ຕາມຂ່າວຈາກ ວະທິຍຸສາກົນ ຫວຽດນາມ,ເມື່ອບໍ່ດົນມານີ້ ຢູ່ນະຄອນຫລວງ ຮ່າໂນ້ຍ, ທ່ານ ຫງວຽນຝູຈ້ອງ, ເລຂາ ທິການໃຫຍ່ ຄະນະ ບໍລິຫານງານ ສູນກາງ ພັກກອມມູນິດ ຫວຽດ ນາມ ແລະ ທ່ານ ໂຈໄບເດນ(Joe Biden), ປະທານາທິບໍດີ ສ.ອາເມລິກາ ໄດ້ປະກາດ ຕໍ່ສື່ມວນຊົນກ່ຽວກັບໝາກ ຜົນອັນດີງາມ ຂອງການເຈລະຈາ ສອງຝ່າຍ ໄດ້ຮັບຮອງ ເອົາຖະແຫລງການ ຮ່ວມ, ຍົກລະດັບ ການພົວພັນ ຫວຽດນາມ-ສ.ອາເມລິກາ ຂຶ້ນເປັນ “ການພົວພັນ ຄູ່ຮ່ວມມື ຍຸດທະສາດ ຮອບດ້ານ ເພື່ອສັນຕິພາບ, ການຮ່ວມມື ແລະ ການພັດທະນາ ແບບຍືນຍົງ”. ທ່ານ ຫງວຽນຝູຈ້ອງ ໄດ້ຍົກໃຫ້ເຫັນເຖິງ ການເຈລະຈາ ຢ່າງເລິກເຊິ່ງ, ກ້ວາງຂວາງ ບັນລຸໝາກຜົນ ອັນດີງາມ.
ໂດຍສອງຝ່າຍເຫັນດີເປັນເອກະພາບຖືວ່າການພົວພັນ ສສ.ຫວຽດນາມ-ສ.ອາເມລິກາ ໄດ້ມີບັນດາບາດກ້າວພັດທະນາຢ່າງແຮງ, ເລິກເຊິ່ງ, ແທດຈິງ, ມີປະສິດທິຜົນ ນັບແຕ່ເວລາ ຫັນການພົວພັນ ເປັນປົກກະຕິ ໃນປີ 1995 ແລະ ພາຍຫລັງ ທີ່ສອງປະເທດ ສ້າງການພົວພັນ ຄູ່ຮ່ວມມື ຮອບດ້ານ ໃນປີ 2013.ສຳລັບ ການພົວພັນ ຄູ່ຮ່ວມມືນັ້ນ ສືບຕໍ່ອີງໃສ່ ພື້ນຖານ ເຄົາລົບບັນດາ ຫລັກການພື້ນຖານ ທີ່ກຳນົດທິດ ໃຫ້ແກ່ ການພົວພັນລະຫວ່າງ ສອງປະເທດໃນໄລຍະຜ່ານມາຢ່າງຄົບຖ້ວນ, ໃນນັ້ນ ມີການເຄົາລົບ ກົດບັດ ສປຊ, ກົດໝາຍສາກົນ ແລະ ລະບອບ ການເມືອງ, ເອກະລາດ, ອະທິປະໄຕ, ຜືນແຜ່ນດິນ ອັນຄົບຖ້ວນ, ສ້າງຄວາມເຂົ້າອົກເຂົ້າໃຈ, ສະພາບການ ຂອງກັນ, ເຄົາລົບ ບັນດາ ຜົນປະໂຫຍດ ທີ່ຊອບທຳ ຂອງກັນ ແລະ ບໍ່ແຊກແຊງ ເຂົ້າວຽກງານ ພາຍໃນຂອງກັນ ແມ່ນບັນດາ ຫລັກການ ພື້ນຖານ, ຍາມໃດ ກໍ່ມີຄວາມໝາຍ ສຳຄັນ ໃນການພົວພັນ ສອງປະເທດ ແລະ ການພົວພັນສາກົນ. ຫວຽດນາມ ຕີລາຄາສູງ ແລະ ຖືເປັນສຳຄັນ ຄຳຢັ້ງຢືນຂອງ ສ.ອາເມລິກາ ທີ່ສະໜັບ ສະໜູນ ສສ ຫວຽດ ນາມ ເຂັ້ມແຂງ, ເອກະລາດ, ສ້າງຄວາມເຂັ້ມແຂງ ດ້ວຍຕົນເອງ ແລະ ວັດທະນາຖາວອນ.ຈາກນັ້ນ ທ່ານ ໂຈໄບເດນ ຢັ້ງຢືນ ການລະດັບ ການພົວພັນ ສອງຝ່າຍ ໃນຄັ້ງນີ້ ແມ່ນບາດກ້າວ ຈຳເປັນ ທີ່ສຸດ, ເພື່ອແນໃສ່ ສືບຕໍ່ ເປີດກ້ວາງ ການພົວພັນ ຄູ່ຮ່ວມມື ເສດຖະກິດ ເພື່ອຊຸກຍູ້ ການລົງທຶນ ແລະ ການຄ້າ ລະຫວ່າງ ສອງປະເທດ ເພີ່ມຂຶ້ນ ພ້ອມທັງ ຕີລາຄາສູງ ວິທີການ ເຊິ່ງສອງປະເທດ ແລະ ປະຊາຊົນ ສອງປະເທດ ດຳເນີນ ເພື່ອສ້າງ ຄວາມໄວ້ເນື້ອ ເຊື່ອກັນ ແລະ ຄວາມເຂົ້າອົກ ເຂົ້າໃຈ ເຊິ່ງກັນ ແລະ ກັນ ເພື່ອແກ້ໄຂ ຜົນຮ້າຍ ຢ້ອນຫລັງ ຈາກສົງຄາມ./.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
