ຫ້ອງວ່າການສຳນັກງານນາຍົກລັດຖະມົນຕີ ຈັດເຜີຍແຜ່ເອກະສານສຳຄັນຂອງພັກ ແລະ ລັດ ໃນວັນທີ 8 ກັນຍາ 2023 ເຊິ່ງປະກອບມີ: ຄໍາສັ່ງຂອງຄະນະເລຂາທິການສູນກາງພັກ ສະບັບເລກທີ 411/ຄລສພ, ລົງວັນທີ 08 ສິງຫາ 2023 ວ່າດ້ວຍການກະກຽມ ແລະ ການດໍາເນີນກອງປະຊຸມໃຫຍ່ 3 ຂັ້ນຂອງພັກ; ຄໍາແນະນໍາ ຂອງຄະນະຈັດຕັ້ງສູນກາງພັກສະບັບເລກທີ 211/ຄຈສພ, ລົງວັນທີ 16 ສິງຫາ 2023 ການຈັດຕັ້ງປະຕິບັດຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ການດຳເນີນກອງປະ ຊຸມໃຫຍ່ 3 ຂັ້ນຂອງພັກ; ຄໍາສັ່ງ ຂອງນາຍົກລັດຖະມົນຕີ ສະບັບເລກທີ 13/ນຍ, ລົງວັນທີ 29 ສິງຫາ 2023 ວ່າດ້ວຍການເພີ່ມທະວີແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ.
ໂອກາດນີ້, ສະຫາຍ ອາລຸນໄຊ ສຸນນະລາດ ເລຂາຄະນະພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໄດ້ຍົກໃຫ້ເຫັນເຖິງການຈັດຕັ້ງປະຕິບັດ ຄຳສັ່ງຂອງຄະນະເລຂາ ທິການສູນກາງພັກ ວ່າດ້ວຍການກະກຽມ ແລະ ການດໍາເນີນກອງປະຊຸມໃຫຍ່ 3 ຂັ້ນຂອງພັກ ແລະ ຄໍາແນະນໍາການຈັດຕັ້ງປະຕິບັດຄໍາສັ່ງ ຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ການດຳເນີນກອງປະຊຸມໃຫຍ່ 3 ຂັ້ນຂອງພັກ. ທັງນີ້, ກໍເພື່ອຮັບປະກັນໃຫ້ແກ່ການຈັດຕັ້ງປະຕິບັດ ເນື້ອໃນຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ໃຫ້ຖືກຕ້ອງ, ເປັນເອກະພາບ ແລະ ທັນເວລາໃນທົ່ວພັກ, ເຊິ່ງຄະນະຈັດຕັ້ງສູນກາງພັກ ໄດ້ອອກຄຳແນະນຳຈັດຕັ້ງປະຕິບັດ ໂດຍສະເພາະ ການກະກຽມດ້ານຂະບວນການ, ເນື້ອໃນ ແລະ ການດຳເນີນຊິວີດການເມືອງ; ການເລືອກເຟັ້ນບຸກຄະລາກອນ ເປັນຕົ້ນ ເປົ້າໝາຍເລືອກເຟັ້ນບຸກຄະລາກອນ ທີ່ຈະອອກສະໝັກຮັບເລືອກຕັ້ງເຂົ້າໃນ ໂຄງການປະກອບຄະນະບໍລິຫານງານພັກແຕ່ລະຂັ້ນ, ໂຄງປະກອບພັກແຕ່ລະຂັ້ນ, ການກຳນົດຄະນະປະຈຳພັກແຕ່ລະຂັ້ນ, ການກຳນົດຈຳນວນຜູ້ອອກທາບທາມ ແລະ ອອກສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກແຕ່ລະຂັ້ນ.
ສະຫາຍ ອາລຸນໄຊ ສຸນນະລາດ ໄດ້ກ່າວວ່າ: ເພື່ອຜັນຂະຫຍາຍມະຕິຕົກລົງ ຂອງກົມການ ເມືອງສູນກາງພັກ ກ່ຽວກັບການເພີ່ມທະວີການແກ້ໄຂ ສະພາບຄວາມຫຍຸ້ງຍາກ, ເຄັ່ງຮ້ອນ ຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ຈະຕ້ອງສຸມໃສ່ປຸກລະດົມທົ່ວສັງຄົມ ເຂົ້າຮ່ວມໃນຂະບວນການແກ້ໄຂບັນຫາທີ່ເຄັ່ງຮ້ອນ ທາງດ້ານເສດຖະກິິດ-ການເງິນ ຖືເອົາວຽກງານດັ່ງກ່າວ, ເປັນສະໜາມຮົບອັນດັບໜຶ່ງ ທີ່ຈະຕ້ອງຮ່ວມແຮງຮ່ວມໃຈ ຈັດຕັ້ງປະຕິບັດໃຫ້ເປັນຈິງ ແລະ ມີການຫັນປ່ຽນຈະແຈ້ງ. ພ້ອມດຽວກັນກໍຍູ້ແຮງການພັດທະນາຊົນນະບົດ, ແກ້ໄຂຄວາມທຸກຍາກ ແລະ ຍົກລະດັບຄຸນນະພາບຊີວິດຂອງປະຊາຊົນໃຫ້ມີປະສິດທິຜົນ, ໃຫ້ປະຊາຊົນຕື່ນຕົວປະກອບສ່ວນເຂົ້າຮ່ວມແກ້ໄຂບັນຫາຫຍໍ້ທໍ້ຕ່າງໆ ຢູ່ຮາກຖານໃຫ້ໄດ້ດີ ເປັນຕົ້ນໃຫ້ການຮ່ວມມື, ອຳນວຍຄວາມສະດວກ, ສະໜອງຂໍ້ມູນ; ສະກັດກັ້ນ ແລະ ແກ້ໄຂບັນດາປະກົດການຫຍໍ້ທໍ່ຕ່າງໆ ທີ່ກ່ຽວຂ້ອງກັບຄວາມຫຍຸ້ງຍາກທາງດ້ານເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ລວມໄປເຖິງການແກ້ໄຂຄວາມຫຍຸງຍາກ, ຝືດເຄືອງໃນການດຳລົງຊີວິດ, ການເຄືອນໄຫວດຳເນີນການຜະລິດ, ທຸລະກິດ ແລະ ການບໍລິການຕ່າງໆ ທີ່ສົ່ງຜົນກະທົບຕໍ່ສະຖຽນລະພາບທາງດ້ານການເມືອງ, ການພັດທະນາເສດຖະກິດ-ສັງຄົມ, ສິ່ງແວດລ້ອມ, ຄວາມເປັນລະບຽບຮຽບຮ້ອຍ ແລະ ຄວາມສະຫງົບປອດໄພໃນສັງຄົມ.
ຂ່າວ-ພາບ: ກິດຕາ
