ຮອງຫົວໜ້າຄະນະສະເພາະກິດຮັບຜິດຊອບແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ (ຄະນະສະເພາະກິດ 19/ກມສພ), ມີທ່ານ ເຈົ້າແຂວງໆເຊກອງ, ທ່ານ ຜູ້ວ່າການທະນາຄານແຫ່ງ ສປປ ລາວ, ຮອງເຈົ້າແຂວງ, ພະນັກງານຫຼັກແຫຼ່ງ 4 ແຂວງພາກໃຕ້ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.
ໃນໂອກາດນີ້, ທ່ານ ເຫຼັກໄຫຼ ສີວິໄລ ເຈົ້າແຂວງໆ ເຊກອງ ໄດ້ກ່າວສະແດງຄວາມຍິນດີຕ້ອນຮັບທ່ານ ຮອງນາຍົກລັດຖະ ມົນຕີ ພ້ອມດ້ວຍຜູ້ເຂົ້າຮ່ວມກອງປະຊຸມ ແລະ ໄດ້ລາຍງານຫຍໍ້ກ່ຽວກັບການຈັດ ຕັ້ງປະຕິບັດເແຜນພັດທະນາເສດຖະ ກິດ-ສັງຄົມຂອງແຂວງໃນໄລຍະຜ່ານມາ ເຫັນວ່າທົ່ວແຂວງ ສືບຕໍ່ຮັບປະກັນສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ເສດຖະກິດ ແລະ ການດຳລົງຊີວິດຂອງປະຊາຊົນ ກໍ່ຍັງຢູ່ໃນຈັງຫວະຂະຫຍາຍຕົວ; ສະພາບ ການລົງທຶນລວມມີບັນຍາກາດຟົດຟື້ນດີ; ຂະບວນການຜະລິດເປັນສິນຄ້າເພື່ອສົ່ງ ອອກ ແລະ ທົດແທນການນຳເຂົ້າ ກໍເກີດມີໜໍ່ແໜງໃໝ່ຫຼາຍຢ່າງ; ການລ້ຽງ ສັດເປັນຟາມ ສາມາດຕອບສະໜອງແກ່ຜູ້ບໍລິໂພກພາຍໃນ ໄດ້ຈຳນວນຫຼາຍ ແລະ ສາມາດສົ່ງອອກຕ່າງແຂວງ ແລະ ຕ່າງປະເທດຈໍານວນໜຶ່ງ.
ໃນໂອກາດກ່າວເປີດກອງປະຊຸມ, ທ່ານ ປະທານກອງປະຊຸມ ໄດ້ກ່າວວ່າ: ເພື່ອເປັນບ່ອນອີງໃນການຈັດຕັ້ງປະຕິ ບັດ ໃຫ້ເປັນເອກະພາບ, ມີປະສິດທິພາບ ແລະ ປະສິດທິຜົນ ໃຫ້ແກ່ການເພີ່ມທະວີ ການແກ້ໄຂບັນຫາເຄັ່ງຮ້ອນ ທາງດ້ານເສດຖະ ກິດ ຕິດພັນກັບການຈັດຕັ້ງປະຕິບັດ 02 ວາລະແຫ່ງຊາດ ໃຫ້ດີຂຶ້ນ ດ້ວຍມາດຕະການຕ່າງໆ ທີ່ລະອຽດ ແລະ ຮັດກຸມ ແນໃສ່ເຮັດໃຫ້ເສດຖະກິດ-ການເງິນ ກ້າວສູ່ສະພາບປົກກະຕິໂດຍໄວ ຕິດພັນກັບການປັບປຸງແກ້ໄຂຊີວິດການເປັນຢູ່ຂອງ ພະ ນັກງານ, ທະຫານ, ຕໍາຫຼວດ ແລະ ປະຊາ ຊົນລາວບັນດາເຜົ່າໃຫ້ດີຂຶ້ນ ຮັບປະກັນບໍ່ໃຫ້ປະເທດເຮົາ ຕົກເຂົ້າສູ່ວິກິດທາງດ້ານເສດຖະກິດ ແລະ ສາມາດຮັບປະກັນສະຖຽນລະພາບຂອງເສດຖະກິດ-ການເງິນ ກໍ່ຄື ຄວາມສະຫງົບ ແລະ ເປັນລະບຽບຮຽບຮ້ອຍໃນສັງຄົມ. ສຳລັບການເຜີຍແຜ່ບັນດານິຕິກໍາທີ່ກ່ຽວຂ້ອງ ຂອງລັດຖະ ບານ ກໍ່ຄື ຂອງຄະນະສະເພາະກິດ ຕາມມະຕິຕົກລົງເລກທີ 19/ກມສພ ຈາກພາກສ່ວນທີ່ກ່ຽວຂ້ອງໃນຄັ້ງນີ້ ປະກອບມີ:
