ກອງປະຊຸມ ພົບປະ ເພື່ອຕີລາຄາສະພາບການຈັດຕັ້ງປະຕິບັດ ບົດບັນທຶກການຮ່ວມມື ລະຫວ່າງ ນະຄອນຫຼວງວຽງຈັນ ແລະ ແຂວງຈໍາປາສັກ ທີ່ໄດ້ລົງນາມ ໃນປີ 2022 ຜ່ານມາ, ໄດ້ຈັດຂຶ້ນ ວັນທີ 6 ກັນຍາ ນີ້ ທີ່ແຂວງຈຳປາສັກ ຊຶ່ງອົງການປົກຄອງນະຄອນຫຼວງວຽງຈັນ ນຳໂດຍ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ແລະ ແຂວງຈຳປາສັກ ແມ່ນ ນຳໂດຍ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ມີຄະນະຜູ້ແທນຂອງສອງທ້ອງຖິ່ນເຂົ້າຮ່ວມ. ໃນການພົບປະນີ້, ທ່ານ ວິໄລວົງ ບຸດດາຄໍາ ໄດ້ກ່າວສະແດງການຕ້ອນຮັບ, ພ້ອມນັ້ນ ຫົວໜ້າຄະນະຜູ້ແທນ ນະຄອນຫຼວງວຽງຈັນ ແລະ ແຂວງຈໍາປາສັກ ໄດ້ຜັດປ່ຽນກັນ ລາຍງານສະພາບການອັນພົ້ນເດັ່ນ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການຈັດຕັ້ງປະຕິບັດວາລະແຫ່ງຊາດ ທີ່ຍົກໃຫ້ເຫັນຜົນງານດ້ານດີ, ເງື່ອນໄຂຂໍ້ສະດວກ ແລະ ຂໍ້ຈຳກັດ ດ້ານຕ່າງໆ, ພ້ອມທັງ ຕີລາຄາສະພາບການຈັດຕັ້ງປະຕິບັດການຮ່ວມມື ຜ່ານມາ ລະຫວ່າງ ແຂວງຈໍາປາສັກ ແລະ ນະຄອນຫຼວງວຽງຈັນ ທີ່ໄດ້ເຊັນບົດບັນທຶກຮ່ວມມືກັນ ໃນ 4 ຂົງເຂດ ຄື: ຂົງເຂດອຸດສາຫະກໍາ ແລະ ການຄ້າ, ຂົງເຂດກະສິກໍາ ແລະ ປ່າໄມ້, ຂົງເຂດຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ຂົງເຂດໂຍທາທິການ ແລະ ຂົນສົ່ງ, ຜ່ານການຈັດຕັ້ງປະຕິບັດ ໃນໄລຍະ 1 ປີກວ່າຜ່ານມາ ເຫັນວ່າ: ຂົງເຂດອຸດສາຫະກໍາ ແລະ ການຄ້າ ໄດ້ປະຕິບັດວຽກງານລະອຽດຮ່ວມກັນ, ໂດຍມີການພົບປະແລກປ່ຽນບົດຮຽນໃນການສ້າງຕະຫຼາດຈໍາໜ່າຍສິນຄ້າ, ການຂົນສົ່ງ ແລະ ດັດສົມສິນຄ້າລະຫວ່າງ ແຂວງຈໍາປາສັກ ແລະ ນະຄອນຫຼວງວຽງຈັນ.
ໃນນີ້: ສິນຄ້າທີ່ ນະຄອນຫຼວງວຽງຈັນ ສົ່ງເຂົ້າຕະຫຼາດແຂວງຈໍາສັກ ມີທັງສິນຄ້າອຸດສາຫະກໍາ ແລະ ກະສິກໍາ; ການຮ່ວມມື ຂົງເຂດກະສິກໍາ ແລະ ປ່າໄມ້ ເປັນເອກະພາບກັນ ຊຸກຍູ້ ສົ່ງເສີມການຜະລິດກະສິກໍາ ເພື່ອເປັນສິນຄ້າ, ໂດຍສະເພາະແມ່ນສິນຄ້າທີ່ນະຄອນຫຼວງຕ້ອງການ ສໍາລັບນະຄອນຫຼວງວຽງຈັນ ໄດ້ສ້າງແຜນສົ່ງເສີມການຜະລິດ ເພື່ອສະໜອງໃຫ້ຕະຫຼາດ ແຂວງຈໍາປາສັກ, ໃນນັ້ນ ຕາມການຕົກລົງ ຂອງສອງຝ່າຍ ໄດ້ວາງຄາດໝາຍການຜະລິດໄຂ່ ເພື່ອສົ່ງມາຕະຫຼາດແຂວງຈໍາປາສັກ ແມ່ນ 144.000 ແຕະຕໍ່ປີ, ຜ່ານການຈັດຕັ້ງປະຕິບັດຕົວຈິງ ເຫັນວ່າ ສະໜອງໄດ້ 186.100 ແຕະຕໍ່ປີ ລື່ນແຜນທີ່ວາງໄວ້ 29%, ສໍາລັບການຮ່ວມມື ລະຫວ່າງ ຂົງເຂດຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ຂົງເຂດໂຍທາທິການ ແລະ ຂົນສົ່ງ ກໍໄດ້ຜັນຂະຫຍາຍແຕ່ກໍຍັງບໍ່ທັນໄດ້ມີການແລກປ່ຽນ ເພື່ອປຶກສາຫາລື ສ້າງແຜນການຈັດຕັ້ງປະຕິບັດວຽກຮ່ວມກັນ. ນອກນັ້ນ ເພື່ອບັນລຸບົດບັນທຶກການຮ່ວມມື ໃນປີ 2022, ທັງສອງທ້ອງຖິ່ນ ເຫັນດີເປັນເອກະພາບສືບຕໍ່ການຮ່ວມມື ໃນ 4 ຂົງເຂດ, ສໍາລັບ ການຮ່ວມມື ໃນຂົງເຂດໂຍທາທິການ ແລະ ຂົນສົ່ງ ໃຫ້ເພີ່ມການແລກປ່ຽນບົດຮຽນຊຶ່ງກັນ ແລະ ກັນ ໃນການວາງແຜນ-ຄຸ້ມຄອງຜັງເມືອງ, ການພັດທະນາໂຄງລ່າງພື້ນຖານ, ລວມທັງການຄຸ້ມຄອງລະບົບຂົນສົ່ງ ຢູ່ໃນຕົວເມືອງ. ເພື່ອເຮັດໃຫ້ການຈັດຕັ້ງປະຕິບັດ ບົດບັນທຶຶກການຮ່ວມມືດັ່ງກ່າວ ໃຫ້ປະກົດຜົນເປັນຈິງ, ຫົວໜ້າຄະນະຜູ້ແທນ ສອງຝ່າຍ ໄດ້ລົງນາມບົດບັນທຶກ ແລະ ເຫັນດີ ໃຫ້ມີການຮ່ວມມື ຕື່ມອີກ 2 ຂົງເຂດຄື: ຂົງເຂດການເງິນ ແລະ ຂົງເຂດເຂດເສດຖະກິດພິເສດ ເຫັນດີໃຫ້ມີການແລກປ່ຽນ ແລະ ສ້າງຄວາມເຂັ້ມແຂງ ວຽກງານການຈັດເກັບລາຍຮັບ ລະຫວ່າງກັນ ຈະແລກປ່ຽນຂໍ້ມູນ, ການກວດກາ ແລະ ຄົ້ນຄວ້າ ການເກັບລາຍຮັບ ຈາກຫົວໜ່ວຍທຸລະກິດ; ໃຫ້ມີການແລກປ່ຽນບົດຮຽນ ໃນການຄຸ້ມຄອງ ແລະ ພັດທະນາເຂດເສດຖະກິດພິເສດ ເປັນຕົ້ນການສົ່ງເສີມການລົງທຶນ, ກົນໄກການບໍລິການປະຕູດຽວ, ການຄຸ້ມຄອງສິ່ງແວດລ້ອມ ແລະ ການສະໜອງ-ຄຸ້ມຄອງແຮງງານ ໃຫ້ທຸລະກິດ ທີ່ເຄື່ອນໄຫວໃນເຂດເສດຖະກິດພິເສດ.
ໃນໂອກາດ ທີ່ມາຢ້ຽມຢາມ ແລະ ເຮັດວຽກຢູ່ແຂວງຈຳປາສັກ ເທື່ອນີ້ ອົງການປົກຄອງນະຄອນຫຼວງວຽງຈັນ ຮ່ວມກັບ ຄະນະກຳມະການໂອແລັມປິກແຫ່ງຊາດ ໄດ້ມອບເງິນປະກອບສ່ວນໃຫ້ເມືອງໂຂງ ຈຳນວນ 150 ລ້ານກີບ ເພື່ອກະກຽມພິທີສະຫຼອງວັນໂອແລັມປິກແຫ່ງຊາດລາວ ຄົບຮອບ 45 ປີ.
ຂ່າວ: ທັດຊະນະ, ພາບ: ພູທິບສະຫວັນ.
