ໃນວັນທີ 07 ກັນຍາ 2023 ທີ່ ຈາກາກຕາ, ອິນໂດເນເຊຍ, ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ສືບຕໍ່ນໍາພາຄະນະ ເຂົ້າຮ່ວມກອງປະຊຸມສຸດຍອດອາຊຽນ-ອິນເດຍ ຄັ້ງທີ 20, ກອງປະຊຸມສຸດຍອດອາຊີຕາເວັນອອກ (EAS) ຄັ້ງທີ 18, ກອງປະຊຸມສຸດຍອດອາຊຽນ-ອົດສະຕຣາລີ ຄັ້ງທີ 3 ແລະ ກອງປະຊຸມສຸດຍອດອາຊຽນ- ສະຫະປະຊາຊາດ ຄັ້ງທີ 13.
ກອງປະຊຸມສຸດຍອດອາຊຽນ-ອິນເດຍ ຄັ້ງທີ 20 ໄດ້ສະແດງຄວາມຊົມເຊີຍຕໍ່ໝາກຜົນຂອງການພົວພັນຮ່ວມມືອາຊຽນ-ອິນເດຍ ຕະຫຼອດໄລຍະຜ່ານມາ ແລະ ໄດ້ຮັບຮອງເອົາຖະແຫຼງການຮ່ວມຂອງຜູ້ນໍາອາຊຽນ-ອິນເດຍ ວ່າດ້ວຍ ການຮ່ວມມືດ້ານຄວາມໝັ້ນຄົງດ້ານສະບຽງອາຫານ ແລະ ໂພສະນາການ ໃນຍາມມີວິກິດການ ແລະ ຖະແຫຼງການຮ່ວມອາຊຽນ-ອິນເດຍ ວ່າດ້ວຍການຮ່ວມມືທາງທະເລ. ພ້ອມນີ້, ຜູ້ນໍາອາຊຽນ ແລະ ອິນເດຍ ໄດ້ເຫັນດີສືບຕໍ່ເສີມຂະຫຍາຍການຮ່ວມມືດ້ານການເຊື່ອມຈອດ ແລະ ການພັດທະນາພື້ນຖານໂຄງລ່າງ ແນໃສ່ສົ່ງເສີມ ແລະ ອໍານວຍຄວາມສະດວກໃຫ້ແກ່ການຄ້າ, ການລົງທຶນ ແລະ ການໄປມາຫາສູ່ ລະຫວ່າງປະຊາຊົນ ໃຫ້ນັບມື້ນັບເພີ່ມຂຶ້ນ. ພ້ອມນີ້, ອາຊຽນ ໄດ້ຊຸກຍູ້ໃຫ້ ອິນເດຍ ສືບຕໍ່ສະໜັບສະໜູນການຈັດຕັ້ງປະຕິບັດແຜນແມ່ບົດການເຊື່ອມຈອດອາຊຽນ 2025 ແລະ ການເລັ່ງລັດໂຄງການກໍ່ສ້າງທາງດ່ວນ 3 ຝ່າຍ: ອິນເດຍ-ມຽນມາ-ໄທ ແລະ ເຊື່ອມຕໍ່ໄປຍັງ ລາວ-ກໍາປູເຈຍ-ຫວຽດນາມ ໃຫ້ສໍາເລັດໂດຍໄວ.