(1) ມະຕິຕົກລົງ ຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກ ປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ ສະບັບເລກທີ 19/ກມສພ, ລົງວັນທີ 30 ມິຖຸນາ 2023;
(2) ແຈ້ງການກ່ຽວກັບທິດຊີ້ນໍາຂອງກົມການເມືອງ ຮ່ວມກັບຄະນະເລຂາທິການສູນກາງພັກ ສະບັບເລກທີ 48/ຫສພ, ລົງວັນທີ 13 ກໍລະກົດ 2023;
(3) ຄຳສັ່ງ ຂອງນາຍົກລັດຖະມົນຕີ ວ່າດ້ວຍການຈັດຕັ້ງປະຕິບັດ ການຄຸ້ມຄອງເງິນຕາຕ່າງປະເທດ ເລກທີ 10/ນຍ, ລົງວັນທີ 14 ກໍລະກົດ 2023;
(4) ຂໍ້ຕົກລົງ ວ່າດ້ວຍການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ ສະບັບເລກທີ 93/ນຍ, ລົງວັນທີ 14 ກໍລະກົດ 2023;
(5) ຂໍ້ຕົກລົງ ວ່າດ້ວຍການແບ່ງວຽກໃນຄະນະສະເພາະກິດ ແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ສະບັບເລກທີ 91/ນຍ, ລົງວັນທີ 14 ກໍລະກົດ 2023;
(6) ແຜນການ ເຄື່ອນໄຫວວຽກຈຸດສຸມ ສະບັບເລກທີ 01/ນຍ, ລົງວັນທີ 18 ກໍລະກົດ 2023 ຂອງຄະນະສະເພາະກິດ ຕາມມະຕິຕົກລົງ ສະ ບັບເລກທີ 19/ກມສພ, ລົງວັນທີ 30 ມິຖຸນາ 2023;
(7) ຄຳສັ່ງ ນາຍົກລັດຖະມົນຕີ ວ່າດ້ວຍການເພີ່ມທະວີ ແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ສະບັບເລກທີ 13/ນຍ, ລົງວັນທີ 29 ສິງຫາ 2023.
ພາຍຫຼັງຮັບຟັງການເຜີຍແຜ່ ບັນດານິຕິກໍາດັ່ງກ່າວ, ບັນດາທ່ານທີ່ເຂົ້າຮ່ວມກອງປະຊຸມ ຕາງໜ້າໃຫ້ບັນດາແຂວງ ກໍ່ໄດ້ປະກອບຄຳເຫັນຕໍ່ບັນດານະໂຍບາຍ, ຂໍ້ກໍານົດ, ຫຼັກການ, ທິດທາງຈຸດສຸມ ແລະ ເນື້ອໃນເອກະສານ ທີ່ຈະຈັດຕັ້ງປະຕິບັດວຽກງານຕົວຈິງຢູ່ຮາກຖານ ຢ່າງກົງໄປ- ກົງມາ ເພື່ອໃຫ້ສອດຄ່ອງກັບສະພາບຄວາມເປັນຈິງ ໃນປັດຈຸບັນ, ຍົກໃຫ້ເຫັນບັນດາດ້ານດີ, ຂໍ້ຫຍຸ້ງຍາກ ແລະ ຂໍ້ຄົງຄ້າງ, ພ້ອມທັງ ສະ ເໜີໃຫ້ຄະນະສະ ເພາະກິດ ຄົ້ນຄວ້າພິຈາລະນາ ບາງບັນຫາທີ່ຕິດພັນກັບການພັດທະນາເສດຖະ ກິດ-ສັງຄົມຂອງແຂວງ ເພື່ອສາມາດຮັບປະກັນນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ ໄປຈັດຕັ້ງປະຕິບັດໃຫ້ເປັນຮູບປະທຳ, ມີການຫັນປ່ຽນ ແລະ ມີປະສິດທິຜົນສູງ.
