ໃນລະຫວ່າງວັນທີ 5-7 ກັນຍາ ນີ້, ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສະພາແຫ່ງຊາດ (ສພຊ) ແຫ່ງ ສປປ ລາວ ພ້ອມດ້ວຍຄະນະຜູ້ແທນຂັ້ນສູງ ສພຊ ສືບຕໍ່ໄປຢ້ຽມຢາມ ແລະ ເຮັດວຽກ ຢູ່ເຂດປົກຄອງຕົນເອງ ມົງໂກໃນ ສປ ຈີນ ພາຍຫຼັງທີ່ຢ້ຽມຢາມ ແລະ ເຮັດວຽກຢ່າງເປັນທາງການ ຢູ່ນະຄອນຫຼວງປັກກິ່ງ ໃນວັນທີ 3-4 ກັນຍາ 2023 ຜ່ານມາ. ຄະນະຜູ້ແທນຂັ້ນສູງ ໄດ້ເດີນທາງເຖິງສະໜາມບິນ ຂອງເຂດປົກຄອງຕົນເອງມົງໂກໃນ ກໍໄດ້ຖືກຕ້ອນຮັບຢ່າງອົບອຸ່ນ ແລະ ເປັນກັນເອງແບບສະໜິດສະໜົມຖານອ້າຍນ້ອງ ຈາກການນໍາຂັ້ນສູງພັກ, ອົງການປົກຄອງລັດ ແລະ ສະພາປະຊາຊົນເຂດປົກຄອງຕົນເອງມົງໂກໃນ ຫຼັງຈາກນັ້ນ, ຄະນະຜູ້ແທນຂັ້ນສູງ ສພຊ ໄດ້ພົບປະເຮັດວຽກ ກັບ ສະຫາຍ ນາງ ອ້າຍ ລີ ຫົວ ຮອງປະທານສະພາປະຊາຊົນເຂດປົກຄອງຕົນເອງມົງໂກໃນ ແລະ ຄະນະ ຢ່າງເປັນທາງການ ທີ່ໂຮງແຮມຊິງເສິງລຽງຫົວ.
ໃນໂອກາດພົບປະເຮັດວຽກນຳກັນນີ້, ສະຫາຍ ໄຊສົມພອນ ພົມວິຫານ ໄດ້ສະແດງຄວາມພາກ ພູມໃຈເປັນຢ່າງຍິ່ງ ທີ່ໄດ້ມີໂອກາດຢ້ຽມຢາມເຂດດັ່ງກ່າວໃນຄັ້ງນີ້ ຊຶ່ງໄດ້ທັດສະນະສຶກສາ, ແລກປ່ຽນ ແລະ ຖອດຖອນບົດຮຽນ ກ່ຽວກັບການພັດທະນາເສດຖະກິດ ແບບທັນສະໄໝ ດ້ວຍການນຳໃຊ້ທ່າແຮງພື້ນ ຖານ, ການຜະລິດກະສິກໍາ ແລະ ລ້ຽງສັດ ເພື່ອສະໜອງໃຫ້ແກ່ພາຍໃນ ແລະ ການສົ່ງອອກໄປຕ່າງ ປະເທດ, ການພັດທະນາຊົນນະບົດ ທີ່ຕິດພັນກັບການແກ້ໄຂຄວາມທຸກຍາກ ແລະ ອື່ນໆ ໂດຍການຈັດຕັ້ງຜັນຂະຫຍາຍ ບັນດາແນວທາງນະໂຍບາຍ, ຍຸດທະສາດຕ່າງໆທີ່ກຳນົດໄວ້ ໃນມະຕິກອງປະຊຸມໃຫຍ່ ຄັ້ງທີ XX ຂອງພັກກອມມູນິດຈີນ, ການຊີ້ນຳ-ນຳພາ ຂອງສະຫາຍເລຂາທິການໃຫຍ່ພັກກອມມູນິດຈີນ ສີ ຈິ້ນ ຜິງ ກ່ຽວກັບການພັດທະນາເຂດທ້ອງຖິ່ນ. ພ້ອມນີ້, ສະຫາຍປະທານ ສພຊ ໄດ້ແຈ້ງຜົນການພົບປະສອງຝ່າຍກັບ ປະທານສະພາຜູ້ແທນປະຊາຊົນທົ່ວປະເທດຈີນ ແລະ ຜົນການລົງນາມໃນຂໍ້ຕົກລົງການຮ່ວມມື ລະຫວ່າງ ສອງອົງການນິຕິຍັດ.