ກອງປະຊຸມສຸດຍອດອາຊີຕາເວັນອອກ (EAS) ຄັ້ງທີ 18 ໄດ້ທົບທວນຄືນການຈັດຕັ້ງປະຕິບັດບັນດາກິດຈະກໍາ ພາຍໃຕ້ຂະແໜງການບູລິມະສິດຂອງ ອີເອເອັສ ແລະ ໃຫ້ຄວາມໝາຍໝັ້ນໃນການເພີ່ມທະວີການຮ່ວມມືກັນຢ່າງໃກ້ຊິດ ແນໃສ່ສ້າງເງື່ອນໄຂອັນເອື້ອອໍານວຍໃຫ້ແກ່ການຟື້ນຟູເສດຖະກິດ-ສັງຄົມຮອບດ້ານ ເພື່ອກ້າວໄປສູ່ການພັດທະນາເສດຖະກິດທີ່ມີການຂະຫຍາຍຕົວ ແລະ ຍືນຍົງ ໂດຍສຸມໃສ່ການຮັດແໜ້ນການເຊື່ອມໂຍງທາງດ້ານເສດຖະກິດ, ການເຊື່ອມຈອດຕ່ອງໂສ້ການສະໜອງ, ການຫັນເປັນເສດຖະກິດດີຈີຕອນ ແລະ ອື່ນໆ. ກອງປະຊຸມ ໄດ້ຊຸກຍູ້ໃຫ້ບັນດາປະເທດ ອີເອເອັສ ສືບຕໍ່ຈັດຕັ້ງປະຕິບັດແຜນປະຕິບັດງານອີເອເອັສ ສະບັບໃໝ່ ສໍາລັບໄລຍະປີ 2024 -2028 ໃຫ້ເປັນຮູບປະທໍາ. ພ້ອມນີ້, ກອງປະຊຸມ ໄດ້ເນັ້ນຢໍ້າຄວາມສໍາຄັນຂອງກອງປະຊຸມສຸດຍອດອາຊີຕາເວັນອອກ ໃນຖານະທີ່ເປັນເວທີໜຶ່ງດຽວໃນພາກພື້ນທີ່ເຕົ້າໂຮມຜູ້ນໍາຈາກຫຼາຍພາກພື້ນມາປຶກສາຫາລື ແລະ ຮ່ວມມືກັນໃນບັນດາຂົງເຂດທີ່ທຸກຝ່າຍມີຄວາມສົນໃຈຮ່ວມກັນ. ພິເສດ, ກອງປະຊຸມ ໄດ້ຮັບຮອງເອົາຖະແຫຼງການຂອງຜູ້ນໍາກອງປະຊຸມສຸດຍອດອາຊີຕາເວັນອອກ ວ່າດ້ວຍການຮັກສາ ແລະ ການສົ່ງເສີມພາກພື້ນເປັນສູນກາງແຫ່ງການຈະເລີນເຕີບໂຕ.
ກອງປະຊຸມສຸດຍອດອາຊຽນ-ອົດສະຕຣາລີ ຄັ້ງທີ 3 ໄດ້ສະແດງຄວາມຍິນດີຕໍ່ຄວາມຄືບໜ້າຂອງການຈັດຕັ້ງປະຕິບັດການເປັນຄູ່ຮ່ວມຍຸດທະສາດຮອບດ້ານອາຊຽນ-ອົດສະຕຣາລີ. ພ້ອມນີ້, ກອງປະຊຸມ ໄດ້ຍິນດີທີ່ຈະມີການລົງນາມອານຸສັນຍາ ສະບັບທີ 2 ເພື່ອຍົກລະດັບສັນຍາເຂດການຄ້າເສລີອາຊຽນ-ອົດສະຕຣາລີ-ນິວຊີແລນ (AANZFTA) ພາຍໃນປີ 2023 ແລະ ໄດ້ຮັບຮອງເອົາຖະແຫຼງການຮ່ວມຂອງຜູ້ນໍາອາຊຽນ-ອົດສະຕຣາລີ ວ່າດ້ວຍການຮ່ວມມືດ້ານຄວາມໝັ້ນຄົງດ້ານສະບຽງອາຫານ ແລະ ໂພສະນາການ ໃນຍາມມີວິກິດການ ແລະ ເອກະສານແນວຄວາມຄິດ ກ່ຽວກັບກອງປະຊຸມສຸດຍອດສະໄໝພິເສດ ເພື່ອສະເຫຼີມສະຫຼອງການພົວພັນຮ່ວມມືອາຊຽນ-ອົດສະຕຣາລີ ຄົບຮອບ 50 ປີ ເພື່ອເປັນທິດທາງໃນການກະກຽມໃຫ້ແກ່ການຈັດກອງປະຊຸມສຸດຍອດສະໄໝພິເສດດັ່ງກ່າວ ທີ່ຈະຈັດຂຶ້ນໃນວັນທີ 04-06 ມີນາ 2024 ທີ່ ເມວເບີນ, ອົດສະຕຣາລີ, ຊຶ່ງ ນາຍົກລັດຖະມົນຕີ ແຫ່ງ ສປປ ລາວ ໃນນາມປະເທດປະສານງານການພົວພັນອາຊຽນ-ອົດສະຕຣາລີ ຈະເປັນປະທານຮ່ວມກັບ ນາຍົກລັດຖະມົນຕີ ອົດສະຕຣາລີ.
