ກອງປະຊຸມຄະນະກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລາວ – ໄທ ຄັ້ງທີ 13 ລະ ຫວ່າງ ແຂວງຄຳມວນ ສປປລາວ ແລະ ຈັງຫວັດນະຄອນພະນົມ ຣາຊະອານາຈັກໄທ ໄດ້ຈັດຂຶ້ນຢ່າງເປັນທາງການໃນວັນທີ 7 ກັນຍາ 2023 ທີ່ສາລາກາງຈັງຫວັດນະຄອນພະນົມ ຣາຊະອານາຈັກໄທ. ຄະນະຜູ້ແຜນ ຝ່າຍແຂວງຄໍາມ່ວນນໍາໂດຍ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ປະທານຄະນະກຳມະການຮ່ວມມື ຮັກສາຄວາມສະຫງົບຮຽບຮ້ອຍຕາມຊາຍແດນຂອງແຂວງ, ຝ່າຍຈັງຫວັດນະຄອນພະນົມນໍາໂດຍ ທ່ານ ວັນໄຊ ຈັນພອນ ຜູ້ວ່າຣາຊະການຈັງຫວັດນະຄອນພະນົມ ປະທານຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນຈັງຫວັດນະຄອນພະນົມ, ມີຕາງໜ້າກົງສູນລາວ ປະຈໍາຂອນແກ່ນ ແລະ ກົງສູນໃຫຍ່ຣາຊະອານາ ຈັກໄທ ປະຈໍາສະຫວັນນະເຂດ, ພ້ອມດ້ວຍຄະນະຜູ້ແທນ ທັງສອງຝ່າຍເຂົ້າຮ່ວມ.
ກອງປະຊຸມອັນມີຄວາມໝາຍສໍາຄັນທັງສອງຝ່າຍໄດ້ທົບທວນຄືນກ່ຽວກັບການຈັດຕັ້ງປະຕິບັດເນື້ອໃນບົດບັນທຶກກອງປະຊຸມຄະນະກຳມະການຮັກສາຄວາມສະຫງົບຮຽບຮ້ອຍຕາມຊາຍແດນ ຄຳມ່ວນ – ນະຄອນພະ ນົມ ຄັ້ງທີ XII ທີ່ໄດ້ພ້ອມກັນລົງນາມ ໃນຄັ້ງວັນທີ 22 ເມສາ 2022 ທີ່ແຂວງ ຄໍາມ່ວນ, ສປປ ລາວ. ຜ່ານການຈັດຕັ້ງປະຕິບັດໄດ້ເຮັດໃຫ້ມີຫຼາຍດ້ານເກີດເປັນຮູບປະທຳດີຂຶ້ນ ເຊິ່ງສະແດງອອກ ທັງສອງຝ່າຍໄດ້ມີການຈັດສົ່ງຄະນະຜູ້ແທນລະດັບຕ່າງໆ ໄປມາ-ຢ້ຽມຢາມ ແລະ ເຮັດວຽກຮ່ວມກັນຢ່າງເປັນປົກກະຕິ : ຄະນະກຳມະການຮັກສາຄວາມສະຫງົບຮຽບຮ້ອຍຕາມຊາຍແດນລະດັບເມືອງ-ອຳເພີ ເປັນຕົ້ນ ເມືອງໜອງບົກ ກັບ ອຳເພີທາດພະນົມ ແລະ ເມືອງຫີນບູນ ກັບ ອໍາເພີທ່າອຸເທນ. ນອກນັ້ນຍັງໄດ້ສ້າງເງື່ອນໄຂອຳນວຍຄວາມສະດວກໃຫ້ຄະນະຜູ້ແທນລະດັບສູງໄປມາຢ້ຽມຢາມແລກປ່ຽນຂໍ້ມູນຂ່າວສານດ້ານເສດຖະ ກິດ, ວັດທະນະທຳ-ສິລະປະ ແລະ ກິລາ ນໍາກັນເປັນປົກກະຕິ ໂດຍສະເພາະໃນວັນສໍາຄັນ ແລະ ວັນບຸນປະເພນີທີ່ຝ່າຍໃດຝ່າຍໜຶ່ງຈັດຂຶ້ນ, ການຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນທັງສອງຝ່າຍໄດ້ຖືສໍາຄັນ ແລະ ປະຕິບັດຢ່າງຖືກຕ້ອງຕາມບົດບັນທຶກກອງປະຊຸມຂອງຄະນະການນໍາແຂວງ ແລະ ບົດບັນທຶກກອງປະຊຸມຄະນະກຳມະການ ຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລາວ – ໄທ ລະດັບທ້ອງຖິ່ນ, ທັງສະແດງຄວາມຍິນດີ ທີ່ການພົວພັນ – ຮ່ວມມື ໄດ້ມີຄວາມຄືບໜ້າ ແລະ ມີບັນຍາກາດ ເຮັດໃຫ້ຊາຍແດນ ລະຫວ່າງ ແຂວງ ມີຄວາມສະຫງົບ ແລະ ເປັນລະບຽບຮຽບຮ້ອຍ. ຄຽງຄູ່ກັນນັ້ນຍັງຍົກໃຫ້ເຫັນບາງບັນຫາທີ່ຄົງຄ້າງເຊັ່ນ : ກົນໄກການຮ່ວມມືຄຸ້ມຄອງຕິດຕາມການແກ້ໄຂບັນຫາຕ່າງໆ ທີ່ເກີດຂຶ້ນຢູ່ບໍລິເວນພື້ນທີ່ຊາຍແດນແມ່ນໍ້າຂອງຮ່ວມກັນບາງກໍລະນີຍັງບໍ່ທັນລາບລື່ນດີ, ຍັງພົບເຫັນບັນຫາ ການເຂົ້າ-ອອກເມືອງ ເພື່ອໄປມາຫາສູ່ກັນ ໂດຍບໍ່ຖືກຕ້ອງຕາມລະບຽບກົດໝາຍ, ກໍລະນີລັກລອບແຕ່ງດອງທີ່ບໍ່ຖືກຕ້ອງ ແລະ ພົນລະເມືອງທັງສອງຝ່າຍຈຳນວນໜຶ່ງລັກລອບພົວພັນຊື້ ຂາຍສິນຄ້າໃນສິ່ງຫວງຫ້າມ ແລະ ບໍ່ຖືກຕ້ອງຕາມລະບຽບກົດໝາຍ, ລວມທັງຜູ້ປະກອບການທຸລະກິດດູດແຮ່-ຊາຍ ທີ່ກະທໍາຜິດລ່ວງລະເມີດເສັ້ນຊາຍແດນ. ຈາກນັ້ນ, ກອງປະຊຸມຍັງໄດ້ຜ່ານຮ່າງບົດບັນທຶກການຮ່ວມມືຂອງສອງຝ່າຍໃນຕໍ່ໜ້າ ແລະ ເຫັນດີຮ່ວມກັນຄື: 1. ດ້ານການຮ່ວມມືການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, 2. ດ້ານການຮ່ວມມືໃນການຮັກສາເສັ້ນຊາຍແດນ ລາວ – ໄທ ( ຄໍາມ່ວນ – ນະຄອນພະນົມ ), 3. ດ້ານການຮ່ວມມືໃນການອຳນວຍຄວາມສະ ດວກ ແລະ ຄວາມປອດໄພໃນການເຂົ້າ-ອອກເມືອງຕາມຈຸດຜ່ານດ່ານຊາຍແດນ, 4. ການຮ່ວມມືປ້ອງກັນ ແລະ ປາບປາມຢາເສບຕິດຕາມຢູ່ບໍລິເວນຊາຍແດນ, 5. ການຮ່ວມມືໃນການຮັກສາ ແລະ ປ້ອງກັນຕະຝັ່ງເຈື່ອນ ແລະ ການແກ້ໄຂບັນຫາການດູດແຮ່ – ຊາຍຕາມແມ່ນໍ້າຂອງ, 6. ການຮ່ວມມືໃນກໍລະນີບຸກຄົນຂອງແຕ່ລະຝ່າຍຖືກກັກຕົວຄຸມຂັງ, 7. ການຮ່ວມມືດ້ານແຮງງານ, 8. ການຮ່ວມມືທາງດ້ານເສດຖະກິດ ລະຫວ່າງ ແຂວງຄຳມ່ວນ ແລະ ຈັງຫວັດນະຄອນພະນົມ ແລະ ກົນໄກການປະສານງານສອງຝ່າຍ. ການກຳນົດເວລາ ແລະ ສະຖານທີ່ຈັດກອງປະຊຸມໃນຄັ້ງຕໍ່ໄປໂດຍແມ່ນແຂວງຄໍາມ່ວນຮັບເປັນເຈົ້າພາບ. ໃຫ້ກຽດລົງນາມເຊັນບົດບັນທຶກຝ່າຍແຂວງຄໍາມ່ວນໂດຍ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ຝ່າຍຈັງຫວັດນະຄອນພະນົມໂດຍ ທ່ານ ວັນໄຊ ຈັນພອນ ຜູ້ວ່າຣາຊະການຈັງຫວັດນະຄອນພະນົມ, ໂດຍການຮ່ວມເປັນສັກຂີພະຍານຂອງຄະນະຜູ້ແທນທັງສອງຝ່າຍ.
