ຕາມແຫລ່ງຂ່າວ ວິເຄາະ ຕ່າງປະເທດ, ກອງປະຊຸມ ສຸດສຸດ ອາຊີ ຕາເວັນອອກ ສ່ຽງໃຕ້ (ອາຊຽນ) ຄັ້ງທີ 43 ທີ່ ພວມຈັດຂຶ້ນ ຢູ່ ນະຄອນຫລວງ ຈາກາຕາ ປະເທດ ອິນໂດເນເຊຍ, ບັນດາ ຜູ້ນຳ ຈາກປະເທດ ສະມາຊິກ ອາຊຽນ ໄດ້ເລັ່ງແກ້ໄຂ ບັນຫາ ມຽນມາ ໃຫ້ກ້າວເຂົ້າສູ່ ສັນຕິພາບ ໂດຍໄວ ຫລັງຈາກ ມຽນມາ ບໍ່ໄດ້ເຂົ້າຮ່ວມ ກອງປະຊຸມສຸດຍອດ ອາຊຽນ ເປັນໄລຍະ 2 ປີ ຕິດຕໍ່ກັນ ເນື່ອງຈາກຜູ້ນຳອາຊຽນ ບໍ່ໄດ້ເຊີນຜູ້ແທນມຽນມາ ເຂົ້າຮ່ວມ ກອງປະຊຸມ ດັ່ງກ່າວ ຍ້ອນສາເຫດ ການເຮັດ ລັດຖະປະຫານ ແລະ ຄວາມບໍ່ສະຫງົບ ໃນປະເທດ ມຽນມາ ຫລ້າສຸດ ມີການເຄື່ອນໄຫວວ່າ: ລັດຖະບານ ທະຫານ ມຽນມາ ຈະບໍ່ຮັບຕຳແໜ່ງ ເປັນປະທານ ອາຊຽນ ໃນປີ 2026 ຫລື ອີກ 3 ປີ ຕໍ່ໜ້າ ເນື່ອງຈາກ ພາຍໃນປະເທດ ຍັງບໍ່ມີ ຄວາມສະຫງົບ. ສຳລັບ ຕຳແໜ່ງ ປະທານ ອາຊຽນ ໄດ້ນຳໃຊ້ ວິທີ ໝູນວຽນກັນ ວາລະ 1 ປີ ຕາມລຳດັບ ໂດຍອີງຕາມ ຕົວອັກສອນ ຂອງ ປະເທດ ສະມາຊິກ. ສຳລັບ ປີນີ້ີ້ ແມ່ນ ອິນໂດເນເຊຍ ແລະ ຈະສົ່ງມອບໃຫ້ ສປປ ລາວ ເປັນປະທານ ອາຊຽນ ໃນປີ 2024 ແລະ ຕາມມາດ້ວຍ ມາເລເຊຍ ຈະເປັນ ປະທານ ອາຊຽນ ໃນປີ 2025. ໃນຂະນະທີ່ ຟີລິບປິນ ຈະເປັນປະທານ ອາຊຽນ ແທນ ມຽນມາ ໃນປີ 2026 ແລະ ຄາດວ່າ ມຽນມາ ຈະຮັບເປັນ ປະທານ ອາຊຽນ ໃນປີ 2027. ມຽນມາ ເຂົ້າເປັນ ສະມາຊິກ ອາຊຽນ ໃນປີ 1997 ພາຍໃຕ້ ລັດຖະບານ ທະຫານ ແລະ ຄວາມພິພາດ ທາງການເມືອງ ເປັນເວລາ 9 ປີ ແລ້ວ ທ່າມກາງ ຄວາມກົດດັນ ຂອງ ສາກົນ ບັນຫາ ດ້ານສິດທິມະນຸດ ພາຍໃນ ປະເທດ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
