ວັນທີ່ 9 ກັນຍາ 2023ນີ້ ທ່ານ ວັນໄຊ ແພງຊຸມມາ ເຈົ້າແຂວງໆຫົວພັນ ພ້ອມດ້ວຍພາກສ່ວນທີ່ກ່ຽວຂ້ອງຂັ້ນແຂວງໄດ້ຕ້ອນຮັບ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະຢູ່ທີ່ ດ່ານສາກົນນໍ້າໂສຍ. ຈຸດປະສົງໃນການລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫົວພັນໃນຄັ້ງນີ້ ກໍ່ເພື່ອເປັນການຈັດຕັ້ງປະຕິບັດ 2 ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ແລະ ການແກ້ໄຂຄວາມຫຍຸ້ງຍາກດ້ານຢາເສບຕິດ,ຢູ່ພາຍໃນແຂວງຫົວພັນ.
ພັນໂທ ກິ່ງແກ້ວ ຄໍາມີໄຊ ຫົວໜ້າຄະນະຄຸ້ມຄອງດ່ານສາກົນນໍ້າໂສຍໄດ້ລາຍງານການເຄື່ອນໄຫວວຽກງານດ້ານຕ່າງໆໃນໄລຍະ 2 ປີ( 2022-2023)ໃຫ້ນາຍົກລັດຖະມົນຕີ ແລະຄະນະໄດ້ຮັບຊາບ: ເຊີ່ງສະແດງອອກປີ 2022 ແຈ້ງຄົນເຂົ້າຜ່ານດ່ານສາກົນນໍ້າໂສຍ ທັງໝົດ 15.700ຄົນ,ໃນນີ້ ຄົນລາວ 3.000ຄົນ, ຄົນຫວຽດນາມ 12.000 ຄົນ, ແຈ້ງຄົນອອກ 13.436 ຄົນ, ໃນນີ້ ຄົນລາວແຈ້ງອອກ 3,368 ຄົນ,ຄົນຫວຽດນາມແຈ້ງອອກ 10,068 ຄົນ,ໄລຍະ 9 ເດືອນປີ 2023ມີຄົນແຈ້ງເຂົ້າອອກທັງໝົດ 12.716 ຄົນ, ໃນນີ້ ຄົນລາວແຈ້ງເຂົ້າ 3,144 ຄົນ, ແຈ້ງຄົນຫວຽດນາມເຂົ້າ 9,572 ຄົນ, ແຈ້ງຄົນອອກທັງໝົດ 12.584ຄົນ,ໃນນີ້ ຄົນລາວແຈ້ງອອກ 3,661 ຄົນ,ຄົນຫວຽດແຈ້ງອອກ 8,923 ຄົນ.
ປີ 2022 ຜ່ານມາ ມີພາຫະນະຂາເຂົ້າ 8,005 ຄັນ, ພາຫະນະຂາອອກ 967 ຄົນ, ພາຫະນະ, ສິນຄ້າສົ່ງອອກ – ນໍາເຂົ້າ ປີ 2023.ພາຫະນະຂາເຂົ້າ 4,993 ຄັນ, ພາຫະນະຂາອອກ 693 ຄັນ, ສິນຄ້າສົ່ງອອກປິ 2022 ປະເພດ: ແຮ່ເຫຼັກ, ຜົນຜະລິດກະສິກໍາ, ສາລີ ແລະ ເຄື່ອງປ່າຂອງດົງຈຳນວນໜຶ່ງ ມີມູນຄ່າທັງໝົດ 16.900.000ກວ່າໂດລາ,ສິນຄ້າສົ່ງອອກປີ 2023 ປະເພດ: ແຮ່ເຫຼັກ, ຜົນຜະລິດກະສິກຳ, ສາລີ ແລະ ເຄື່ອງປ່າຂອງດົງຈຳນວນໜຶ່ງ ມີມູນຄ່າທັງໝົດ ເກືອບ 5ລ້ານໂດລາ ແລະ ເຫັນວ່າປີ2023 ຄົນເຂົ້າ-ອອກ,ການນໍາເຂົ້າ-ສົ່ງອອກສິນຄ້າຜ່ານດ່ານສາກົນນໍ້າໂສຍຫຼຸດລົງ.
ໂອກາດນີ້ ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ມີຄໍາເຫັນໂອ້ລົມຕໍ່ການນໍາຂອງແຂວງ ໂດຍເນັ້ນໜັກໃຫ້ບັນດາພະແນກການ, ພາກສ່ວນທີ່ກ່ຽວຂ້ອງພ້ອມກັນເອົາໃຈໃສ່ຈັດຕັ້ງປະຕິບັດ2 ວາລະແຫ່ງຊາດໃຫ້ໄດ້, ໂດຍສະເພາະ ຕ້ອງສຸ່ມໃສ່ສະກັດກັ້ນບັນຫາຢາເສບຕິດເຂດລຽບຊາຍແດນໃຫ້ມີຄວາມສະຫງົບໂດຍພື້ນຖານ,ຊຸກຍູ້ປະຊາຊົນສຸມໃສ່ການປູກຝັ່ງ-ລ້ຽງສັດ,ຄ້າຂາຍບໍລິການຕ່າງໆຕາມທ່າແຮງທີ່ມີພາຍໃນແຂວງ, ຕາມຄວາມສາມາດຂອງແຕ່ລະຄອບຄົວໃຫ້ຫຼາຍກາຍເປັນສິນຄ້າສົ່ງອອກໃຫ້ຫຼາຍຂື້ນກວ່າເກົ່າ, ສຸມໃສ່ວຽກງານການເກັບລາຍຮັບ-ລາຍຈ່າຍພາຍໃນແຂວງໃຫ້ມີຄວາມສອດຄ່ອງເໝາະສົມ,ປັບປຸງ ແລະ ບໍລິການ ບັນດາແຫຼ່ງທ່ອງທ່ຽວທີ່ມີເພື່ອດືງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວແຂວງຫົວພັນໃຫ້ນັບມື້ຫຼາຍຂື້ນ,ແຂວງຕ້ອງສ້າງສີ່ງອໍານວຍຄວາມສະດວກໃຫ້ນັກລົງທຶນທີ່ຈະເຂົ້າມາລົງທືນພາຍໃນແຂວງເພື່ອພັດທະນາພື້ນຖານໂຄງລ່າງໃຫ້ມີການພັດທະນາຂື້ນເລື່ອຍໆ, ທັງນີ້ກໍ່ເພື່ອເຮັດໃຫ້ຊິວິດການເປັນຢູ່ຂອງປະຊາຊົນບັນດາເຜົ່າໃຫ້ມີທ່າກ້າວຂະຫຍາຍຕົວກ້າວໄປເຖິງການຫຼຸດພົ້ນອອກຈາກຄວາມທຸກຍາກເທື່ອລະກ້າວ.
