ງານແຂ່ງຂັນກິລາປິ່ງປ່ອງເຍົາວະຊົນໂລກ (WTT youth contender) ປະຈໍາປີ 2023 ທີ່ ສປປ ລາວ ເປັນເຈົ້າພາບ ແມ່ນຈະຈັດຂຶ້ນໃນລະຫວ່າງວັນທີ 20-23 ກັນຍາ ທີ່ຈະມາເຖິງນີ້ ຢູ່ສູນການຄ້າລາວ-ໄອເຕັກ ຊຶ່ງສະຫະພັນປິ່ງປ່ອງແຫ່ງຊາດລາວ ໃນນາມຜູ້ກະກຽມງານ ກໍໄດ້ລາຍງານຄວາມພ້ອມດ້ານຕ່າງໆວ່າກະກຽມໄດ້ສົມບູນ ແລະ ພ້ອມແລ້ວທີ່ຈະເປີດງານ ເປັນເຈົ້າພາບທີ່ດີ. ຫຼາຍຂໍ້ມູນທີ່ສຳຄັນ ໃຫ້ຮູ້ໃນພິທີຖະແຫຼ່ງຂ່າວ ການກະກຽມຄວາມພ້ອມ ການຈັດງານແຂ່ງຂັນກິລາປິ່ງປ່ອງເຍົາວະຊົນໂລກ ປະຈໍາປີ 2023 ເມື່ອວັນທີ 5 ກັນຍາ ຜ່ານມາ; ໃນນັ້ນ, ນອກຈາກຈະໃຫ້ຮູ້ເຖິງຄວາມພ້ອມດ້ານຕ່າງໆແລ້ວ ກໍຍັງໃຫ້ຮູ້ວ່າ ສປປ ລາວ ບໍ່ພຽງແຕ່ໄດ້ຮັບກຽດເປັນເຈົ້າພາບຈັດງານໃນປີນີ້ເທົ່ານັ້ນ, ແຕ່ຍັງຈະເປັນເຈົ້າພາບຈັດໃນປີ 2024 ອີກ; ໝາຍວ່າ ປະເທດເຮົາ ໄດ້ຮັບກຽດເປັນເຈົ້າພາບເຖິງ 2 ປີຕິດຕໍ່ກັນ.
ທ່ານ ນາງ ອໍລະໄທ ສັນຕິຄົງຄາ ຮອງປະທານສະຫະພັນປິ່ງປ່ອງແຫ່ງຊາດລາວ ກໍໄດ້ໃຫ້ຮູ້ເຖິງສາເຫດສຳຄັນ ທີ່ປະເທດຂອງພວກເຮົາໄດ້ຮັບກຽດເປັນເຈົ້າພາບວ່າ: ການໄດ້ຮັບກຽດເປັນເຈົ້າພາບ ຈັດການແຂ່ງຂັນດັ່ງກ່າວ ກໍເນື່ອງມາຈາກວ່າ ສະຫະພັນກິລາປິ່ງປ່ອງແຫ່ງຊາດລາວ ໄດ້ປະສົບຜົນສຳເລັດໃນການເປັນເຈົ້າພາບ ຈັດການແຂ່ງຂັນປິ່ງປ່ອງສາກົນຫຼາຍຄັ້ງເປັນທີ່ຍອມຮັບ ແລະ ໄວ້ໃຈຈາກສາກົນ. ສະເພາະ, ສະຫະພັນກິລາປິ່ງປ່ອງແຫ່ງຊາດລາວແລ້ວ, ການໄດ້ຮັບມອບໝາຍໃຫ້ຈັດງານແຂ່ງຂັນໃນຄັ້ງນີ້ ນອກຈາກຈະເປັນການປະຕິບັດໜ້າທີ່ທາງດ້ານການມືອງ ແລະ ວິຊາສະເພາະຂອງຕົນ ໃນນາມສະມາຊິກສະຫະພັນປິ່ງປ່ອງສາກົນແລ້ວ ຍັງເປັນການຍົກລະດັບຄວາມຮູ້, ຄວາມສາມາດຂອງບຸກຄະລາກອນຝ່າຍຕ່າງໆ ຂອງສະຫະພັນກິລາປິ່ງປ່ອງແຫ່ງຊາດລາວ ໃຫ້ດີຂຶ້ນກວ່າເກົ່າ ແລະ ທັງເປັນການກະຕຸ້ນເສດຖະກິດ, ສົ່ງເສີມການທ່ອງທ່ຽວລາວອີກດ້ວຍ ຊຶ່ງເຊື່ອໝັ້ນວ່າບັນດາຜູ້ເຂົ້າຮ່ວມງານຈາກສາກົນ ມີໂອກາດທ່ຽວຊົມສະຖານທີ່ທ່ອງທ່ຽວທີ່ເປັນເອກະລັກ, ມີສະເໜ່ ແລະ ສວຍງາມຂອງ ສປປ ລາວ.
ໂດຍລວມແລ້ວ, ສາເຫດສຳຄັນໃນການທີ່ ສປປ ລາວ ໄດ້ຮັບກຽດເປັນເຈົ້າພາບຈັດງານແຂ່ງຂັນກິລາປິ່ງປ່ອງເຍົາວະຊົນໂລກ ປະຈໍາປີ 2023 ແລະ ໄດ້ຮັບການມອບໝາຍຈາກສະຫະພັນປິ່ງປ່ອງສາກົນ ໃນການສືບຕໍ່ເປັນເຈົ້າພາບໃນປີ 2024 ກໍເນື່ອງຈາກຜົນສຳເລັດໃນການຈັດງານໃນການເປັນເຈົ້າພາບ ຈັດການແຂ່ງຂັນປິ່ງປ່ອງສາກົນຫຼາຍຄັ້ງ; ພ້ອມດຽວກັນນີ້, ກໍໄດ້ມີຄວາມໝາຍສຳຄັນຕໍ່ກັບການພັດທະນານັກກິລາປິ່ງປ່ອງ ເຍົາວະຊົນລາວ ແລະ ເປັນໂອກາດຊ່ວຍກະຕຸ້ນເສດຖະກິດຂອງປະເທດເຮົາອີກດ້ວຍ.
ໂດຍ: ຍຸພິນທອງ
