ດ້ວຍຄວາມເປັນຫ່ວງເປັນໄຍຂອງການນໍາພັກ-ລັດ ໃນວັນທີ 10 ກັນຍາ 2023 ທ່ານ ເຫຼັກໄຫຼ ສີ ວິໄລ ເຈົ້າແຂວງເຊກອງ ພ້ອມຄະນະ ໄດ້ນໍາເອົາເຄື່ອງຊ່ວຍເຫຼືອໄປມອບໃຫ້ 4 ຄອບຄົວ ຢູ່ບ້ານດາກໂດມ ທີ່ປະສົບເຄາະຮ້າຍຈາກອັກຄີໄພ ໂດຍມີອົງການປົກຄອງບ້ານ ແລະ ພາກສ່ວນກ່ຽວຂ້ອງເຂົ້າຮ່ວມ.
ເຄື່ອງຊ່ວຍເຫຼືອທີ່ນໍາໄປມອບຄັ້ງນີ້ ປະກອບມີ: ອຸປະໂພກ ແລະ ບໍລິໂພກ ລວມມູນຄ່າ 40 ລ້ານກວ່າກີບ ແລະ ເງິນ 20 ລ້ານກວ່າກີບ ເຊິ່ງເຫດການໄຟໄໝ້ເຮືອນ ທີ່ເກີດຂຶ້ນໃນວັນທີ 8 ກັນຍາ 2023 ຜ່ານມາ ສາເຫດມາຈາກໄຟຟ້າພະລັງນໍ້າຂະໜາດນ້ອຍຂອງຄອບຄົວ (ໄຟຟ້າໄດນາໂມ ລັດວົງຈອນ) ເຮັດໃຫ້ເຮືອນ ແລະ ພາຫະນະຮັບໃຊ້ ພາຍໃນເຮືອນເສຍຫາຍ ຄິດເປັນມູນຄ່າປະມານ 1 ຕື້ກວ່າກີບ.
ໂອກາດນີ້ ທ່ານ ເຫຼັກໄຫຼ ສີວິໄລ ກໍໄດ້ສະແດງຄວາມເສຍໃຈຕໍ່ເຫດການທີ່ເກີດຂຶ້ນໃນຄັ້ງນີ້ ແລະ ຮຽກຮ້ອງໃຫ້ປະຊາຊົນມີສະຕິ ມີແນວຄິດອຸ່ນອ່ຽງທຸ່ນທ່ຽງ ພ້ອມປຸກລະດົມ ຂົນຂວາຍບັນດາຂະແໜງການ ບັນດາບໍລິສັດ ລັດວິສາຫະກິດ ບຸກຄົນ ນິຕິບຸກຄົນ ນໍາເອົາເຄື່ອງຊ່ວຍເຫຼືອມາມອບໃຫ້ ເພື່ອເປັນການແບ່ງເບົາບັນເທົາທຸກ ແລະ ນໍາໄປຟື້ນຟູຄອບຄົວໃຫ້ກັບຄືນສູ່ສະພາບປົກກະຕິໂດຍໄວ.
