ໜັກແລ້ວ ຖ້າຜິດແທ້ຈິງ ເມື່ອມີຜູ້ເຄາະຮ້າຍເພດຍິງອີກ 2 ຄົນ ອອກມາເປີດເຜີຍວ່າ ຖືກ ແອນໂທນີ ປີກຊາວບຣາຊິນຂອງ ແມນເຊສເຕີ ຢູໄນເຕັດ ທີມດັງໃນພຣີເມຍລີກ ອັງກິດ ພາຍໃຕ້ການນຳທີມຂອງ ເອຣິກ ເທນ ຮາກ ຜູ້ຈັດການຊາວໂຮນລັງ ທໍາຮ້າຍຮ່າງກາຍ – ລ່ວງລະເມີດທາງເພດແບບບໍ່ຍິນຍອມ.
ກ່ອນໜ້ານີ້ບໍ່ເທົ່າໃດມື້ທີ່ຜ່ານມາ ແອນໂທນີ ຖືກຫຼາຍສື່ໂຈມຕີວ່າພົບຫຼັກຖານທີ່ຕົວເຂົາທໍາຮ້າຍຮ່າງກາຍອະດີດຄູ່ຮັກສາວ ເຊິ່ງຈາກກະແສຂ່າວລະບຸວ່າ: ຕຳຫຼວດສາມາດເຂົ້າເຖິງຮູບພາບ, ວິດີໂອ, ບົດສົນທະນາ ແລະ ຄໍາໃຫ້ການຈາກພະຍານອ້ອມຂ້າງ ຊຶ່ງສໍ່ໃຫ້ເຫັນເຖິງໄພຄຸກຄາມ ຕະຫຼອດຈົນການຂົ່ມຂູ່ ແລະ ພາບທໍາຮ້າຍຮ່າງກາຍຈາກນັກເຕະຄົນນີ້ອີກດ້ວຍ ຕະຫຼອດຈົນມີຄລິບວີດີໂອທີ່ກໍາລັງຖືກສືບສວນຢູ່ ສະແດງໃຫ້ເຫັນອາການບາດເຈັບທີ່ເປີດເຜີຍໃຫ້ເຫັນກະດູກພາຍໃນນິ້ວມືຂອງ ກາເບຣຍລາ ອີກດ້ວຍ ຈົນຖືກຕັດຊື່ຖິ້ມອອກທີມຊາດບຣາຊິນ ຊຸດເຕະບານໂລກ ຮອບຄັດເລືອກ.
ຫຼ້າສຸດ ຣາຢິສຊາ ເດ ເຟຣຍຕາສ ແລະ ອິງກຣິດ ລານາ ກໍອອກມາລະບຸວ່າ ພວກເຂົາກໍປະສົບສູດຊົ່ວຮ້າຍຈາກ ແອນໂທນີ ທັງການຖືກທໍາຮ້າຍຮ່າງກາຍ ແລະ ບັງຄັບມີຄວາມສຳພັນອັນເລິກເຊິ່ງແບບບໍ່ໄດ້ຕັ້ງໃຈ ໂດຍຄົນທໍາອິດ ລະບຸວ່າ ຖືກປີກອາຍຸ 23 ປີຄົນນີ້ ໃຊ້ຄວາມຮຸນແຮງກັບເຂົາຕອນຢູ່ເທິງລົດທີ່ນະຄອນເຊົາ ເປົາໂລ, ປະເທດບຣາຊິນ ກ່ອນທີ່ຈະຕ້ອງເຂົ້າຮັບການປິ່ນປົວຢູ່ທີ່ໂຮງໝໍ ສ່ວນຄົນຫຼັງ ກ່າວວ່າ ແອນໂທນີ ພະຍາຍາມຈະມີຄວາມສໍາພັນອັນເລິກເຊິ່ງກັບເຂົາແບບທີ່ເຂົາບໍ່ໄດ້ຍິນຍອມ ຈົນເຮັດໃຫ້ຖືກທໍາຮ້າຍດ້ວຍການຖືກຍູ້ເຂົ້າກັບກໍາແພງຫີນ ແລະ ຕີຫົວຂອງລາວຢ່າງແຮງ.