ກອງປະຊຸມສຸດຍອດອາຊຽນ-ສະຫະປະຊາຊາດ (ສປຊ) ຄັ້ງທີ 13 ໄດ້ທົບທວນຄືນການຈັດຕັ້ງປະຕິບັດການຮ່ວມມືອາຊຽນ-ສປຊ ໃນໄລຍະ 1 ປີຜ່ານມາ ໂດຍສະເພາະແມ່ນຄວາມຄືບໜ້າຂອງການຈັດຕັ້ງປະຕິບັດບັນດາກິດຈະກໍາ ພາຍໃຕ້ແຜນປະຕິບັດງານອາຊຽນ-ສປຊ (2021-2025) ແລະ ການຈັດຕັ້ງປະຕິບັດບັນດາແຜນງານ/ໂຄງການ ພາຍໃຕ້ຂອບການຮ່ວມມື ວ່າດ້ວຍການເສີມສ້າງເຊິ່ງກັນ ແລະ ກັນ ລະຫວ່າງວິໄສທັດປະຊາຄົມອາຊຽນ 2025 ແລະ ບັນດາເປົ້າໝາຍເພື່ອການພັດທະນາແບບຍືນຍົງຂອງອົງການ ສປຊ 2030, ຊຶ່ງທັງໝົດນີ້ ໄດ້ປະກອບສ່ວນສໍາຄັນເຂົ້າໃນການສົ່ງເສີມສັນຕິພາບ, ຄວາມໝັ້ນຄົງ ແລະ ການພັດທະນາໃນພາກພື້ນ ກໍຄືໃນໂລກ. ພ້ອມນີ້, ກອງປະຊຸມ ຍັງໄດ້ເຫັນດີສືບຕໍ່ຊຸກຍູ້ການຮ່ວມມືທັງໃນລະດັບພາກພື້ນ ແລະ ສາກົນ ແນໃສ່ການຮັບມືກັບຜົນກະທົບຈາກການປ່ຽນແປງຂອງສະພາບດິນຟ້າອາກາດ ທີ່ນັບມື້ນັບຮຸນແຮງ ໂດຍສຸມໃສ່ການສ້າງຂີດຄວາມສາມາດ ແລະ ຄວາມເຂັ້ມແຂງໃນການຮັບມືກັບໄພພິບັດ ໂດຍຜ່ານບັນດາກົນໄກຂອງ ສປຊ ແລະ ອາຊຽນ.
ໃນມື້ດຽວກັນ, ທ່ານນາຍົກລັດຖະມົນຕີ ສອນໄຊ ສີພັນດອນ ຍັງໄດ້ພົບປະສອງຝ່າຍ ກັບ ນາຍົກລັດຖະມົນຕີ ຍີ່ປຸ່ນ ແລະ ປະທານາທິບໍດີ ສ.ເກົາຫຼີ. ໃນໂອກາດນີ້, ທ່ານ ນາຍົກລັດຖະມົນຕີ ແຫ່ງ ສປປ ລາວ ໄດ້ຮັບເອົາການເປັນປະທານອາຊຽນຂອງ ສປປ ລາວ ສໍາລັບປີ 2024 ຕໍ່ຈາກ ອິນໂດເນເຊຍ. ສປປ ລາວ ຈະເປັນປະທານອາຊຽນ ເລີ່ມແຕ່ວັນທີ 01 ມັງກອນ – 31 ທັນວາ 2024 ພາຍໃຕ້ຄໍາຂວັນ: “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ (ASEAN: Enhancing Connectivity and Resilience)”.
ຂ່າວ-ພາບ: ກົມການຂ່າວ ກະຊວງການຕ່າງປະເທດ