ຈາກນັ້ນ, ສະຫາຍ ນາງ ອ້າຍ ລີ ຫົວ ໄດ້ແຈ້ງໃຫ້ຊາບເຖິງທີ່ຕັ້ງ, ປະຊາກອນ, ເນື້ອທີ່, ສະ ພາບການພັດທະນາເສດຖະກິດ-ສັງຄົມ ແລະ ທ່າແຮງຂອງເຂດດັ່ງກ່າວ. ເຂດປົກຄອງຕົນເອງມົງໂກໃນ ໄດ້ສ້າງຕັ້ງໃນປີ 1947 ຊຶ່ງເປັນເຂດປົກຄອງຕົນເອງເຂດທໍາອິດ ຂອງ ສປ ຈີນ, ມີເນື້ອທີ່ 1,18 ລ້ານກິໂລຕາເມັດ, ມີພົນລະເມືອງ 24 ລ້ານຄົນ, ມີຊາຍແດນຕິດຈອດກັບ ປະເທດມົງໂກລີ ແລະ ຣັດເຊຍ. ມີດ່ານສາກົນທັງໝົດ 24 ດ່ານ. ນັບຕັ້ງແຕ່ກອງປະຊຸມໃຫຍ່ ຄັ້ງທີ XVIII ຂອງພັກກອມມູນິດຈີນ, ເຂດມົງໂກໃນ ໄດ້ສຸມໃສ່ຈັດຕັ້ງຜັນຂະຫຍາຍແນວຄິດ ຂອງປະທານ ສີຈິ້ນຜິງ ວ່າດ້ວຍການສ້າງສັງຄົມນິຍົມ ທີ່ມີສີສັນຂອງປະເທດຈີນ ພ້ອມນີ້ກໍໄດ້ຕັ້ງໜ້າປະຕິບັດບັນດາເນື້ອໃນຕ່າງໆ ຕາມມະຕິກອງປະຊຸມໃຫຍ່ ຄັ້ງທີ XX ໂດຍສະເພາະປະຕິບັດໜ້າວຽກ 5 ປະການສໍາຄັນ ທີ່ໄດ້ຮັບມອບໝາຍ ຈາກປະທານ ສີຈິ້ນຜິງ ເພື່ອສ້າງເຂດປົກຄອງຕົນເອງ ເປັນຕົວແບບ ຄື: ສ້າງເຂດປົກຄອງເປັນຮົ້ວກັ້ນຄວາມໝັ້ນຄົງແຫ່ງຊາດ, ສ້າງເປັນສູນຜະລິດພະລັງງານທີ່ສໍາຄັນຂອງປະເທດ, ສ້າງເປັນສູນປ້ອງກັນ-ປົກປັກຮັກສາສິ່ງແວດລ້ອມ ແລະ ລະບົບນິເວດວິທະຍາ, ສ້າງເປັນສູນສະໜອງຊັບພະຍາກອນອັນເປັນຍຸດທະສາດ, ສ້າງເປັນສູນພັດທະນາກະສິກໍາ ແລະ ສ້າງເປັນປະຕູເປີດສູ່ໂລກພາຍນອກ. ພ້ອມນີ້, ກໍປະຕິບັດ 2 ກໍານົດ ແລະ 2 ປົກປ້ອງ ຢ່າງໜັກແໜ້ນ ເພື່ອຫັນເປັນທັນສະໄໝແບບຈີນ. ປີ 2022, ການຂຸດຄົ້ນຖ່ານຫີນ 1,2 ຕື້ ໂຕນ ຢູ່ອັນດັບ 