ສຳເລັດກອງປະຊຸມສື່ມວນຊົນທົ່ວປະເທດ ເພື່ອປຶກສາຫາລືການສົ່ງເສີມວຽກງານໂພຊະນາການແມ່-ເດັກ ແລະ ການລ້ຽງດູເດັກອ່ອນ ແລະ ເດັກນ້ອຍ ໃນວັນທີ 6 ກັນຍາ ນີ້ ທີ່ເມືອງວັງວຽງ ແຂວງວຽງຈັນ. ໂດຍການເປັນປະທານຂອງ ທ່ານ ວັນນະສິນ ສີມມະວົງ ຮອງຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ), ມີຊ່ຽວຊານຈາກອົງການອຸຍນີເຊັບ ປະຈຳລາວ, ຊ່ຽວຊານດ້ານສາທາລະນະສຸກ ແລະ ສື່ມວນຊົນຈາກ 18 ແຂວງໃນຂອບເຂດທົ່ວປະເທດເຂົ້າຮ່ວມ.
ກອງປະຊຸມຄັ້ງນີ້ຈັດຂຶ້ນເພື່ອປຶກສາຫາລືການສົ່ງເສີມວຽກງານໂພຊະນາການແມ່-ເດັກ ແລະ ການລ້ຽງດູເດັກອ່ອນ ແລະ ເດັກນ້ອຍໃນຂອບເຂດທົ່ວປະເທດ ຊຶ່ງບັນດາຜູ້ເຂົ້າຮ່ວມໄດ້ຮັບຟັງການນໍາສະເໜີກ່ຽວກັບ ສະພາບລວມວຽກງານໂພຊະນາການຢູ່ລາວ ຊຶ່ງເປັນຂໍ້ມູນລ້າສຸດ, ບັນຫາ ແລະ ຍຸດທະສາດແຫ່ງຊາດດ້ານໂພຊະນາການປະຈຳປີ 2023, ນອກຈາກນັ້ນບັນດາສື່ມວນຊົນໄດ້ລົງສຳພາດຕົວຈິງຢູ່ໂຮງໝໍເມືອງ ແລະ ຊຸມຊົນບ້ານມາຜັນຂະຫຍາຍຂຽນເປັນບົດ-ເປັນຂ່າວ ເພື່ອມາວິເຄາະ-ວິໄຈຖອດຖອນບົດຮຽນຮ່ວມກັນ ເພື່ອນໍາເອົາບົດຮຽນດັ່ງກ່າວລົງໄປຈັດຕັ້ງປະຕິບັດຢູ່ບັນດາແຂວງຂອງຕົນ ໃນການໂຄສະນາດ້ານວຽກໂພຊະນາການຂອງແມ່-ເດັກ ແລະ ການລ້ຽງດູເດັກອ່ອນ ແລະ ເດັກນ້ອຍ.
ທ່ານ ວັນນະສິນ ສີມມະວົງ ໄດ້ຍົກໃຫ້ເຫັນບົດບາດຂອງສື່ມວນຊົນໃນການເຜີຍແຜ່ຂໍ້ມູນກ່ຽວກັບບັນຫາການຂາດສານອາຫານ ແລະ ຄວາມສໍາຄັນຂອງໂພຊະນາການທີ່ດີ, ການບໍລິການດ້ານໂພຊະນາການທີ່ມີຄຸນນະພາບ ແລະ ການສົ່ງເສີມພຶດຕິກໍາດ້ານການກິນທີ່ດີ ເພື່ອກ້າວໄປເຖິງການແກ້ໄຂບັນຫາດັ່ງກ່າວໃນ ສປປ ລາວ. ການກະຈາຍຂໍ້ມູນຂ່າວສານແບບຕໍ່ເນື່ອງຈະຊ່ວຍໃຫ້ຊຸມຊົນມີຄວາມຮັບຮູ້-ເຂົ້າໃຈຢ່າງເລິກເຊິ່ງ, ມີການປ່ຽນແປງທັດສະນະຄະຕິ ແລະ ພຶດຕິກໍາຂອງຕົນໃນການກິນຢູ່ ແລະ ການຮັກສາສຸຂະພາບ, ສື່ມວນຊົນສາ ມາດໃຫ້ທັງຄວາມຮູ້ແກ່ຊຸມຊົນ, ເສີມສ້າງຄວາມເຂົ້າໃຈ ແລະ ຊຸກຍູ້ການປະຕິບັດຕົວຈິງໃນຊຸມຊົນດ້ານການວາງແຜນວຽກງານໂພຊະນາການ ສື່ມວນຊົນຈົ່ງສືບຕໍ່ເປັນພັນທະມິດທີ່ສຳຄັນໃນການເຜີຍແຜ່ຍຸດທະສາດ ເພື່ອເພີ່ມທະວີຄວາມພະຍາຍາມໃນການສ້າງການປ່ຽນແປງທີ່ມີຄວາມໝາຍໃນຊີວິດ ແລະ ໂພຊະນາການຂອງເດັກ ນ້ອຍໃນທົ່ວ ສປປ ລາວ ພ້ອມທັງເນັ້ນໃຫ້ບັນດາສື່ຈົ່ງພ້ອມກັນສືບຕໍ່ໂຄສະນາວຽກງານດັ່ງກ່າວໃຫ້ກວ້າງຂວາງ ແລະ ມີປະສິດທິຜົນ.