ໃນຕອນທ້າຍ, ທ່ານຮອງນາຍົກລັດຖະ ມົນຕີ ໄດ້ຕີລາຄາສູງຕໍ່ການເຜີຍແຜ່ບັນດານິຕິກໍາຄັ້ງນີ້ ໂດຍສະເພາະ ການຍົກສູງຄວາມຮັບຜິດຊອບ ເພື່ອຮັບຟັງ ແລະ ໃຫ້ຄວາມສົນໃຈແລກປ່ຽນຫຼາຍບັນຫາທີ່ກ່ຽວຂ້ອງ; ມີການຖາມ-ຕອບ, ອະ ທິບາຍຊີ້ແຈງ ໃນແຕ່ລະບັນຫາຢ່າງເລິກເຊິ່ງ, ພາວະວິໄສ ແລະ ຕິດພັນກັບໜ້າວຽກຕົວຈິງ ໃນຂະແໜງການຂອງຕົນຮັບ ຜິດຊອບ; ສິ່ງສໍາຄັນ ຜູ້ເຂົ້າຮ່ວມກອງປະຊຸມ ໄດ້ມີຄວາມເປັນເອກະພາບສູງ, ເຊື່ອໜັ້ນ ຕໍ່ບັນດາທິດທາງ, ມາດຕະ ການແກ້ໄຂ, ແຜນວຽກຈຸດສຸມ ທີ່ສູນກາງພັກ ແລະ ລັດຖະບານ ກໍ່ຄື ຄະນະສະເພາະກິດ 19/ກມສພ ພວມດໍາເນີນຈັດຕັ້ງປະຕິ ບັດຢູ່. ເພື່ອເຮັດໃຫ້ການເຜີຍແຜ່ນິຕິກຳໃນຄັ້ງນີ້ທົ່ວເຖິງ, ກວມເອົາທຸກກຸ່ມເປົ້າໝາຍ, ທ່ານຍັງໄດ້ຮຽກຮ້ອງມາຍັງຄະນະພັກ-ຄະນະນຳບັນດາແຂວງ, ພະແນກການ, ເມືອງ ແລະ ພາກສ່ວນທີ່ກ່ຽວຂ້ອງ ລວມທັງ ຜູ້ທີ່ເຂົ້າຮ່ວມກອງປະຊຸມໃນຄັ້ງນີ້ ຈົ່ງໄດ້ພ້ອມກັນນຳເອົາເນື້ອໃນຈິດໃຈຂອງກອງປະຊຸມ ລົງເຜີຍແຜ່ໃຫ້ກວ້າງຂວາງ ແລະ ຈັດຕັ້ງປະຕິບັດຕົວຈິງ ໃຫ້ມີຄວາມຄືບໜ້າ, ມີປະສິດທິຜົນ. ໃນໂອກາດນີ້ ທ່ານ ຮອງນາຍົກລັດຖະມົນຕີ ຍັງໄດ້ເນັ້ນໜັກໃຫ້ສືບຕໍ່ເອົາໃຈໃສ່ບາງບັນ ຫາ ເປັນຕົ້ນ:
(1) ຕໍ່ກັບທິດຊີ້ນໍາ ກ່ຽວກັບມາດຕະການແກ້ໄຂບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ແມ່ນໃຫ້ກໍານົດການແກ້ໄຂອອກເປັນປະຈໍາວັນ, ປະຈໍາອາທິດ; ຊຸກຍູ້ການເກັບລາຍຮັບ ຢູ່ບັນດາດ່ານຊາຍແດນ, ຊຸກຍູ້ສົ່ງເສີມການຄ້າຊາຍແດນໃຫ້ໄດ້ຫຼາຍຂຶ້ນ; ປັບປຸງການຄຸ້ມຄອງດ່ານ ໃຫ້ມີຄວາມເປັນເອກະພາບ ຕາມທິດຫັນເປັນທັນສະໄໝ, ໂປ່ງໃສ, ມີຄວາມສະດວກ, ວ່ອງໄວ ໂດຍຫຼຸດຜ່ອນຂັ້ນຂອດທີ່ບໍ່ຈໍາເປັນ ທັງແກ້ໄຂປະກົດການຫຍໍ້ທໍ້ຕ່າງຄົນຕ່າງເຮັດ; ເພີ່ມທະວີການດຶງດູດການລົງທຶນໂດຍກົງ ຈາກຕ່າງປະເທດໃຫ້ຫຼາຍ, ດໍາເນີນຂັ້ນຕອນອະນຸມັດໂຄງການໃຫ້ໄວ; ການນໍາເຂົ້າທຶນ ຕ້ອງຜ່ານລະບົບທະນາຄານ ແລະ ແລກປ່ຽນເປັນເງິນກີບ ກ່ອນນໍາໄປຈັດຕັ້ງປະຕິບັດ; ຄຸ້ມຄອງການເຄື່ອນໄຫວທາງການເງິນ ຂອງທະ ນາຄານທຸລະກິດ, ບັນຫາການແລກປ່ຽນເງິນຕານອກລະບົບ, ຮັບປະກັນບໍ່ໃຫ້ມີການປັ່ນປ່ວນເສດຖະກິດ ແລະ ແກ້ໄຂບັນຫາການແລກປ່ຽນເງິນຕາຜິດກົດ ໝາຍ ພ້ອມທັງ ນໍາໃຊ້ມາດຕະການຢ່າງເຂັ້ມງວດ, ເດັດຂາດ ຕໍ່ຜູ້ລະເມີດ ແລະ ກະທໍາຜິດກົດໝາຍ, ຕໍ່ຜູ້ສວຍໃຊ້ໜ້າທີ່ຫາຜົນປະໂຫຍດແບບບໍ່ຊອບທໍາ ໂດຍບໍ່ມີການຍົກເວັ້ນ; ການນໍາເຂົ້າ-ສົ່ງອອກ ຕ້ອງຊໍາລະຜ່ານລະບົບທະນາຄານ, ຂື້ນທະບຽນ ແລະ ຄຸ້ມຄອງຜູ້ນໍາເຂົ້າ-ສົ່ງ ອອກ, ແກ້ໄຂສະພາບ ໃຜກໍ່ມີສິດນໍາເຂົ້າ, ຫຼົບຫຼີກການເສຍພາສີ ແລະ ອື່ນໆ;
(2) ມອບໃຫ້ອົງການປົກຄອງແຂວງ ຊີ້ນໍາ, ຊຸກຍູ້, ຕິດຕາມ ການຈັດຕັ້ງປະຕິບັດຜັນຂະຫຍາຍບັນດານິຕິກໍາ ທີ່ໄດ້ເຜີຍແຜ່ຄັ້ງນີ້ ຂອງບັນດາພະແນກ ການ ແລະ ພາກສ່ວນກ່ຽວຂ້ອງ ທີ່ຢູ່ໃນຄວາມຮັບ ຜິດຊອບຂອງຕົນ ໃຫ້ຖືກກັບແຜນດຳ ເນີນງານ ແລະ ໜ້າທີ່ລວມ ຂອງຄະນະສະເພາະກິດ 19/ກມສພ ເພື່ອເປັນພື້ນຖານ ໃນການຈັດແບ່ງວຽກຈຸດສຸມຂອງຂັ້ນທ້ອງຖິ່ນ, ແຕ່ລະໜ້າວຽກຈຸດສຸມ ຕ້ອງມີຄວາມລະອຽດ, ຈະແຈ້ງ ໂດຍກໍານົດຂອບເຂດຄວາມຮັບຜິດຊອບ ຕາມພາລະບົດບາດໃນຂະແໜງການຂອງຕົນ; ດຳເນີນການກວດກາ, ແລະ ປະເມີນຜົນເປັນແຕ່ລະໄລຍະ, ໃນເວລາຈັດຕັ້ງປະຕິບັດ ຫາກພົບບັນຫາຫຍຸ້ງຍາກ ໃຫ້ຮີບຮ້ອນລາຍງານຂໍທິດຊີ້ນໍາຈາກຄະນະສະເພາະກິດ 19/ກມສພ ໃຫ້ທັນການ; ຫາກມີຜູ້ບໍ່ປະຕິບັດ ຫຼື ມີເຈດຕະນາຝ່າຝືນ ແມ່ນໃຫ້ກ່າວເຕືອນ, ຂຶ້ນບັນຊີເປົ້າໝາຍ ແລ້ວສົ່ງໃຫ້ເຈົ້າໜ້າກ່ຽວຂ້ອງດໍາເນີນມາດຕະການ ຕາມຂັ້ນຕອນຂອງລະບຽບການກ່ຽວຂ້ອງ;
(3) ການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ, ກະຈາຍແຫຼ່ງທຶນສູ່ທ້ອງຖິ່ນ ໃຫ້ສົມທົບກັບອົງ ການປົກຄອງທ້ອງຖິ່ນ ຄົ້ນຄວ້າກໍານົດເຂດຈຸດສຸມ, ປະເພດ, ຊະນິດຜະລິດຕະ ພັນ ເພື່ອສົ່ງເສີມ; ໃນນັ້ນ, ໃຫ້ສຸມໃສ່ຜະລິດຕະພັນ ທີ່ເປັນທ່າແຮງຂອງແຕ່ລະທ້ອງຖິ່ນ ທີ່ສາມາດແຂ່ງຂັນ ແລະ ໄດ້ຄຸນນະພາບ ເປັນຕົ້ນ: ກະສິກໍາສະອາດ, ອຸດສາຫະກໍາປຸງແຕ່ງສໍາເລັດຮູບ, ເຄິ່ງສໍາເລັດຮູບ ເພື່ອຈໍາໜ່າຍພາຍໃນ ແລະ ສົ່ງອອກຕ່າງປະເທດ;
(4) ກ່ຽວກັບຄໍາສັ່ງ ວ່າດ້ວຍການຄຸ້ມ ຄອງເງິນຕາຕ່າງປະເທດ ການຈັດຕັ້ງປະຕິບັດຕົວຈິງ ກໍ່ຍັງມີຄວາມຈໍາເປັນຕ້ອງໄດ້ປະສານງານຮ່ວມມື ນໍາທຸກພາກ ສ່ວນ ເພື່ອແກ້ໄຂບັນຫາເສດຖະກິດ -ການເງິນ ໃຫ້ຜ່ອນຄາຍລົງ ແລະ ກ້າວສູ່ສະພາບປົກກະຕິໂດຍໄວ;
(5) ໃຫ້ບັນດາແຂວງ ເອົາໃຈໃສ່ຕໍ່ການຈັດເກັບລາຍຮັບ, ຄຸ້ມຄອງລາຍຈ່າຍ ແຜນພັດທະນາເສດຖະກິດ-ສັງຄົມແຫ່ງຊາດ ກໍ່ຄື ແຜນ ການເງິນ-ແຜນງົບປະມານ ປະຈໍາປີ 2023 ຂອງແຂວງ ໃນໄລຍະເວລາທີ່ຍັງເຫຼືອ ໃຫ້ບັນລຸຕາມແຜນການທີ່ກຳນົດໄວ້.
ການເຄື່ອນໄຫວເຮັດວຽກຄັ້ງນີ້, ທ່ານ ຮອງນາຍົກລັດຖະມົນຕີ ແລະ ຄະນະ ຍັງໄດ້ໄປຢ້ຽມຢາມເຮັດວຽກ ຢູ່ ໂຮງງານກາເຟດາວເຮືອງ ທີ່ແຂວງຈຳປາສັກ ຕື່ມອີກ.
ຂ່າວ-ພາບ: ກົມປະຊາສຳພັນ ສຫນຍ