2 ຂອງປະເທດ, ຜະລິດໄຟຟ້າ 640 ຕື້ກິໂລວັດໂມງ ເປັນອັນດັບ 1 ຂອງປະເທດ, ການຜະລິດສະບຽງອາຫານ ປີ 2023 ຜ່ານມາໄດ້ 39 ຕື້ກິໂລ ເປັນອັນດັບ 6 ຂອງປະເທດ, ຜະລິດຕະພັນປະເພດນົມ ແລະ ຊີ້ນ ແມ່ນຢູ່ອັນດັບໜຶ່ງ ຂອງປະເທດ. ຂະແໜງການອຸດສາຫະກໍາ ກໍມີວິສາຫະກິດ ທີ່ມີເຕັກນິກວິທະຍາສາດລະດັບສູງ 1.500 ກວ່າແຫ່ງ, ມີການຊຸກຍູ້ສົ່ງເສີມການພັດທະນາແບບສີຂຽວ, ມີໂຄງການຟື້ນຟູ ແລະ ປົກປັກຮັກສາລະບົບນິເວດ, ໃນທ້າຍປີ 2022 ມີໂຮງງານສີຂຽວ 161 ແຫ່ງ, ມີນິຄົມອຸດສາຫະກໍາສີຂຽວ 19 ແຫ່ງ, ມີຜະລິດຕະພັນສີຂຽວຈຳນວນໜຶ່ງ. ພື້ນຖານໂຄງລ່າງການຄົມມະນາຄົມທີ່ຮັບປະກັນ ທັງເສັ້ນທາງຫຼວງ, ເສັ້ນທາງລົດໄຟ ແລະ ມີສະໜາມບິນ 48 ແຫ່ງ. ພ້ອມນີ້, ເຂດປົກຄອງຕົນເອງ ໄດ້ມີການຊຸກຍູ້ສົ່ງເສີມການແກ້ໄຂຄວາມທຸກຍາກ. ໃນນັ້ນ, ມີປະຊາກອນທຸກຍາກ 8 ແສນກວ່າຄົນ ຊຶ່ງໄດ້ຫຼຸດພົ້ນຄວາມທຸກຍາກແລ້ວ. ອັດຕາເຂົ້າຮຽນການສຶກສາພາກບັງຄັບ ໄດ້ຮັບການຍົກສູງ, ຈໍານວນສະເລ່ຍຕຽງນອນ ແລະ ແພດໝໍ ຕໍ່ໜຶ່ງພັນຄົນ ແມ່ນກາຍລະດັບສະເລ່ຍ ໃນທົ່ວປະເທດ. ດ້ານວັດທະນະທໍາ, ກິລາ ແລະ ສາທາລະນະສຸກ ແລະ ລະບົບສະຫວັດດີການສັງຄົມ ຂະຫຍາຍຕົວເປັນກ້າວໆ ທີ່ກວມລວມທັງຕົວເມືອງ ແລະ ຊົນນະບົດໂດຍພື້ນຖານ ແລະ ບັນລຸເປົ້າໝາຍທຸກໆຄອບຄົວ ບໍ່ມີຄົນວ່າງງານ, ມີການຊຸກຍູ້ສົ່ງເສີມຄວາມສາມັກຄີບັນດາເຜົ່າ ຕາມທັດສະນະອັນໃໝ່ 2 ຖານທີ່ໝັ້ນ 2 ຮົ້ວກັ້ນ ແລະ ໜ້າວຽກສໍາຄັນ 5 ຫຼັກການ.
ສະຫາຍ ນາງ ອ້າຍ ລີ ຫົວ ສະເໜີ: ໃນຕໍ່ໜ້າ ເຂດປົກຄອງຕົນເອງມົງໂກໃນ ແລະ ສປປ ລາວ ຄວນເພີ່ມທະວີການໄປມາຫາສູ່ກັນ ບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ. ໃນນັ້ນ, ສະເໜີສ້າງກົນໄກປະສານງານຮ່ວມມືແລກປ່ຽນ ລະຫວ່າງສອງຝ່າຍ, ສະພາຜູ້ແທນປະຊາຊົນເຂດປົກຄອງຕົນເອງ ມົງໂກໃນ ມີທ່າແຮງໃນການພົວພັນຮ່ວມມືກັບຕ່າງປະເທດ ແລະ ພົວພັນກັບບັນດາອົງການນິຕິບັນຍັດ ໃນຂັ້ນທ້ອງຖິ່ນ, ສະເໜີຈັດຝຶກອົບຮົມບັນດາຫົວຂໍ້ສະເພາະ ເພື່ອເພີ່ມທະວີຄວາມໄວ້ເນື້ອເຊື່ອໃຈທາງດ້ານການເມືອງ, ລົງເລິກຖອດຖອນບົດຮຽນນໍາກັນ ໂດຍສະເພາະ ການຕິດຕາມກວດກາ, ອໍານວຍໃຫ້ແກ່ການຮ່ວມມືທາງດ້ານເສດຖະກິດ-ການຄ້າ ສອງຝ່າຍ. ປັດຈຸບັນ, ສະຖານີລົດໄຟໂລຈິສຕິກສາກົນ ຊີຊູມູ ເຂດປົກຄອງຕົນເອງມົງໂກໃນ ທີ່ເຊື່ອມຈອດເສັ້ນທາງລົດໄຟລາວ-ຈີນ ໄດ້ເປີດບໍລິການລະຫວ່າງປະເທດ. ບໍລິສັດຂຸດຄົ້ນບໍ່ຄໍາຊື່ຟົງ ໄດ້ໄປລົງທຶນຢູ່ລາວ ໂດຍສ້າງຕັ້ງບໍລິສັດຂຸດຄົ້ນບໍ່ແຮ່ວຽງຈັນ ໃນທ້າຍປີ 2022 ໄດ້ລົງທຶນ 426 ລ້ານໂດລາ ແລະ ອື່ນໆ; ສະຫາຍຮອງປະທານສະພາປະຊາຊົນເຂດປົກຄອງຕົນເອງ ຍັງເຫັນວ່າ ສປປ ລາວ ເປັນປະເທດທີ່ມີຊັບພະຍາກອນອຸດົມສົມບູນ ພ້ອມດຽວກັນນີ້ ມົງໂກໃນ ກໍມີຊັບພະຍາກອນບໍ່ແຮຫຼາຍເຊັ່ນດຽວກັນ: ທອງ, ກົ່ວ, ສັງກະສີ, ຄໍາ ແລະ ແຮ່ຫາຍາກ ແລະ ຫວັງວ່າໃນອະນາຄົດຈະມີການຮ່ວມມືທີ່ດີ ໂດຍສາມາດດຶງດູດເອົານັກທຸລະກິດທັງສອງປະເທດ, ແລກ ປ່ຽນວັດທະນະທໍາ, ຊຸກຍູ້ຊ່ວຍເຫຼືອການທ່ອງທ່ຽວ ແລະ ອື່ນໆ ແລະ ຫວັງວ່າທ່ານປະທານສະພາແຫ່ງຊາດລາວ ແລະ ຄະນະ ຈະໄດ້ມາຢ້ຽມຢາມ ເຂດປົກຄອງຕົນເອງແຫ່ງນີ້ ຕື່ມອີກ.
ຕໍ່ກັບຂໍ້ສະເໜີຂອງ ສະຫາຍ ອ້າຍ ລີ ຫົວ ສະຫາຍປະທານສະພາແຫ່ງຊາດລາວ ໄດ້ເຫັນດີໃຫ້ການສະໜັບສະໜູນ ແລະ ຈະນຳເອົາໄປພິຈະລະນາ ນຳພາກສ່ວນກ່ຽວຂ້ອງ ຂອງ ສປປ ລາວ. ພ້ອມນີ້, ສະເໜີໃຫ້ເຂດປົກຄອງມົງໂກໃນ ສືບຕໍ່ຮ່ວມມືກັບ ສປປ ລາວ ແລະ ເຊື້ອເຊີນໄປຢ້ຽມຢາມ ສປປ ລາວ ຢ່າງເປັນທາງການ ໃນວັນເວລາທີ່ສະດວກ. ໃນນັ້ນ, ສປປ ລາວ ມີທ່າແຮງດ້ານການທ່ອງທ່ຽວ ແລະ ຊັບພະຍາກອນທໍາມະຊາດ ຈຶ່ງສະເໜີໃຫ້ຊຸກຍູ້ນັກທຸລະກິດ ຂອງເຂດປົກຄອງຕົນເອງມົງໂກໃນ ກໍຄື ສປ ຈີນ ໄປລົງທຶນ ຢູ່ ສປປ ລາວ ໃຫ້ຫຼາຍຂຶ້ນກວ່າເກົ່າ. ນອກນີ້, ສະຫາຍປະທານສະພາ ຍັງແຈ້ງສະພາບການເຄື່ອນໄຫວ ຂອງສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ຜົນຂອງກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝ XI ແລະ ອື່ນໆ.
ນອກຈາກນີ້, ຄະນະຜູ້ແທນຂັ້ນສູງສະພາແຫ່ງຊາດລາວ ຍັງໄດ້ໄປຢ້ຽມຢາມ ເຂດອຸດສາຫະກໍາ ທັນສະໄໝ ຈົງຮວານ ຊຶ່ງເປັນເຂດອັນດັບໜຶ່ງ ຂອງ ສປ ຈີນ ກໍຄືອັນດັບໜຶ່ງ ຂອງໂລກ ທີ່ເປັນລະບົບນະວັດຕະກຳໃໝ່ ໃນການຜະລິດ ທີ່ທັນສະໄໝໃນຍຸກສະໄໝ ແຫ່ງໂລກດີຈີຕອນ, ການຜະລິດສິລິໂຄນ, ເຄື່ອງເອເລັກໂຕຣນິກຂະໜາດນ້ອຍ (ຊິບ), ແຜ່ນໂລຫະໂຊລາເຊວ ແລະ ຊິ້ນສ່ວນປະກອບໂຊລາເຊວຄົບຊຸດ ເພື່ອສະໜອງເຂົ້າໃນລະບົບຕ່ອງໂສ້ການຜະລິດ. ຈາກນັ້ນ, ກໍໄດ້ຢ້ຽມຢາມກຸ່ມບໍລິສັດຜະລິດນົມອີລີ ຊຶ່ງເປັນບໍລິສັດທີ່ມີຜະລິດຕະພັນຈາກນ້ຳນົມ ແບບຄົບວົງຈອນ (ແບບເປັນຕ່ອງໂສ້ການຜະລິດ) ຊຶ່ງເລີ່ມຕົ້ນຈາກການລ້ຽງງົວໃຫ້ນ້ຳນົມ, ລະບົບການປຸງແຕ່ງ ແລະ ສົ່ງອອກ ຜະລິດຕະພັນນົມ ເພື່ອສະໜອງພາຍໃນ ແລະ ສົ່ງອອກຕ່າງປະເທດ; ໄດ້ໄປຢ້ຽມຢາມບ້ານໜາວເປົາ ຊຶ່ງເປັນບ້ານຕົວແບບໃນການແກ້ໄຂຄວາມທຸກຍາກແຫ່ງໜຶ່ງ ຂອງ ສປ ຈີນ ແລະ ຢ້ຽມຊົມຫໍພິພິດຕະພັນເຂດປົກຄອງຕົນເອງມົງໂກໃນ ອີກດ້ວຍ.
(ຂ່າວ-ພາບ: ສພຊ)
